دايرة تصويرة مراد في الموبيل؟!! راكي مطلقة واشبعي تمهبيل ..

[ورود الشتاء]

كاشي جديد؟ كاش حكايات؟

.

.

.

كاش مسلسلات تركية ؟

الحالة راهي بالياطاش تقول اسطمبول راهي في بوعقال،،

كاين واحد العباد مكبدين عليهم وسورتو على الأبطال ديالهم،، كل مايجي واحد ينسيهم في لوخر، ايزل، مهند ، يحي، أسمر، أحمر، أخضر، واخرتها مراد تاع بائعة الورد ،،

البانيت طايحين لوف في هاذ لحويلة،، قالك الحب أعمى وهو أحول برك،،

إيمالا كيما كان الحال،، وكي الحب أعمى يشبع تخباط مع لرض والحيوط ،، والخباطي هاذ المرة جا لواحد المغبونة تلاقيتها عند الطبيب وشوكاتني ،، وكيما تعرفو كامل بلي حنا البنات وين نتلاقاو تلقاو كل وحدة تحكي قصة حياتها هههه،، المهم قاعدين هكا وتبدا وحدة قاتلنا البنات وشكون فيكم متبعة لاميس،، نطقت وحدة قالت تعيشو ماتجيبوش سيرتها بسبة المسلسل هذاك اطلقت ، ايا انا نشعة ماروكو بدات تضوي في جبهتي،، وبدات تحكي المخلوقة تموت عالمسلسل وصاحب المسلسل،، تشوفو في التليفزيون في اليوتيوب ،، دايراتو صونري ،، وسور حاطة سي مراد arriere plan تاع البورتابل والميكرو كمان،، مرة كان عندها رونديفو مع الفيونصي تاعها لي صاي عاقد عليها،، وراكم تعرفو الحب عندنا لوكان الراجل ما يمرمدش المرا تقولك مايحبنيش ومايغيرش عليا،، المهم السيد رفدلها البورتابل ديالها باش وزعما يشوف الا كاش راجل من غيرو عيطلها،، مع الخزرة مع شاف السي مراد ويضربو الجن،، وعينيه ولاو حمورة،، وقاللها: تخدعيني مع تصويرة؟؟؟؟؟؟ روحي وراكي مطلقة.. خلي مراد ينفعك،، جابلك ربي رايح يخلي لاميس وزينها ويجي لعندك ،، يندب عليك،، وراح وخلاها،، المرة قاعدة والدمعة حاصلة في العين كي الميكيات،، توخدت بعدما كانت قريب تعرس،، لميس دارت الدار وماطمعتش فيه دات رأفت البشعون،، وانتوما هنا تتبعو لهوا في الشبك،،

بصح انا وش مافهمتش كيفاه عرف بلي واسمو مراد والبطلة لميس وزينونة ؟؟؟؟ والله وجيت في بلاصتها نضرب طلة عالبورتابل تاعو ...