بغرير لذيذ وخفيف ومثقب زي الشهدة

[loubna2]

السلام عليكم حبيباتي هذا اول موضوع لي في لمنتدى
البارح درت البغرير احنا في الشرق نقولو القرصة أو الغرايف المهم جاء رائع جدا
وراني طيبتوا في المقلاة برك وجاء هايل علابالي في الطاجين احسن المهم اليكم الطريقة

الخطوات الأولى كي بليت العجينة وعجنتها ما صورتهاش المهم تحطي السميد (من نوعية مليحة ) لانو نوعية السميد تعمل دور في نجاح البغرير انا ندير لكل خبزة تاع كسرة مغرف قهوة خميرة فورية وندير شوية زيت حوالي مغرف كبيرة زيت وشوية ملح المقادير نديرها بعيني يعني ماشي بمقياس ثم نبلها مثل الكسرة ونخليها ترتاح حوالي نصف ساعة ونعجنها حتى تولي رطبة وطرية واذا لزم الامر نزيد الماء دافئ وباقي الخطوات باللصور











وللأمانة راني حطيت حوالي ملعقة صغيرة خميرة الحلوى قبل ما نطيبوا وخليتوا حوالي 10د ثم طيبتوا وهذا سر الخفة تيعو بصح مرات ما نحطش كي نلقاه
مثقب ما نحطش الخميرة تاع الحلوى بصح هي تخليه خفيف بزاف وما تكثروش منها لانها تجري الخليط وحطوها قبل ما تطيبوا ب5 او 10د لانها سريعة المفعول
ونصيحة اخرى لكان كنتو راييحن تحطو الخميرة تاع الحلوى اتركوا المزيج ثقيل لانها تتفاعل وتطلق المزيج يعني كي تحطوها يجرا

السلام عليكم ورحمة الله وبركاته