مواقف مضحكة اجرو و ادخلو قبل ما تفوتكم هه

[نورالياسمين]

السلام عليكم ورحمة الله تعالى وبركاته
جبيت اليوم نحكيلكم على بعض المواقف الطريفة اللي صراتلي و راني حايبتكم تشاركوني نتوما تاني و تحكيو مواقف صراتلكم
في المسيد
خطرة كي كنت نقرا فالسيام خطرة دخلت استادة اللغة العربية مشنفة و قاعدة تعيط علينا مني دخلت على خاطر كانو غشو فالاختبار و خدمو قاع مليح و الشيوخ اللي عسونا ما فاقولناش
امبعد القسم كانو قاع يهدرو وواحد فينا ما كان يسمعلها واش كانت تهدر وانا عندي طبيعة كي ما نكنش نسمع للاستاد واش يكون يهدر نقول برك نعم امبعد كي هي تعرفني بللي تلميدة زعما مجتهدة جات عندي تعيط و قالتلي قولي و انا ماكنتش علابالي واش كانت تهدر و قلتلها نعم
علابالكم واش سقساتني: قالتلي و لا انا راني نبانلكم بهلولة هههههههه لو كان كنتو في بلاصتي واش ديرو امبعد مزية عرفت باللي ماكنتش نتبع و بدات تضحك و جوزتهالي
في برا
هادي العام اللي رحت باش نجوز البيام رحت باش نخرج بطاقة التعريف امبعد في الدائرة كانو كاينين 2 شان وحدة لصحاب لمعارف ووحدة للشعب بابا نتيرفا وبدا يعيط وقاللهم كيفاش هادي ادا كل واحد يجوز خوه وجارو ووليد عمو واحد ما يقضي شغالاتو امبعد ولاو زعما رقعو الحالا وبابا راح و خلاني ندير فلاشان امبعد قالتلي واحد لمرا : شتي هاداك الراجل اللي كان يعيط مقبيل هاو جاز وراح
خزرت فيها وقلتلها: لالا مازال و انا بنتو و امبعد بدات تضحك ولات حمرة و مازادتش قاع هدرت معاياهههههههه
فالدار
و هادا موقف فالدار خطرة راكو تعرف العائلات الجزايرية كي تتلاقى فالعيد قاع عند الجدود و انا كنت مازالني صغيرة يعني كاش 6سنين هكداك و احنا الله يبارك فاميلية كبيرة يعني الطابلة الكبيرة ما تكفيناش قاع على هاديك حاوزو الدراري للطابلة الصغيرة باش يقعدو ياكلو واحدهم وانا من صغري مانحبش الدراري على هاديك حبيت نقعدو مع لكبار بصح ما لقيتش كرسي بصح شفت جداتي واقفة كانت تعمرلهم ياكلو واش درت نحيتلها الكرسي بلا ما تفيق و مع انا ما جبدت الكرسي هي راحت تقعد و طاحت فالارض و للدوك ما زالهم يقولولي درتيها بلعاني هههههههه
و المرة الجاية رايحة نجيبلكم مواقف وحدوخرين فالدار و المسيد و برا بعدما تحكولي على روحكم و شكرا مسبقا