رسالة إلى رئيس البلاد
2010.12.26
هذه الرسالة وصلتني أمس عبر تعليقات على مقال "لا للنقاش البيزنطي"، ولأهمية ما جاء فيها، ارتأيت أن أنشرها كما هي باللغة العامية دون تحريف أو تغيير.
"السيدة حدة، هل ممكن أن تنشري رسالتي هذه مع جزيل الشكر؟؟ رسالة الى رئيس البلاد.
بلهجتنا الدارجة نهدر معاك سيد الرايس.
ماذا بيك تسمح لي نهدر وماذا بيا هدرتي توصلك.
واحد شعبي من هذ البلاد يشوف ويسمع ويعيش الواقع بصح ما ينجم يدير فيها والو على خاطر الدمينو مغلوق. سيد الريس من لي نشفا على روحي وهما يقولنا دوك تتسڤم ويقولولنا سخنوا الحالة سخنا حتى نحرقوا يدينا وفي لخر ماكان والو.
سيد الرايس البلاد لراك انت المعلم الكبير نتاعها راهي مرونة وكيما نقولو حاشا قدرك " راهي مخلطة بكراع كلب" سيد الرايس رانا ما عرفنا لمن نشكيو وماعرفنا لمن نبكيو؟؟ سمعنا بلي راك انت الرجل الاول في البلاد وانت القاضي الاول في البلاد وانت قلبك مفتوح لشعبك وخاوتك. سيد الريس بكينا حتى نشفوا دموعنا وصبرنا حتى فوق الحد وسكتنا حتى رجع سكاتنا مرض، كاين لهبل وكاين لهمل وكاين لقتل رحو وكاين لبدل دينو وكاين لطلق مرتو وكاين لباع ولادو وكاين لضرب امو وكاين لشاب قبل الوقت. سيد الرايس حب بلادنا رشانا ولحقروا بلادنا حرقوا قلوبنا. سيد الرايس علاش راهم يسرقوا فالمال العام؟ واشكون هذوا لهاجوا علينا كيما هجوج ومجوج؟؟ سيد الرايس الفوضى دهشتنا ورجعتنا مانفهمو والو، سيد الرايس اشكون ليحمي عرضنا واشكون ليوقف ويجبلنا حقوقنا؟؟ أشكون ليرجع الامور للسكة؟؟ سيد الرايس راني لنتلاقى بيه من شعبك نلقاه هابطلو المورال.. واحد الانسان وجهو مغبر وعينيه داخلين في راسو وجهو حرش كيما الحلفة، خدم 25 سنة عمرو ما قدر يشري 3 كيلو لحم مرة وحدة باش يشبعو ولادو قالي "كنت نضيف الضيوف برطل لحم وبعدين وليت نضيفهم بدجاجة نتاع تريسيتي وضروك راني حشمان نضيفهم بحبيبة بيض" وصاحبي وحد آخر قالي "كان غير جيت كيما زيدان كان ممكن يستقبلني سيد الرايس في البيرو نتاعو" (..) سيد الرايس شعبك ذلوه طحنوه رخصوه عراوه ضحكو عليه لجناس وبهدلو بيه قدام ليسوا ولي مايسواش. سيد الرايس رانا ندعو لك ربي يحفظك ويعطيك صحيحتك ويوفقك باش تصلح البلاد وتعمل الشي لعجزوا عليه اللاولين. سيد الرايس عندي ولد خويا عمرو 11 سنة عايش في الخارج جا الصيف لي فات للبلاد حاشاك حب يقضي حاجتو ما لقيناش مرحاض عمومي حشم يعملها في الشارع عملها في سروالو ابكى ابكى حتى مل. انا ضحكت حتى شبعت بانتلي كبحال نكتة، باباه زعف عليا وقال لامي بلي انا غير متحضر ومنعرفش حقوق الطفل، صح سيد الرايس انا متخلف ونحترمش حقوق الطفل؟؟ غاضتني هذ الكلمة وزاد جات من ابن امي؟؟؟ ولد خويا زاد في الخارج، حكالي حياتو كاملة من لينوض الصباح حتى يرقد في الليل، والله ياسيد الرايس غير قريب دارلي مشكلة مع ولاد خاوتي نتاع هنا أتصور ياسيد الرايس حب يسوفجهم، قالهم بلي في دارهم في الخارج يدوش الصبح كل يوم وياكل حاجة وسمها "بريك فاصت" وعندو خزانة نتاعو في المدرسة يحط فيها الكتابات لميسحقهمش، وعندهم مكتبة نتاع الاطفال يروح يقرا فيها الكتابات ويروح يدير لبيسين والكنغفو، وعندو الصباط نتاع الرود وعندو شنبرة نتاعو وحدو يرقد فيها وتعرف ياسيد الرايس بلي بباه راه يخدم في الخارج معلم برك. حتى بنت ختي قالت لبابها انا ثاني ديرلي شنبرتي وحدي، وهي عمرها غير سبع سنين، قلتلها عيب عليك، قلتلها حنا العرايس هما ليقولو ديرلي شنبرتي وحدي، مازالك صغيرة انت. ولد خويا الميڤري يهدر بزاف ويروماركي بزاف، كل مرة يخرج لي بكريتيكا جديدة .. علاش عندكم الغبار؟ علاش البنيان نتاعكم معوج؟ علاش الما ينقطع؟ علاش الطرق محفرين؟ علاش الطنوبيلات يسونيو بزاف؟ علاش الناس يبزقو وين جات؟ علاش ماكناش حوايج نتاع الدراري؟ علاش التريسيتي تروح بزاف؟ علاش التلفزيون فيه غير الغنا؟ علاش تتكيف في الدار؟ علاش يتبلاو لبنات بزاف؟ علاش المارشيات ملابزين؟ وعلاش؟..وعلاش..؟ باش نسكتو سقسيتو شكون خير الفطور نتاع جداك ولا البريك فاصت نتاعكم؟ قالي الفطور نتاع جدة.. قلتلو علاش؟ قالي على خاطر جدة تحطلي كل شي.. قلتلو بصح كيتروح عمك هو ليخلص الكريدي. سيدي الرايس هذا طفل بريء عطاني ملاحظات ماعرفتش نجاوبو. سيد الرايس وليد جارنا يقرى نتاع محو الأمية مسكين باش يعاون روحو قالي عندو ستة شهر مخلصوهش، لقيتو متكي على حيط، قالي نخدم بصح ندي المصروف من عند الشيخ، يعني باباه، قلتو الشيخ باباك منين جاوه الدراهم ؟ قالي نتاع لنتريت. سمحني سيد الرايس طولت وكثرت عليك راني حبيت نفرغ الي في قلبي عندك. وكيما قال القصيد واش العمل واش المعمول؟ سيد الرايس بلادنا نحبوها ونخافو عليها وعلى هذا راني كتبتلك هذ البريا في لنترنت إن شاء الله ما يديروش بلونطو لنترتت، سي نو مراحش نقدرو نزيدو نهدرو معاك.
التوقيع : المحير
حدة حزام
( تقرير عن مشاركة سيئة )، و الموجودة أسفل كل مشاركة .
2010-12-27, 09:39
رسالة إلى رئيس البلاد
العرض العادي
