نزوجو ولا لا ادخلو ونصحوني تعيشو

[دنيا55]

السلام عليكم ورحمة الله تعالى وبركاته
اولا رمضان كريم ليكم كامل حكاية طويله رغم اني اختصرتها كملوها مادابيكم حتى للآخر
راح ندخل فمشكلتي مباشرة
عندها عامين ونص مللي تعرف على واحد فالنت
المهم حكينا شوي كأصدقاء
وواحد النهار كنت حاطه فالبروفيل تاعي فوطو تاع طفله لقيتها فالنت
شافها فالبروفيل تاعي قالي هذي نتي قتلو ايه
المهم عجباتو هاذ الطفله وطاح فيها وكلشي
وهو يحسب انو هاذ الفوطو تاعي
رجع يبات ليله كومبلي وهو يكتبلي وحبني بزاااااااااااااااااااااف ولا خلي نقولو حب هاذ الصوره بزاف
بعدها ب6 شهر عطيتو رقم الهاتف تاعي
وبعد مرور ثلاثة اشهر قررت نحبس هاذ اللعبه ونبعد عليه لانو غاضني ومحبيتش نتمسخر بيه كثر
عيطتلو قتلو خويا ربي يهنيك
قالي لالا وانا حاب نزوجو ونجي نخطبك ........الخ
قتلو لالا انسى بللي تعرفي وتهلا فروحك وكوبيت عليه
غدوا الصباح عيطلي قالي راني فولايتك (هو مش من ولايتي)
المهم حوس علي بالمعلومات الخاطئه اللي مديتهالو مالقانيش
ومبعد عيطلي وبدا يتوسل فيا قبلت نتلاقاه
شافني من لبعيد للبعيد وراح عرفت بللي السيد اخينا (خوانجي)
كي رجع لولايتو حكينا وقررنا نكملو فالعلاقه لانو انا بدات تعجبني عقليتو واخلاقو (الزائفه)
وبعد مرور اسابيع تبادلنا الصور
المهم كملنا فعلاقتنا وبعد عام زاد جاني شفتو من لبعيد كي العاده
وكنا مقررين نزوجو كي نلحق انا 18سنه
وبعد 6شهر زاد ولالي زدنا تشاوفنا ومبعد قالي ماعجبتينيش
انا لهنا غاضتني قتلو هذا وين باه تهدر؟؟
علاه ماهدرتش فاللول وخليت حتان فات عام ونص ؟؟؟؟
قالي هذي هي ومقدرتش نزيد نخدعك
قتلو مالا خلاص منكملوش هكا فالحرام مادام ماناش حانزوجو نتفارقو خير
لهنا ماتقبلش هو الفكره وكي شافني حانبعد صح بدا فمخططو الدنيء
راح لم الفوطوات تاعي اللي عندو
ورجع يحكي معايا ويسجل
ومبعد قالي راه عندي ملف صورك+تسجيلات
لوكان تخليني نبعثهم لاهلك
المهم عشت ايامات عصيبه مع تهديداتو وكنت نقول معليش ربما هذا عقاب من عند الله
نسلك فالدنيا خير
المهم عيشني تقريب عام كحل غير التهديد ونحكي معاه ولا يهدد ويسبني وووووووو
حتان جا نهار كرهت خلاص قلت نصارح امي لانها قريبه ليا
لامتني وعاتبتني وسبتني ومبعد قاتلي خليه واللي حب يديرها يديرها
جا عند ابي زعما باه يفضحني
وكي لحق عندو فآخر لحظه تراجع وماقالو والو
سترني ربي والحمد لله
وضرك راه يقولي راني حاب نزوجو قتلو انا لالا خلاص كرهتك ومنقدرش نتخيلك راجلي
وقتلو حابه نكمل قرايتي فالجامعه
قالي معليش راح نبعد عليك
بعدها ب3ايام قالي لالا مكانش قرايه وتزوجيني ولا نفضحك
انا حابه نكمل قرايتي وندير ديبلوم فيدي اما الخدمه منخدمش بصح هو مخلانيش نكمل الجامعه
وديجا كرهتو من الشي اللي دارو فيا
وتعقدت منو وتبالي منقدرش نكون هانيه معاه
وحاساتو مش داير فيا ثقه
يقولي البورتابل مكانش ورا الزواج والنت كيف كيف
واهلك متروحيلهمش بزاف والسكنه مع دارنا
علابالي بللي غلطت غلطه كبيره بصح هذا هو الصغر والنيه
فقت لكن بعد فوات الاوان
منيش حابه اللوم حابه النصيحه على هذا قصدتكم
وان شاء الله يعتبرو لبنات من قصتي ووحده مايوسلها الشيطان ولحكايات هذو كاينين فالواقع مش غير فالأفلام كيما يحسبو بزاف
اعطوني رايكم نزوجو ولا لالا؟؟؟

[chou_int]

واش من بنة بقات تاع زواج هدا مع احتراماتي ندل و مخادع كيفاه يسجل مكالماتك و يهددك إدا ديتيه واش راح يتبل فيه هدا ادا صح حاب يديك لازم تشوفي طريقة باه تخبري باباك و الأحسن عن طريق الأم و هدا راي خاص صح فطوركم

[chocho2020]

تقريبا نفس المشكلة نتاعي ولكن من نوع اخر...المهم ردي بالك تقبلي تتزوجي بيه ردي بالك أنا ننصحك تداومي على صلاتك و الدعاء الى الله عزوجل يغفرلك...

[وردة أمل]

.............بصح اسمحيلي الغلطة بدات من عندك انت و لازم تتحملي المسؤولية كاملة..................

إياك ثم إياك تقبلي تزوجي بيه هذا إنسان مخادع و ماراهوش تاع ثقة خصوصا و راه بين روحو من الأول ...............و ادعي ربي يفرج عليك و يبعدوا عليك لأنو رايح يدمرك يلا قبلتي بيه و رايح يجبدلك قاع واش درت ........صور......محادثات........لقاء.......و رايح يقولك بلي ما كيش انسانة تاع ثقة و قادرة تخونوني ..............

ربي ييسر أمرك و يهون عليك إن شاء الله

أكثري من الإستغفار و الدعاء

[rynad]

لالالا لا لا تقبللللللللللللللللللللللللللللللللللللللللللى بيه مراهوش اهل الثقة

[عُضو مُحترم]

كمّلي قرايتك


كي شغل ما عرفتيهش

و كي يقرب ليك

عندك ابوك او خاوتك يربّوه

بالطريقة المناسبة ( بالدبزة)

ملاحظة قلتي السيد اخينا

االاخ مايديرش هكذا

يعني هو واحد من الحثالة و ليس أخ

صح فطوركم

[ناصرالدين الجزائري]

غيري رقم الهاتف و لا تراسليه على النت ..

بعد مدة سيتركك لحالك ...

[adel04]

لا مجال للتفكير فيه كزوج لك...هذا الذي يعتبر نفسه"أخينا" هو أخوالشيطان لا أكثر...حذاري أن تتزوجيه فالخراب سيكون نصيب بيتك..اقطعي علاقتك به تماما..غيري رقم الهاتف ولا تكلميه على النت...سيمل ويرحل باذن الله...ربي معاك

[احلام 2012]

المشاركة الأصلية كتبت بواسطة adel04

لا مجال للتفكير فيه كزوج لك...هذا الذي يعتبر نفسه"أخينا" هو أخوالشيطان لا أكثر...حذاري أن تتزوجيه فالخراب سيكون نصيب بيتك..اقطعي علاقتك به تماما..غيري رقم الهاتف ولا تكلميه على النت...سيمل ويرحل باذن الله...ربي معاك

ما كنت ساقوله قاله اخي عادل وبطريقة افضل ................صح فطوركم

[دنيا55]

شكرا لكم كامل
يعني آرائكم انيس نخليه يجي يقول كلشي لاهلي؟؟؟؟؟؟؟

[المتوكل محمد]

إذا لك رغبة فيه فاعلمي انك سوف تكونين شبه مسجونة او محبوسة في دارهم ..
وإذا ليس لك رغبة فيه فاقطعي كل صلة به وابتعدي عن علاقات النت تماما ..
وأي شخص يهدد بنشر الصور هو عديم الاخلاق والانسانية ..
وعديم الرجولة تماما لانه لو رجل فعلا سوف يجد من تتزوجه كثيرات ولا يقف عند
واحدة يهددها ابدا فالرجل الحقيقي اذا رفضته واحدة تزوج أفضل منها .. معذرة لقسوتي
لكن هنا تكمن الرجولة وليس بالتهديد بالصور ..

[❀ بَسْمَةْ أَمَلْ ❀]

balllllllllllllllllllllllak tizawji bwahed khada3 kima hada ............ w khalih yhadad 3la rou7ou w win rayha tbani ntiya b hadik tassjilat w lrs photos yendib bihom psq rana kamel m3ardine bach yrou7olna manach 3arfine kifaach w chedi f rabi w 9raytek w khedimtik menb3ad hada sla7ek ya tofla w rabi m3ak

[الأخ خالِـــد]

السلام عليكم

لقد اعترفت بأنك أخطأت لما تكلمت معه ، وهذا خطأ كبير لأنك خنتي ثقة أهلك فيك،

ولكن الخطأ الأكبر أن تواصلي في خداعهم، الآن استطاعت أمك أن تساعدك وربما

سامحتك أيضا ، لكن إذا استميتي هكذا فالنتيجة ستكون صعبة عليك وعلى أهلك،

أما عن الزوج فمنزلك عنده باب وأنت عندك والدك فإن أراد الخير فالطريق واحدة ،

والطرق الأخرى تعني انه يلعب بك فلا تفتحي له تلك الطرق وإلا خسرتي كل شيء.

[سارة29]

خطيييييييييييييك منه وبعدي عليه وخطيك من الدردشة على النت جيب غير المشاكل والذنوب

[~~ أغيلاس ~~]

السلام عليكم و رحة الله و بركاته .

يا أختي ننصحك كيما خوك، هذا ماشي راجل و ما يستاهلش تتزوجيه، هذا انسان حقير و ما عندو لا دين لا أخلاق .

إياك تكلميه مرة أخرى لا في النت لا في الهاتف .

كلمي يماك و فهميها و روحي معاها انتي وهيا لعند الشرطة ( لا بوليس ) و حاولي تحلي المشكلة معا يماك بلاما يسمع لا خوك لا باباك، و إيلا ما قدرتوش تحلو المشكلة قولي ليماك ترفع المشكلة لباباك و خاوتك، صحيح ممكن يعاقبوك لكن هذا هو الحل المناسب، خلي خاوتك يربيو هذا النذل الحقير، و قولي ليماك توصي باباك و خاوتك باش يحلو المشكل بكل سرية هكذا باش ما تتشوهش السمعة تاعك .

ممكن تعاني معا باباك و خاوتك أيام أو أسابيع أو اشهر لكن أفضل من أن تتزوجي انسان حقير و تعاني طول حياتك .

للمرة الثانية نزيد نقولك إياك تتزوجي هذا النذل الحقير، هذا ما عندو لا دين لا أخلاق و الأساس في اختيار الزوج هو الدين و الأخلاق .

ما زالك صغيرة، توبي إلى الله، حافظي على الصلاة، أكثري من الدعاء و اسألي الله الستر في الدنيا و الآخرة .

حاولي تحلي المشكل معا يماك و إيلاما قدرتيش عندك باباك و خاوتك، راكي انسانة حرة كرمك الله ما تضعفيش و ما تخليش انسان حقير يلعب بيك و يهددك، اتغداي بيه قبل ما يتعشى بيك شاوري يماك كاين باباك كاين الشرطة ( لا بوليس ) لازم يتربى مليح .

و راكي قلتي بلي هاذ الحقير أخينا ( خوانجي ) أبدا هذا النذل ماشي أخينا أو خوانجي ليس كل من يرخي لحيته فهو خوانجي، المشكل أن الناس يظنو أن كل من عندو زوج شعرات في وجهو أخينا، لا، هناك اللي داير لحية و يشرب الخمر، و هناك اللي داير اللحية و يعمل مروج مخدرات، هناك اللي داير لحية و ما يصليش، هناك اللي داير لحية و يلعب ببنات الناس .

فكرتيني بحال واحد الشاب كان جارنا بكري، و ما زالني نتلاقى بيه، نصحتو سبعين مرة بدون فائدة، داير زوج شعرات في وجهو و جملة ما يعرفش يقراها، كل سبعة أشهر مع فتاة، يصيد الفتيات المغفلات في الشارع يعطيولو رقم الهاتف، يبدا يهدر معاهم بالدين يقولهم البسوا حجاب شرعي و جلباب يخرج معاهم يحوسو في مختلف المناطق زعما بش يعرف عقليتهم، و كيما يتعلقو بيه و يربطهم يتجرأ حتى يضربهم في الشارع، أحد الفتيات تمسخر بيها لبست الجلباب و النقاب ثم خلاها، وحدة لبست حجاب شرعي و القائمة طويلة، و هاذ الشاب مستحيل يتزوج لأن يماه اللي تحكم فيه مرة قالها نتزوج جرات موراه بالكليمونات و ما دخلش للدار بعد كم ساعة ، شحال من فتاة ضيعها و ما زالو، آخر مرة تلاقيتو كانت قبل شهر أو شهرين، نصحتو و كيما كثرت عليه قالي بلي راني قطعت العلاقة مع آخر فتاة وقع في غرامها كيما يقول، و علابالي بلي ما زالو في مراهقتو المتأخرة، و كيما تسمعيه يتكلم على الفتاة اللي راهو يتمسخر بيها تحسبيه عاشق ولهان، و كلو نفاق في نفاق . و أتعجب من لبنات اللي يخليو الذيوبة يتمسخروا بيهم . الله سبحانه و تعالى خلقهم عزيزات حرائر و هوما يذلو في رواحهم .

ذكرت هذه القصة فقط لتبيان أنه ليس كل من يدعي الدين متدين، و من ينزلق إلى مسالك نهانا عنها الشرع فإن عاقبته ستكون وخيمة، و على الشخص أن يسعى لاستدراك ما فاته و تصحيح الأخطاء ما استطاع و لا يهرب من شر ليقع في شر أكبر منه .

يا أختي تحاولين الهروب من شر الفضيحة الذي يهددك بها هذا الذئب لكن إن رضخت فستقعين في شر أكبر من الفضيحة و هو الارتباط مدى الحياة بشخص حقير يفسد عليك دينك و دنياك .

راكي صغيرة و الدنيا قدامك، شاوري يماك و شوفي كيفاش تأدبوه بالطريقة اللي تحفظ سمعتك و سمعة عائلتك، و حتى لو كان يجي يخطبك من باباك لازم ترفضيه لأنه لا دين لا خلق .

ربما أطلت و كان هناك تكرار في كلامي، لكنها إن صح التعبير حماسة النصح .

بالتوفيق .