نشفا حنا البنات كي كنا صغار نلعبو وحد اللعب تاع ضرك ما ضنيتش يلعبوه.
رايحة نفكركم في بعض اللعبات واللي نساتو زنايدة فكروها فيه
حنا ياخي تعرفو العادة لعبنا كامل توال الدار
-لعبة الحبل :كي نتفكرها نموت بالضحك لحبال تاوعنا على كل نوع المهم حبل وحدة عندها حبل تاع الصح و وحدة مدايرة خيط تاع تريسيتي و وحدة زوج خيوط لازقين في بعضاهم آي حالة نلعبو حتان نعياو وبصح ماشفيتش على الغنايات اللي كنا نقولوهم كي كنا نلعبو بيه
-لعبة البوبيات(العرايس):اييييييييييي ييييييييه اللي تشري بوبية جديدة تلقا 20 طفلة دايرة بها وهي تتكسل وضرك عادو يطايشو وحدة بـ 20 دينار
-لعبة الكريدة :شحال توحشتها كنا نروحو نخيرو الحجار بصح لازم يكونو قد بعضاهم ايمالا نجيو في الطيطوار و نبداو جمايع جمايع تسمع غير في الطرطيق تاع الحجار
-لعبة الغميطة :هذي مازال يلعبوها ضك هذي نشفا عليها مليح كان واحد يغمض ويحسب حتان10 والباقي يدرقو(يتخباو)ومبعد يحوس عليهم ولي يلقاه يحييه
-لعبة الأمري:والله غييييير ياسعدها اللي عندها باطا شمة كانت هي اللي تبدا تلعب الاولا الطيطوارات اكل رسمنا فيهم هاذوك الرسمات تاع هاذي اللعبة وفي العطلة ماكانش طبشير لازم نحوسو على طرف جبس باه نمركيو بيه
-والله يا العشة نموت عليها انا ضك كبيرة وكي نعقب على بنات صغار يلعبو فيها نسخف ماكانوش عندنا لماعن ولحوايج و البوبيات كيما ضك بصح نلعبوها نديوها من 4 تاع لعشية حتان للمغرب واحنا نلعبو فيها وعجبك اتجينا كلي رانا في الصح وحدة فينا تجي الام ديما في الكوزينة وكانو اماهاتنا بالسيف باه يعطيولنا الخضرة لحكاية على راس حبة بطاطا حبة زرودية فلفل وبصلة و شوي ملح زعمة نديرو بيهم العشا ولبنات يسقمو يكنسو الدار (الطيطوار)ويخيطو القش آآآآآآآآآي ماشي قاعدين مره
لعبة فوووووووووووووووور
واش يا لبنات تفكرتو صغركم؟؟؟؟؟؟؟
هاذو لعبات لبنات الجزايريات
هيا اتفكرو وكاشي لعبات كنتو تلعبوهم انتوما في الولايات الاخرى و احكولنا عليها
وانتوما يا les jeunes واحد فيكم يديرلنا موضوع كيما هذا عليكم انتوما كي كنتو ذراري واش كنتو تلعبو؟ok
( تقرير عن مشاركة سيئة )، و الموجودة أسفل كل مشاركة .
2011-06-10, 20:11
تشفاو يا البنات كي كنا صغارهاها أرواحوا نتفكروا و نضحكوا
العرض العادي
