حلوياتي المتواضعة لعيد الاضحى المبارك 2012

ninafret · 2012-10-28, 18:44

السلام عليكم هاذو حلوياتي البسيطة ان شاء الله تعجبكم

مقرقشات العين او الحنيفيات ساهلة وتجي مورقة روعة اللي تحب طريقتي نمدهالها

السلام عليكم نظرا لطلب الاخوات راني حطيت الوصفة
مقرقشات العين

بصراحة انا كنت نعملها بمقادير مختلفة على اللي راح نحطلهالكم اليوم هاذ المرة عملتهم هوما وقريوش المارغوريت بنفس العجينة وطلعو روعة لكن مذافهم مختلف لان كل وحدة عندها طريقة عملها ومايبانوش من نفس العجينة
العجينة
1كلغ فرينة
علبة مارغارين لابال نتاع250غ
1مغرف كبيرة خميرة الخبز
1خميرة نتاع القاطو ..كيميائية
مغرف كبيرة مليانة خل
1فاني
1بيضة كاملة
مزيج من ماء الزهر والماء العادي يكونو دافيين حسب الحاجة

طريقة التحضير

تذوبي كمية الزبدة وتخليها تبرد من غير ماتجمد وتصبيها فوق الفرينة وتخلطي مليح مليح حتى تولي مثل حبيبات الرمل تزيديلها البيضة وقرصة ملح والفاني وتخلطي شوية وتزيدي الخميرة نتاع الحلوى ونتاع الخبز تخلطي شوية وتزيدي الخل والماء المخلك اللي شوية فقط دافي وتلمي حتى تتحصلي على عجينة ماشي طرية بزاف لانها لوكان تكون طرية بزاف تتعبي معاها وقت العمل
تقسميها على4قرصات وتغلفيها بكيس ولا الغلاف الغذائي الشفاف وتخليها ترتاح ساعة كاملة
تحضري كمية من المايزينة واشري نتاع الميزان تخليها مورقة 1000مرة خير من نتاع العلب وهدا سر نجاح التوريق عن تجربة
حلي القرصة الاولى فوق طاولة حطب كبيرة تكون مرشوشة بالمايزينة حلي وكل مرة اقلبيها ورشي شوية مايزينة حتى تتحهلي على شكل مستطيل كبير ورقيق كي تشوفي الطاولة بدات تبان تحت العجينة اعرفيها بلي محلولة مليح حتة متجيش معجنة اعدلي الجهات 4 للمستطيل بالسكين حتى تولي متساوية
غلفي كامل الوجه نتاعو بالمايزينة باستعمال يدك حتى تلصق شوية في العجينة
ادعني جيهة من المستطيل بشريط من بياض البيض حتى يساعدنا في الالتصاق
ابداي رولي العجينة من الجيهة اللي مقابلة شريط بياض البيض حتى توصلي ليه وراح تتحصلي على حربوش طويل
ميلي سكين ماضي وابداي قصي العجين مقروضات مايلة بسمك 1سم اوقيس اصبع اليد لا اكثر حذاري ادا عملتي المقروضات كبار تجيك شوية معجنة
جيبي مقروضة منهم رقديها على الجنب وزيدي حليها بالحلال منفوق للتحت ثم من تحت لفوق وحطيها مباشرة في بورت مونجي حتى ماتشيحش وكملي باقي المقروضات بنفس الطريقة
كي تكمل كل الاقراص المتبقية بنفس الطريقة ابداي عملية القلي مباشرة حطي 1لتر من الزيت في مقلات غامقةوواسعة
زيدي معاه ملعقة خلي وخليه على نار متوسطة ثم ابداي اقلي الحبات وابداي بالحبات اللي عملتيهم مع الاول لانها تكون تخمرت مع القلب المستمر حتى تاخد اللون الذهبي قطريها مليح وحطيها طوليا في كسكاس كبير فيه ورق ماص ولا ورقة جريدة حسب المتوفر
كي تحبي تقدميها نحي الحبات اللي تحتاجيها حطيها في صحن مستوي ماشي غامق كيما نتاع السلاطة واسقيها بملعقةمن خليط متكون من عسل نوع المرجان مداقو هايل ومذا ثاني سر لنجاحها يكون مخفف بشوية ماء زهر ورشي فوقها كمية من الجلجلانية البيضاء المحمصة ضروري تكون محمصة وذري شوية من البراق الغذائي الذهبي وانقلي الحبات لصحن التقديم والف صحة وهناء

وهذا قريوش الوردة او المارغوريت وكاين اللي يسميه قريوش النخلة مذاقو روعة

العجينة
1كلغ فرينة
علبة مارغارين لابال نتاع250غ
1مغرف كبيرة خميرة الخبز
1خميرة نتاع القاطو ..كيميائية
مغرف كبيرة مليانة خل
1فاني
1بيضة كاملة
مزيج من ماء الزهر والماء العادي يكونو دافيين حسب الحاجة

طريقة التحضير

تذوبي كمية الزبدة وتخليها تبرد من غير ماتجمد وتصبيها فوق الفرينة وتخلطي مليح مليح حتى تولي مثل حبيبات الرمل تزيديلها البيضة وقرصة ملح والفاني وتخلطي شوية وتزيدي الخميرة نتاع الحلوى ونتاع الخبز تخلطي شوية وتزيدي الخل والماء المخلك اللي شوية فقط دافي وتلمي حتى تتحصلي على عجينة ماشي طرية بزاف لانها لوكان تكون طرية بزاف تتعبي معاها وقت العمل
تقسميها على 4 قرصات وتغلفيها بكيس ولا الغلاف الغذائي الشفاف وتخليها ترتاح ساعة كاملة

قسميها لقطع متوسطة وحليها بالمشينة نتاع العجين رقم 9 ثم 5ثم 3 حتى تتحصلي هلى شريط قطعي منو حبات بطابع المارغوريت المتوسط والكبير كي تكمليها حطي مارغوريت كبيرة وادهني الوسط بشوية بياض بيض وهدا هو السر في انها ماتتنحهاش الحبات من بعضها وقت القلي وزيدي فوقها حبة من نفس الحجم لكن حطيها بطريقة معاكسة وادهني الوسط بياض البيض ولصقي حبة المارغوريت المتوسطة واهني الوسط بياض البيض وزيدي فوقها حبة من نفس حجمها لكن حطيها معكوسة واخيرا اغطسي حبة لوز من الجهة الرقيقة في بياض البيض وارشقيها مليح في الوسك حتى تبان من تحت

حطي الحبات فوق بلاطو مرشوش بشوية فرينة وخطيهم بمنشفة

كملي حلي باقي العجينة في المشينة وتبعي باقي الخطوات حتى تكمليها كلها
واللي بقالك كل مرة من العجينة لميه من غير عجن وخليه في الكيس مدة وعاودي حليه واستعمليه بنفس الطريقة
سخني 1لتر من الزيت مع ملعقة خل واقلي الحبات اللي لازم تكون وغمورة وتتغطى بالزيت على نار متوسطة مالازمش تكون سخونة باش تطيب من الوسط حتى تاخد اللون الذهبي قطريها ووقت التقديم اسقيها بملعقةمن خليط متكون من عسل نوع المرجان مداقو هايل ومذا ثاني سر لنجاحها يكون مخفف بشوية ماء زهر ورشي فوقها كمية من الجلجلانية البيضاء المحمصة ضروري تكون محمصة وذري شوية من البراق الغذائي الذهبي وانقلي الحبات الى الكيسات اللي تكون من النوع الجيد حتى تبان الحبة شابة ثم لصحن التقديم والف صحة وهناء

اي استفسار انا في الخدمة

وهذا كروكي على طريقة ماما

لعمل بلاطو كبير كيما نتاع المقروض لازم
8بيضات
1علبةعلبة لابال نتاع 500غ مليانة سكر عادي
1علبة نتاع لابال مليانة زيت
2فاني
2خميرة الحلوى
قرصة ملح
شوية برش ليمون اختياري
فرينة حسب الحاجة اعتقد شوية اكثر من كيلو
بالبباتور ولا الميكسور خلطي البيض والفاني والسكر والزيت مليح حتى يذوب السكر مليح ولا تقدري تستعملي يدك زيدي برش الليمون وقرصة الملح والفرينة بالتدريج مع الخميرة حتى تتحصلي على عجينة لينة ادهني يدك بالزيت واعملي حرابش فوق البلاطو المدهون بالزيت كي تكمليها كلها ادهنيها بصفار بيضة مخلط مع شوية زعفران بودرة وادا ماعندكش ديري ملعقة صغيرة قهوة ثقيلة ثم اعملي خطوط متعاكسة بالفرشيطة وذري كمية من الجلجلانية النية لانها راح تتحمص في الفرن وابعتيها للمخبزة تطيب
ولا اعملي الحرابش في بلاطوات صغار وطيبيهم في البيت بالتناوب كيما عملت انا
وكي تقطعي الحبات اقلبيها على الجنب وزيدي حمريها من الجوانب في 2 في الفرن راح تجي مقرمشة ولذيذة جذا

عيد سعيد للجميع واي حلوى عجبتكم راني في الخدمة

ام ماريا هاجر · 2012-10-28, 19:18

هايللل الله يبارك تعيشي ممكن مقادير الكروكي جا هايل وقريوش الوردة والله مرة جربتهم جاوني معجنين من الداخل مع اني نقصة النار خلاص وكاين وردات طارو من بعض ممكن توضحيلي طريقتك كترت عيك ربي ينورك

hadyle · 2012-10-28, 19:27

الله يبارك وصحا عيدك

الوصفات من فضلك خصوصا القريوش

mohamedcrbt · 2012-10-28, 19:57

السلام عليكم الحلويات اتك هايلة اختي و عيدك مبروك ينعاد ليكم كامل بالصحةة و اللهنا
امممممممممممممممم يشهو ممكن تمديلنا مقادير القاطو الاول الحنيفيات
و شكراااااااااااااااااااااا

*عاشقة الجنة* · 2012-10-28, 20:01

صح عيدك حبيبتي كل عام وانتم بخير ان شاء الله

حلوياتك رائعة ومتحوفة باهية مشاء الله
يعطيك الصحة

hind18 · 2012-10-28, 20:08

عيدكم مبارك أريد مقادير المقرقشات

chazed · 2012-10-28, 22:59

عيدك مبارك ,كل عام وانت بخير
يعطيك الصحة ماشاء الله ,ممكن طريقة الحنيفيات وشكرا

انتي بلون الورد · 2012-10-28, 23:05

يممممممممممممممممممممممم يشهو يعطيك الصحة وتيشي طريقتك ف المقرقشات و تاع الوردة

همة عالية · 2012-10-29, 08:59

الله يبارك

zineb_saib · 2012-10-29, 09:37

ماشاء الله الكروكي يشهييي

oum anas 69 · 2012-10-29, 09:46

ya3tik asaha yhablou allah yarazkak doriya salha inchallah w tafarhi bihom kima raki tfarhi fina amin

ninafret · 2012-10-29, 11:00

اقتباس:

المشاركة الأصلية كتبت بواسطة ام ماريا هاجر

هايللل الله يبارك تعيشي ممكن مقادير الكروكي جا هايل وقريوش الوردة والله مرة جربتهم جاوني معجنين من الداخل مع اني نقصة النار خلاص وكاين وردات طارو من بعض ممكن توضحيلي طريقتك كترت عيك ربي ينورك

حاضر اختي راح نكتبلك ونشرحلك السر اللي يخليهم ما يطيروش
وراح نكتبلك مقادير كروكي ماما ولعلمك راني حطيتو من قبل بالتفصيل