أرجو الدخول ........مستقبلي في خطر

mounabac · 2010-08-06, 13:14

السلام عليكم لقد تحصلت على الرغبة الاولى و هي المدارس التحضيرية للعلوم الاقتصادية لكن هنا تكمن مشكلتي فقد كانت المدرسة في تلمسان و هي جد بعيدة عني و لا أستطيع الدراسة فيها بل مستحيل أدرس في تلمان و هذا علما أني من ولاية تيبازة و عندما طلبت التحويل الى الجزائر أخبروني أن المدرسة بالجزائر ممتلئة لذا قد يضيع مستقبلي ان لم أحول الى الجزائر من فضلكم أنا في حيرة من أمري أرجو الماعدة بالنصيحة ان أمكن ماعساي أفعل ان لم يقبل طلب التحويل؟؟؟؟؟؟؟؟؟؟؟

ميرثا · 2010-08-06, 13:16

شوفي مدرسة فالشرق بلاككاين فعنابة احسن من تلمسان

ميرثا · 2010-08-06, 13:17

وبعدما تدرسي وتخلصي عام تقدري تبدلي بسهولة

❀ بَسْمَةْ أَمَلْ ❀ · 2010-08-06, 13:46

اقتباس:

المشاركة الأصلية كتبت بواسطة mounabac

السلام عليكم لقد تحصلت على الرغبة الاولى و هي المدارس التحضيرية للعلوم الاقتصادية لكن هنا تكمن مشكلتي فقد كانت المدرسة في تلمسان و هي جد بعيدة عني و لا أستطيع الدراسة فيها بل مستحيل أدرس في تلمان و هذا علما أني من ولاية تيبازة و عندما طلبت التحويل الى الجزائر أخبروني أن المدرسة بالجزائر ممتلئة لذا قد يضيع مستقبلي ان لم أحول الى الجزائر من فضلكم أنا في حيرة من أمري أرجو الماعدة بالنصيحة ان أمكن ماعساي أفعل ان لم يقبل طلب التحويل؟؟؟؟؟؟؟؟؟؟؟

سبحان الله اختى عندك نفس مشكلتي حتي المسافة كيفكيف من ناحية البعد
انا ثاني كنت ناوية نعمل ترونسفار للجزائر بصح قالولي عليهاا الضغط بزززاف حتى كن نتبدل رايحيين يزيروها بزززاف في الكونكور يعني للي ينجح غير طويل العمر كيما يقولو
ملا قلت عاميين يفوتو يفوتو بحلوهم ومرهم رايحة نصبر وخلاص

mounabac · 2010-08-06, 16:27

السلام عليكم ممكن تفيدوني كيفاه ندير ملف ترونسفار ماراني عارفة فيه وااالو من فضلكم أفيدوني

شكــــــــــــــــــــــــــــــــــــــــــــرااا ااااا

❀ بَسْمَةْ أَمَلْ ❀ · 2010-08-06, 17:09

شوفي اختى روحي للجامعة نتاع الجزائر لازم يعطووك ورقة نتاع القبول من بعد روحي لتلمساان باه يعطوك اوراقك بصح لازم تضمني بلاصتك في الجزائر

إيمان 3 · 2010-08-06, 17:12

يا أختي ما تخاطريش بمستقبلك أقراي في تلمسان و خلاص عامين و يفوتو المهم مستقبلك ما يروحش

boucenna feriel · 2010-09-18, 13:30

السلالالالالام
عليك أختي
أنا تان كيما نتي
و من نفس الولاية
أنا من بواسماعيل
و نتيا ؟؟؟؟؟؟؟؟؟؟؟

أنا راني حابة نبدل لدرارية
وقيل غدوا نروح
ندي معايا
-نسخة من بطاقة التعريف مصادق عليها
-نسخة من كشف النقاط مصادق عليه
-نسخة من شهادة التسجيل مصادق عليه

هدا ماكن

قوليلي تعرفي وين جايا باظبك في درارية ؟؟؟؟؟؟؟
باش منقعدش نحوس عليها

ههههههههههههههههههههه

أرجو من جميع من قرأ الموضوع و بعث الى هذه المدرسة بتلمسان
أن يعرفنا بنفسه

نتعارفو قبل منروحو خير
ولا لالا ؟؟؟؟؟؟
باش منحسوش روحنا بعاد على موالينا

؟؟؟
سلالالالالالالالالالالالالالالالالالالام

meada · 2010-09-18, 13:51

والله يا اخيتي ما اقدر افيدك بحاجة
انتي شوفي جامعة غيرها تطون في الشرق واقرب من تلمسان
واذا مالقيتيش ادرسي في تلمسان سنة ولا زوج وبعدها تقدري تغيري بسهولة
والله اعلم
اتمنالك التوفيق اخيتي والله ييسرها لك ويوفق الجميع

لميرا · 2010-09-18, 13:59

يا اختي انا نقولك يلا كان كنت حابة من بكري تقراي هدي الشعبة
لازم عليك تحملي كلش و عام ماراهوش بزاف ومبعد ديري ثرونسفار
غمضي عينك و فتحيها تلقاي العام فات
وادا ما كنتيش تحبيها بزاف انا نقولك بلوكي العام و عاودي الباك وقراي اللي تحبيه بزوج باك

univ.bejaia.2011 · 2010-09-18, 14:58

أريد التعارف وتبادل المعلومات بين طلبة جامعة بجاية

أتركو ***** تاعكم

هاولك ***** تاعي univ.bejaia.2011

hiba27 · 2010-09-18, 15:44

شوفي حوسي وحدة قريبة ليك في الشرق ويلا ماكانش قراي تما عام ممبعد ديري تحويل العام الجاي و هدا المستقبل تاعك ما تفرطيش فيه حتى ولو كانت الدراسة بعيدة و فاني منها تشوفي و تكون ليك تجارب و حظ موفق ان شاء الله

جزائري2 · 2010-09-18, 15:54

اصبري و خلاص أناكنت أرغب في أن يتم توجيهي لهذه المدرسة لكن لهذا السبب لم أخترها أما و قد تم الإختيار فلربما ستحبين تلمسان و الدراسة فيها وما هي إلا سنتان ثم العاصمة تناديك و تقتربين من ولايتك .
بالتوفيق

الجوهرة الدهبية · 2010-09-18, 16:02

أختي رانا قاع هكذا
انا في نفس المدرسة لكن في عنابة راهم غير عامين
بالطول بالعرض يفوتو

mounabac · 2010-09-18, 16:13

اقتباس:

المشاركة الأصلية كتبت بواسطة boucenna feriel

السلالالالالام
عليك أختي
أنا تان كيما نتي
و من نفس الولاية
أنا من بواسماعيل
و نتيا ؟؟؟؟؟؟؟؟؟؟؟

أنا راني حابة نبدل لدرارية
وقيل غدوا نروح
ندي معايا
-نسخة من بطاقة التعريف مصادق عليها
-نسخة من كشف النقاط مصادق عليه
-نسخة من شهادة التسجيل مصادق عليه

هدا ماكن

قوليلي تعرفي وين جايا باظبك في درارية ؟؟؟؟؟؟؟
باش منقعدش نحوس عليها

ههههههههههههههههههههه

أرجو من جميع من قرأ الموضوع و بعث الى هذه المدرسة بتلمسان
أن يعرفنا بنفسه

نتعارفو قبل منروحو خير
ولا لالا ؟؟؟؟؟؟
باش منحسوش روحنا بعاد على موالينا

؟؟؟
سلالالالالالالالالالالالالالالالالالالام

السلام عليكم اختي انا من مدينة القليعة و رحت لدرارية نهار الاربعاء اللي فات و دفعت الدوسي لازم تدي معاك طلب تحويل تكتبيه انت و نسخة من شهادة التسجيل تاع تلمسان و نسخة من بطاقة التعريف الوطنيه و نسخة من كشقف نقاط الباكالوريا و تدفعيهم و من بعد يعيطولك تهدري معاهم و يقوللك في اخر شهر سبتمبر ارواحي تشوفي اذا قبلوك بصح العدد اللي يدير ترونسفار كبير بزاااف
بالنسبة للموقع نتاعها بالضبط و الله ماعلابالي انا رحت بالطونوبيل تكون سهلة خير و غير توصلي لدرارية تسقسي على هذه المدرسة و اي واحد يوريهالك و ان شاء الله يقبلوك و يقبلوني و نتلاقاو لثمة
بصح اختي نصيحة من عندي ثمة كلش بالمعريفة يعني باه يقبلولك يصحلك لازملك المعرفة و في بلادنا ماكانش حاجة تمشي بلا معريفة و ان شاء تجي في الصواب
اختي اذا ماقبلوكش في درارية واش تديري ؟ انا راني حايرة واش ندير ؟