أحتاج دعوات ونصائح

[مشكلتي]

السلام عليكم
نتمنى تكونو بخير وصح صيامكم ربي يقبل منا ومنكم صالح الأعمال
مشكلتي مانعرف نسميها مشكلة أو صدمة عابرة أو مانعرف...
المهم، أنا من صغري تربيت كأي بنت عادية من عائلة محافظة ومتخلقة والحمد لله وكنت نشوف بنات معايا دايرين المنكر ويقولولي نتي معقدة ومع ذلك كنت بيني وبين نفسي نقول أنا هذي الأشياء نديرها مع زوج مستقبلي ومانخدعوش من الان باش اولادي ثان نربيهم تربية حسنة وتبان ثمرتي فيهم
أنا قريت عادي وكملت دراستي وكنت متفوقة ونجحت في مسابقة توظيف
وكاين خطبوني وبعد الاستخارات والو كان الرفض اما مني اما منهم ولكن بدون خطبة رسمية يعني ماكانش تلبيس الخاتم وووو
المهم حتى جاني هذا الشخص لاباس عليه يبان متخلق يصلي قادر على المسؤولية قبلت بيه وتزوجنا ودار الشروط لي كنت درتهم
ومن بعد لقيتهم عائلة كارثية تتعامل بالسحر حتى الرجال وأنا من نوع اني نحب القدر والاحترام يكون مابين اهلو ومابيني وماتقبلتش هذا الشيء نكون لابسة اي شيء في داري يدخلو على غفلة ولكن خاوتو كانو يدخلو بلا إذن ويجو ويخرجو كيما يحبو وهذا الشي في السكن تاعي انا وزوجي وكي قلتلو داوس معايا وقالي هذا خويا ويرقد معايا وماتساليهش ياك يجي ويروح هذا ماكان..وهذي نموذج من واش ماعجبنيش
المهم مرة من المرات داني لدارنا وكي داني غلقولي داري وداو لبستي وفراشي وكلش ليهم وانا كنت مريضة وبعثلي ورقة الطلاق و ماسألش عليا أبدا رفدوني اهلي فقط
المهم كانت ليا صدمة من ناحية المرض (اجهاض) ومن ناحية طلاق
وفي الجلسات قال لي قول جارح لحد الآن كل ما أتذكره نوكل ربي قال لي تزوجتك وطلقتك نشوفو شكون لي راح يديك...راكي فضلتي وايضا يشوفوك الذيابا فاسدة واذا اردت فعل شيء ابعثيلي وهو يقصد الفساد.
حسبي الله ونعم الوكيل فيهم جميعا هو واخوته واخواته وان شاء الله يمرو بنفس الوضع لانهم ظلموني ظلما كبيرا لأنني دخلت بنيتي وكنت بأخلاقي وكنت متواضعة وعمري لامسيتهم بشيء
الآن تحرق في قلبي كلمة مطلقة بدون ذنب وخصوصا في مجتمعنا لي ماكنتش نتوقع انو هكذا
الحمد لله اني متمسكة بمبادئي واخلاقي واعترضت الكثير من الذئاب
بالصح إلى متى؟
وأيضا أنا خائفة من كل خطوة سأخطوها رغم أنهم خطبوني اخرين وتقدمولي ولكن خايفة أضعاف الخوف الأول وكرهت الزواج لهذا السبب
أحيانا أقول لماذا صذيقاتي لي كانو يديرو ويديرو مهنيين ومتزوجات وأنا لي كنت ننصح ووو هذا هو مصيري أعود وكاين لي يشوفك محل شفقة وكاين محل استشفاء يستشفى وكاين يشوفك فاسدة وكاين لي يشوفك متوفرة على طول الوقت وماعندك من واش تخافي
نتمنى تقدمولي نصائح أو كلام جميل

[بـــيِسَة]

يكفي قول هذه العبآرة

حسبي الله ونعم الوكيل
و مشكلتك تجربة عشتيهآ
و اتمنى من أخوآتنآ ألآ يقعن فيهآ

عآدي شوفي حيآتك و خليك من تخمام فيك
قلت كان يصلي و قادر على المسؤولية
شكلك معرفتيهش مليح معليش
ربي يهدينآ / موفقة

[غصن البآن]

لا حول ولا قوة الا بالله ..وجعني قلبي من واش حكيتي ..وكلي ربي ياختي فترة وتجوز وبالاك خيرة ليك الطلاق حدث من غير اولاد ..الراجل اللي يرمي زوجتو و يطلقها وهي اصلا فمرحلة تاع مرض ( اجهاض) هذا انسان مفيهش الخير ولا خوف ربي ..عسى ان تكرهو شيئا وهو خير لكم ..بلاك ربي نجاك منو
واش نقولو هاذو اللي شايفين الزواج لعبة وارواح وطلق ربي ينتقم منهم .. وحاشا تكوني فضلة راجل ربي عزك وقدرك وربي دار الطلاق والدين ابدا مقللش من قيمة المطلقة ..الناس جاهلين يفكرو بسطحية
ياختي اطوي صفحتو من حياتك و خلي ثقتك فربي كبيرة انو راح يعوضك و هو على الظالم
حسبي الله ونعم الوكيل فكل ظالم يحقر امرأة ..

[محمد محمد.]

وعليكم السلام ورحمة الله وبركاته

كان من المفروض أن تسألي عنهم جيدا قبل أن تقدمي على الزواج ، فأهل السحر والشعوذة لا يخفى أمرهم على الناس

وفي قصتك نوع من الغرابة كونك لم تذكر ما هو السبب الذي جعله يطلقك ، أهي عائلته ؟ أم هو شخصيا ؟ ولماذا ........... المهم الأمر حدث وإنتهى وأنت لازم تشوفي للأمام و توكل على الله وإذا تقدم لك من ترضين دينه وخلقه فتزوج واسألي عن أهله وما تقوليش هاذ الكلمة تاع كرهت الزواج لأن هذا ليس من شيم المسلم ، فالمسلم يجب عليه أن يكون صبورا ومتفائلا وراضيا بقضاء الله وقدره .

وأيضا هناك خطأ كبير في قولك : لماذا صديقاتي لي كانو يديرو ويديرو مهنيين ومتزوجات وأنا لي كنت ننصح ووو هذا هو مصيري أعود

أولا : عليك أن تتركي المحرمات لله سبحانه ماشي باش تتزوج ، فإن الله سبحانه لا يقبل عملا إلا إذا كان خالصا لوجهه الكريم

ثانيا : لا يجوز التسخط على قضاء الله وقدره مثل إستعمال عبارات : لماذا أنا ، ولماذا فلان معافى وأنا مبتلى ولماذا يحدث معي هذا ............ إلخ من هذه العبارات ، فهذه كلها تقدح في توحيد العبد .

يجب على العبد التسليم لشرع الله ولقضائه وعليك بالدعاء خاصة في هذه الأيام وفي التلث الأخير من الليل .

أعرف فتاة مطلقة كانت صالحة و طلّقها أهل زوجها من زوجها ظلما وغيرة ، فانهال عليها الخطاب في ظرف وجيز ورفضت اغلبهم إلى أن خطبها ذلك الرجل الذي كانت تتمناه ، وقد تقدم إليها 8 خطاب ، وزوجها الذي اجبرته والدته على طلاقها أقسم أنه لن يتزوج بعدها .

أختي عندما تكونين صالحة وتقية وتخاف ربي ومتّبعة لسنّة النبي صلى الله عليه وسلم فأنت عزيزة ، العز كل العز في طاعة الله والذلّ كل الذلّ في معصية الله .

[HANAN 04]

و الله اختي انا اعرف شيئ واحد ومتاكدا منو
هو ربي خلق هاد لحيات ويمشيها بلمصطرة كيما يقولو
يعني لي يدير حاجة ماشي مليحي يخلص
الدنيا هذي عادلة هاد الشيئ دايما ديريه في راسك
وشيئ اخر ارم الهم و انسي و ابني حياة جديدة بعيدة عن هاد الناس
نصيحة من القلب لاختي

[Orchid flower]

السلام عليكمو رحمة الله وبركاته

الاخت الفاضلة ماشي اي انسان يقول انا نصلي تروحي ترمي نفسك و نظن لوكان سالتو مليح لوكان ممكن عرفتو قصة السحر و الشعوذة اما ممكن مكانوش الناس يعرفوهم لا علينا بالنهاية اذا جاءت الاقدار عميت الابصار


المهم منحكوش على الماضي نحكو على المستقبل انت الان انفصلتي عن شبه الرجل هذاا اصلاذكر و خسارة فيه امثاله معمولين فقط للتلقيح و اصلا اللي يتعامل بالسحر و الشعوذة هذو مشركين بالله و موتهم احسن من حياتهم

ربي يدمر السحرة و اعوانهم من شياطين الانس و الجن

درك حاليا احمدي ربي اللي رجتي من عندهم و نجاك ربي و انت بصحتك و الان اهتمي بالرقية الشرعية ممكن اصابك اذى منهم
اما اللي قالك راكي فضلتي قوله ربي كرمني و منيش فضلة و قوي شخصيتك لانك واضحة انك لازم تسترجعي ذاتك و شخصيتك المسلوبة درك ربي يرزقك بسيد سيده و يكون راجل ماشي ذكر للتلقيح و راهوربي كرمك مرة اخرى بحدوث الاجهاض عسى ان تكرهو شيئا و هو خير لكم ... كان المولودراح يربط طول حياتك بواحد من عائلة السحر و الشعوذة لوكان جيت في مكانك انا اللي نطلب الطلاق و لا نخلعه من وقت اللي نعرف انهم يتعاملو بالسحر رجال و نساء تعيشي مع واحد م ن عائلة اشركت بالله و اتبعت خطوات الشيطان ارمي عليك الحثاالة .. اكثر ناس نكرههم اللي يتعاملو السحر سواء كانو نساء او رجال ... لاني عانيت من الامر هذا
شوفي للحياة بايجابية راكي مثقفة متخلقة و حتى موظفة يعني ماكيش مرمية في الزنقة


اسال الله العظيم ان يرزقك زوجا صالحا تقيا نقيا يكفيك و يغنيك و يرزقكسعادة الدارين و يعوض صبرك على الابتلاء ... بصح ما لازمش تسخطي من ابتلاء الله و قدره متنسايش انو الصابرين يوفون اجرهم بغير حساب

[kimjia]

يا اختي تحكيمك على الشخص انه صالح بمجرد انه يصلي فهذا خطاء فالصلاة واجب وهذا امر مفروغ منه كان يجب عليك ان تسالي عن عائلته وعنه كثيرا قبل القبول به ولكن قدر الله وما شاء فعل يعني بصراحة ميستاهلكش وهو مفيهش الخير وربي انقذك من هذا الزواج تخيلي كملتي معاه وجبتي ولاد ونبعدا ولادك هوما لي يضيعو وزاد دارهم يا لطيف سحر يا ااختي زوجي وديرها زكارة فيه على قولو شكون لي راح يديك وهذا ابتلاء واختبار وعليك الصبر وربي يفرج عليك

[ع.عيسى]

مع كل احترماتي حكايتك غير قابلة للتصديق ولها مآرب اخرى ....واش حابة تقولي ؟ البنات لي داريين المنكر اي العاهرات تزوجوا وزواجهم ساجي والحمد لله ، واما انا العفيفة والطاهرة ولي شادة في ربي طحت على راسي وصرى فيا المنكر ؟ حابة توصلي ميساج خفي وهو يا البنات عفة البنت او عهرها لا علاقة له بتوفيق الزواج ...وايضا حابة تقولي انا انسانة طاهرة وشادة في ربي ومع ذلك لاحني ربي على راسي بحيث صليت صلاة استخارة وهذه نتيجتها .... لذلك نقلك الاية الكريمة لي تقول : ومن يَتَّقِ اللَّهَ يَجْعَل لَّهُ مَخْرَجًا (2) وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا......وانت تجي تقولي بلي انا كنت عفيفة وووو وصحباتي عاهرات وووو ..هم سجالهم الزواج واما انا فلا ؟.....لذلك روحي ادي حكايتك بعيد

[رَمَادِيَاتْ]

رغم أن نقطة الطلاق تبدو غامضة نوعا ما وتحتاج تفصيلا منطقيا ربما تجنبت شرحه،
لكننا نحسن الظن بكل كلمة قلتها، لأننا جميعا وفي لحظة من لحظات التعب.. قد نقول لماذا حصل معي هذا رغم أني كذا وكذا، ونقع في فخ المقارنة بين أخلاقنا وأخلاق غيرنا وما صرنا إليه وما ظفروا هم به..
وأقول أن الله إذا أحب عبدا ابتلاه، وأنت والله نجوت حين كُتب لك الاجهاض ولم يعد بينك وبينه أي رابطة.
ثم، هي دنيا عبور يا أختي... نحن في الغالب ننتظر ثمرات ما قدمناه من خيريتنا في الحياة، ونظن أن الآخرين يعيشون أفضل منا، لكنك في الأصل لا تعرفين اذا كانوا يحيون بسعادة فعلا أم انهم غارقون في المشاكل، أيضا لا تعرفين اذا كانوا برغم ماضيهم تابوا وندموا على الذي كان منهم فكتب الله لهم طريقا أفضل.. فليس من الجيد أن نتوقع لهم التعاسة والشقاء لمجرد نقدم لهم النصيحة، فالقلوب تتقلب وتصلح كما تفسد وتنتكس بمرور الوقت..

علقي أملك با الله، واثبتي على اخلاقك.
و حتى، وإن لم يأتك العوض في هذه الحياة.. عسى أن يكون صبرك وإيمانك ويقينك وحسن ظنك بالله زاد ثقيل ينفعك في الآخرة.

[زهرة لوتوس]

لا حول ولا قوة الا بالله ربي يفرج