يلا يا بنات اعقدي و انوي قبل ما تدخلي.......

[angel for ever]

3ـ بوقالات:

1ـ علاش يا عذاب القلوب، عذبتني قلبي سحر الشباب ، العاشق ، كوالي قلبي ، يا من صابك في الحروب ، طفيتلي حربي ، ارجع للصبر شحال ، هكذا تبقى مهني لبال ، لو صال يا مصعب الفرقة. ي.ك: صح عندك الحق الولف ساهل و الفراق صعيب.

2ـ قالي من تعشقو رسلنيو اللي هواك قلت خلي العشق لا تلعب بيه، قالي لولا العشق ما دار الفلك ، أنا مملوك و حبيبي مالكني.ي.ك: بصحتك ، ربي يخليهولك وينحي عليك عين حسادك.

3ـ طلعت للسطح قلت لحبيب بالاك تنساني ، يا خليلي محبتك في قلبي كالجوهر الحقاني ، راكي في القلب عشاقة وحاجة في الدنيا ما تبعدني عليك.ي.ك: هذا حب و لا خلي، ربي إن شاء الله يدومها.

4ـ إيلا أنت بحر أنا حو فيك ، ويلا أنت جنان أنا وردة فيك ، وإذا تحبني أنا نموت عليك و إدا انت اديتني انا ما نفرط فيك.ي.ك: كلها وسعدو في هاذ الدنيا ، و اللي مكتوب على الجبين لازم تشوفو العين.

5ـ سمرا يا سمرا نحبك و نموت عليك ، وانت أحلى من التمر غير أنت اللي نديك.ي.ك:غير افرحي واسعدي ..باين عليك يحبك ويموت عليك.

6ـ مشيت في الليل وحدي ، و انا نبكي ، وأنا نادي يا ربي سقملي سعدي ، وناولني واش في قلبي.ي.ك: ربي يسقم السعود ويحنن لقلوب على بعضاها.

7ـ طليت على البحر ، و شكيتلو همي ، انطق ليا وقالي فرج ربي ، جايك ويحبك راك سالم غانم ، والتكلان عللا ربي.ي.ك: اللي يشد في ربي ، عمر و لايضيع و الرزق من عند ربي.

8ـ يا رايحة للحمام خليني نسبق قدامك ، نرفدلك القف فحت البيت السخون ، ونكون قدامك و إذا بغيتي نغسلك يا لالا أقدامك.ي.ك: إذا تستاهل ماشي خسارة فيها.

9ـ شجرة الياسمين تزعزعت بلعاني على كحل العين ، بطى ما جاني ، قاللها إذا رحت ، ما خليتك وإذا بعدوك عليا العديان أنا نجيبك.ي.ك: الغيب حجتو معاه ، غير اتفكريه بالخير و ادعيلو ربي يحفظو و يحميه.

10ـ يا نجوم السماء كونوا شمعاته، يا صيف الخلاء كونو فراشاتو ، و إذا عطش خويا العين ولاته ، و ربي لكريم ينجيه من عيون حسادته.

11ـ مشيت نهار الجمعة ، و الشمعة في يديا ، رحت للجامع و الدموع في عينيا ، صبت الامام يصلي على زربية ، قام وقالي وشبيك يابنية قلتلو الدنيا غدرت بيا، و قالي ما تخمي كوني مهنية، اطلبي ربي صباح وعشية ، حاجتك تنقضى وتولي ليا.

12ـ ليل يا ليل العدة حلت تاقتها ، تنفست شوية وغلقتها ،من صابني جوهرة في رقبتها ، و لا نحبس في غرتها ، من صابني وليد السلطان غير أنا اللي نديها.

13ـ فتحت الباب بسكاكر ، وخرجلي جن بعساكر ، وقالي وش جابك ليا يا لبنية ، قلتلو حبيت نشوف ممو عينيا ، الي ما خلالي حتى وصية.

14ـ يا الوردة في الكاس شفت فيك الطيبة ، ما راكيش لا باس ، خبريني و نحي عليك الهانة وقلتلو ركبني الوسواس ، الغالي ما بانش ، قلبي معمر من كلام الناس ياك يقولو دير الخير وانساه و ادير الشر وتفكرو.

15ـ حبطت لقاع البحيرة ، و ان مازالني صغيرة ، خرج ليا حوت قالي بال بيك نموت ، نجيبلك الياقوت فلتلو السر بيناتنا غير ما تعليش الصوت.

16ـ الباب اللي بيني وبينك راه قريب يجبيلك الخير ، و الكلام اللي بيناتنا واش لحقو للناس ، و الحب اللي جمعنا ربي يجيبو في الصواب.ي.ك :هدا فال مزيان ، ربي إن شاء الله يجعلو من مكتوبك.

17ـ اسمحلي يا نور يني ، نموت أنا و لا تتجرح شعرة من راسك و الله ما نظن الحب اللي بيناتنا يتفرق.ي.ك: و علاش عليك هذا الوسواس ، ربي ان شاء الله يجمعكم في دار وحدة.

18ـ أنا نحبك ونموت عليك ، ونحلف بربي العالي ما نسمح فيك ، يا لو كان تحطولي موس على رقبتي ، و ان شاء الله ربي العالي يجمعني بيك في الفردوس الأعلى.ي.ك: ربي يخليكم لبعضاكم و ما تفرق بيناتكم غير الموت.

19ـ جابولي خلخال ذهب ،وخواتم مرجان ، يوم الفرج راه حل عليا ، و السعد راهو جاني حتي باب الدار .ي.ك: يعيا الصابر ينال.

20ـ قالو، قالو، و القل سابق فيكم أنا ديت الخمري ، و عشرة في عينيكم.ي.ك: ربي يحفظك من عيون الحساد ، و يبعد عليك الغيورين.

21ـ كان الزهو جناني و الحسد عند جيراني و انا فرحانة بزماني ، و نومي نوم هاني ، وضرك يا عباد اله شفتوني كي راني ، من وقت اللي ربي بالن ، بعشق ذاك الشباب البراني. ي.ك : الزين زين الفعايل ، وما يدوم في الدنيا غير الصح.

22ـ ياسمينة يا ياسمينة ، نهزك في لعلالي ، قولو لكحل العين ما ينساني ، و الله راكي في بالي ما صابني طير كي الطيور انجي نبلغك سلامي. ي.ك: وعلاش تقطعي لياس ، كل شي بيد ربي ماشي موحال.

23ـ إذا انت ليل انا نجمة نضويك وإذا انت بحر انا موجة نقويك وإذا انت ربيع انا وردة فيك ، حلفت ميات يمين غير انا اللي نديك.ي.ك: ربي ان شاء الله يجعلو من مكتوبك.

24ـ البسي اللي يواتيك ، جميع الناس حارو فيك ، اللي عندو لعقل يديك واللي ما عندوش يصبر قلبو عليك.ي.ك: كل شي بيد ربي و اللي يحبك من الخالق مرحبا بيه.

25ـ باسم الله بديت ، و على النبي صليت ، و على الصحابة رضيت ، وعطيت يا خالقي يا مغيث ، با رب السما العالي ، اسمك مفتاح كل خير ، يا مجرى السحاب ، يا اللي راك أدرى بحالي ، ديرلي في المضيق طريق. ي.ك:ان شاء الله تتسقم لحوال ، و يجيك الفرج القريب.

26ـ بخرناك بالجاوي ، جبنا الخبر من القهاوي ، بخرناك بالحنا ، جبنا الخبر من مزغنة كلامي على حبيبنا وسلامي على دارنا خيوطها ذهب وبيبانها عسل. ي.ك: هذا فال مزيان ، ربي يرزقك بولد لحلال.

27ـ الباء و التاء ، كل ما جانا و الحوتة تغلب وتعوم ، وساق حبيبي زمردة وياقوتة ، و انا نحب خليلي و الي بغى يموت يموت. ي.ك: ربي يكمل بيناتكم ، ويجمعكم في الخير على طول العام.

[ام خديجة1]

بارك الله فيك

[الملاك الصغير]

يعطيك الصحة اختي و بارك الله فيك
و الله جاتني مع زهري سوا سوا

[ندى 33]

شكرا أختي .

[manou2009]

يعطيك الصحة اختي

[~ لؤلؤة مسلمة ~]

3ـ إذا انت ليل انا نجمة نضويك وإذا انت بحر انا موجة نقويك وإذا انت ربيع انا وردة فيك ، حلفت ميات يمين غير انا اللي نديك.ي.ك: ربي ان شاء الله يجعلو من مكتوبك.

[imene08]

نحب البوقالات