يوميات متخرج باحث عن العمل.(الآنسة عيشة اللي تستلم ملفات الترشح للعمل).

[سمير الشاوي]

يوميات شاب متخرج (منذ أكثر من ست سنوات) يبحث عن عمل.
(الآنسة عيشة اللي تستلم ملفات الترشح للعمل).

(عِيشة) هو اسم الفتاة التّي كلَّفوها باستقبال مِلَفات الشباب العاطل عن العمل....
دخلت يوم الأحد 03 أفريل؛ إلى وكالة تشغيل الشباب، فوجدت مجموعة من الشباب ينتظرون الآنسة (عِيشة)...
........................
قالت إحداهما لفتاة جالسة في مكتب (عِيشة): أختي وقتاش تجي (عيشة) هاذي، عندنا قريب ساعة واحنا نتسناو ؟!! (!).
قالت لها الفتاة !: أختي والله عِلمي علمك !(!)، ضرك تجي، ما عندها وين تروح !.
......................
واحنا ننتاظروا، جات آنسة تَدَلوَح من هيت، وتغني على زهرها....
.....................
سمعت الجماعة يقولوا: راهي جات... راهي جات (عِيشة)/ فرحت....
....................
دخلت عيشة للمكتب تاعها.... دخلنا في عشرين عليها
هَزَّت (عِيشة) راسها، ومن بعد حطَّت يديها على راسها.... تبالي زعفت (غضبت بالجزايرية)....
....................
قالها واحد: (عيشة) راني جبتلك الدوسي (الملف) تاع هاذيك الخطرة.
مدَّت (عيشة) يديها، حكمت الدوسي وقالت لهاذاك الشاب: ما عليش، ارجعلي يوم الثلاثاء....
............................
ومن بعد (عيشة) زعفت، وضربت الطاولة، ورفعت الصوت تاعها: يا بن عمي !، واش راكم تحشروا، ما سخنتوش....
بقينا نشوفوا فيها داهشين....
حط يدك على خدك يا مسكين !...
ومن بعد كي زادوا دخلوا زوج من الناس، صرخت عيشة، وقالتنا: أنتوما عليكم تدخلوا من الباب، وأنا عليَّ نهرب من الطاقة (النافذة) ....
..........................
دُخت هاذاك النهار علاه ما رد عليها حتّى واحد (رغم أننا في مجتمع شاوي !) ....
.........................
(عيشة) بعد ما قالتنا الكلمة هاذيك، قامت من الكرسي تاعها، وراحت، واحنا نتبعوا فيها بعينينا حتّى دخلت لمكتب واحد آخر، وغلقاتوا بالمفتاح.....
بقيت أنا وصاحبي ننتاظروا قريب 25 دقيقة وأنا حامل شهاداتي الثلاثة في يدي !
...................
في هاذي اللحظة، دخل شاب جديد للوكالة، وقال لهاذيك البنت اللي قاعدة في المكتب اللي مقابل المكتب اللي كنا مجمعين فيه: اسمحيلي أختي ما شفتيش (عِيشة) ؟
قالتلوا: والله ما علابالي خويا، راهي غير هنا دور، ما طَوَّلش...