مشكلة

[مشكلتي]

السلام عليكم
مشكلتي مع الوالدة تعبت روحها وتعبتني بل مرضتني كل يوم روح تخدم روحك تخدم روح دير اعمل كنت خدام لمدة سنة كاملة لكن الخدمة لي كنت فيها فيها بزاف المشاكل وضغوطات نفسية وانا مقدرتش نكمل عييت خلاص كي قعدت في الدار كل يوم تقلي روح تخدم روح تخدم روح تخدم روح تخدم حتى نفقد الاعصاب نتاعي ونتقلق لدرجة الجنون منحملش هذي الكلمة روح تخدم علابالي لازم نخدم وراني نسعى ونحوس على خدمة لكن دائما يا بعيدة بزاف يا الاحر قليل مزلت ملقيتش خدمة تساعدني ونستقر فيها وليت كي نتقلق تحكمني نوبات هلع وخوف نفسيتي راهي تحت الصفر بسبب امي روح تخدم باش تتزوج روح تخدم باش دير ودير هبلت صح صح المشكل محبتش تخطيني وخايف نديرلها كاش حاجة ماشي مليحة لحظة الغضب وظرك وليت نخمم نخرج من الدار ونشوف حيات اخرى ونخليها تتمنى تشوفني مفهمتش واش ندير وممكن نقولو بلي انت ماكش نتاع خدمة لا والله انا انسان مجتهد وعندي ماستر وخبرة في مجال العمل نتاعي لكن يحبو يستغلوك يخدم خدمة نتاع 7 ملاين ويقلك نخلصك 3 ملاين ان شاء الله ربي يفرح علينا وعليكم

[حورية تو]

أي أم في هذه الدنيا تتمنى أن ترى أولادها ناجحين مستقرين...حاول تفهمها برغم أن الإهتمام الزائد ولد الضغط لذيك ...هذا الضغط تكاثر مع الضروف الراهنة في الجزائر ...تدرس ثم لا شيئ..والعمر يجري...
لم أجد ما أنصحك به إلا أن تجلس مع حالك و تصفي دهنك وترتب أولوياتك ...إبحث عن نقاط قوتك وانظر ماذا تستطيع فعله في أجواء كهذه..حتى و إن كان عملا بسيطا فإن وجدت ما هو أحسن انتقلت إليه ،
ثم أظن أن المسافة البعيدة لا تأثر عليك بما أنك رجل قليل من الشجاعة فقط، كل واحد وين طيح خبزتو موفق .

[نجاة^^]

السلام عليكم
اخي دير في بالك مكانش واحد يحبلك الخير كيما والديك ،، امك راهي تخمملك مبعدا كي يتقدم بيك السن وتلقا روحك لا دار لا دوار ثما راك تندم على اليوم اللي مسعتلهاش ،،هذي هي الدنيا لازم السعي راح تبقى كيما راك يجي نهار وتحتاج العمل والمال و تتمنى تتزوج لانو الإنسان ميبقاش بنفس الريتم ،،،ننصحك تسمعلها وتزيد تشوف خدمة وقولها تدعيلك ،،،وماشي مشكل تبدا بخدمة 3 ملاين بالاك يجي يوم و تلحق 7 ملاين المهم خير مكانش ،،وإحذر دير وش قلت في الأخير انك تخليها وحدها صدقني راح تعيش الجحيم لأنك تحرم في امك منك
وربي يسهل ..

[Ranim mi]

ابدا بالقليل ليعطيك ربي البركة فيه
المهم حلال وشريف
خير من لقاعد ...الرزق لن يسطق ذهبا من السماء
تسبب له وتوكل على الله

[روح المي]

اعلم ان الوقت صعييب
ولو امك مهيش محتاجه او خايفه عليك راح تقلك هد لكلام؟
انت عتتعذب عتتعذب تعذب في الخدمة ولا الفراغ الفراغ قالت ويدير اكتئاب ويدير فايت نوبات الهلع
هي راها تسمع كلام الناس
ودير في حسابك لما تخدم خدمة ولو باقل سعر تهز خبرة وتفتحلك مجال لخدمة اخرى انا عن نفسي لو يسمح لي ابي نعمل اي عمل المهم يكون شريف ونصرف على روحي
وانت راك راجل حمد لله كبير لازمك تتعلم تتحمل مسؤولية نفسك
وتسعى لرزقك باه تدير مستقبل على روحك والايام تمضي
يجيك نهار تلقا ناس كامل قدام وانت بقيت في نفس نقطة

[Rofrof]

عادي اخرج كل يوم صباحا وابحث عن عمل حلال ليس بالضرورة ان تعمل في مجالك ، ولو تعمل في تجارة بسيطة*
هكدا تسكت الوالدة وتجيب مصروف جيبك*
الى ان تجد عملك المناسب*
القعاد هكدا ماشي مليح*
والخدمة في بلاصة فيها ضغوط نفسية ماشي مليحة تان*
الصحة النفسية وراحة البال مهمة جدا*
دير في بالك مرحلة وتجوز وربي رح يفتح لك بيبان الخير
قل بسم الله تفتح الأبواب
.....
حوس ع خدمة وحداخرى مافيهاش اثر سلبي على نفسيتك ولا تنس خدام الرجال سيدهم* وان استحيت باي عمل اعمل في منطقة اخرى لا يعرفك فيها كثير من الناس
مادام عمل حلال*
وكلام والدتك طبيعي*
ادعي ربي يطول في عمرها*
وربي يرزقك من حيث لا تحتسب