هل أنا معقدة

[مشكلتي]

السلام عليكم و رحمة الله و بركاته
ندخل طول في الموضوع
كاين شاب معروف بزاف بلي ناس ملاح و متربي و مصلي و قاري و فيه الخير بزاف... الخ
يعني كل الصفات المليحة فيه (هكذ مشهور أنا ما خالطتو ما نأكد على هاذ الشي)

المهم أنا عجبتو و جا باش يحكي معايا يحوس نتعرفو شوي من بعد يتقدملي و التعرف يكون مضبوط (ميش هدرة في الحب.. الخ هدرة على حياتنا و واش ناويين نديرو.. الماضي المستقبل... افكاري... الخ
صح ميش راح نعرفو بعضانا مليح غير بالعشرة
بصح اوموان نعرفو الأساسيات باش نشوفو اذا ناسبو بعضانا او لا... الخ من هذا النوع من الكلام
المهم أنا رفضت و قتلو ما نحبش هاذ الطريقة و هاذ العلاقات حتى لو كانت محترمة و في حدود.. لأنو حرام.. .. الخ

هو زعف وراح و مولاش (عندها 3 أشهر)

ما نكذبش عليكم أنا يعجبني بزااف بصح و الله ما قدرت ندخل في علاقة هكذ رغم أنو كلش فيه مليح
و لي زاد عليا هو لي نحكيلو يقولي كيفاش ضيعتي واحد كيما هاذاك...و انتي تفكري في حدود... وياخي ميش راح تخرجو و لا تتحابو... الخ

أيا أنا توسوست
ساعات نقول عندهم الحق... ساعات نقول اخاااه مالازمش يأثرو فيا

وأنتم اهل الخبرة واش رايكم
حكمني التوسويس بلي راني غالطة
صح هذا راح بصح للمرة الجاية
نقعد في هاذ العقلية و لا راني غالطة
أنيروني

[يوسف زكي]

صلاة الاستخارة

[ing.Youcef]

وعليكم السلام ورحمة الله وبركاته ومغفرته
ماشاء الله لا قوة إلا بالله
لست مخطئة أبدا ولست معقدة ولا هم يحزنون
راح الله لا يرده ولا يلاقيك بأمثاله
واش من هدرة وواش من أفكار!! راح تتزوجوا ولا تديروا مذكرة تاع فلسفة!!
المفروض والواجب أن الأمور تبدأ من البيت، ولهذا شرعت الخطوبة، فإما يحصل القبول أو الرفض.
ماتقوليش الهدرة في حدود والإحترام و. و. و. فمعظم النار من مستصغر الشرر. أنت لازم تخافي على روحك وتحذري.
بالتوفيق.

[مراد سابقا10]

الرسول صلى الله عليه وسلم قال لا يجتمع امراة مع رجل ولو كان يحفضها القران والنبي يوسف عليه السلام وهو نبي وقال القران لولا ان راى برهان ربه

الثقة في الزمان هذا مكانش اياك وايك وتهدري معاه ابسط حاجة قادر تهدري معاه في الهاتف يسجلك واش هدرتوا ومن ينشر واش هدرتوا ويسمعاو لأصخابوا

انا راجل ونقولك مكانش الثقة في زامن كيما هذا انا ومنشهدش على روحي الشيطان غرار .

يخطبك ومبعد تهدروا سلام.

[nadir_telecom]

يا أختي هو كان من الأول يجيب دارهم و يخطبك وهكذاك باش يسين بلي راهو ناوي الحلال و ممبعد ساهل تتعرفو شوية في إطار الزواج كيما راهو يقول من غير ذلك لا يحق له محادثتك و التعرف عليك و زعما كي راح تبانلي ربي بعدو عليك و صرفو عنك و إنشالله ربي يعوضك ماخير منو إنشالله و السلام

[CARL]

هاذا الشاب ناوي لعواج ماشي زواج..من يريدك زوجة يطرق بابك...فمن أراد الحلال لا يضل الطريق

[Elwawy]

نعم معقدة و , أشياء مماثلة جعلت الشباب يعزفون عن الزواج لأنه كلام فقط يتم إتهامك أنك ستزني بكلامك و سمعك و يدك و عينك و أنفك و إبطك... الكل يتمربط في الخفاء كالدواعش, يعني رب العالمين أصبح شاب يسأل فتاة في الزواج و نقاش الأمر يتهم مباشرة في نيته بالرغم أنه جد واضح من "يتمسخر" و من هو جدي, إذن لا مجال للمقارنة.

الزواج مشروع و عقد يجب أن يتفق فيه الطرفين على كل شيء و ليس قشمة و نصيب يسقط من السماء, أصحاب فكرة ال"يانصيب " كلهم يعانون لاحقا من المفاجأت.

و في كل الحالات لا أظن أنه توجد فتاة بإمكانها إستعمال العقل لمناقشة مشروع الزواج عدا أفكار : أريد العمل, أريد منزل مستقل, لا أريد أمك الخ...

[noursm]

لكان نفرضوها تراجع خلي يتراجع معنتها ماش من مكتوبك.
لان على حسب رأيي الراجل كي تعجبو وحدة صح يدير المستحيل باش يوصلها
و كاين حتى شباب يروحو يخطبو و يرفضوهم و هكاك يحاولو يرجعولهم (طرحو مشكلتهم هنا في المنتدى)
و هذا من اول تصرف منك بعد راح .
و كاين احتمال آخر انه يمكن يرجعلك ،ربما قاعد برك يوجد في نفسو .
نصيحة ليك اختي ما تندمي ما ضيعي وقتك و طاقتك في هاد الموضوع انتي تصرفتي على حسب قناعاتك و شخصيتك و أهم شيء ما درتيش امر مخالف للشرع.
أما بالنسبة للمرة الجاية استخيري الله في كل خطوة تقومين بها.
ما نقدرش نقولك اقبلي طول و لا ارفضي لان انا كذلك لو كنت مكانك لأحتار.

[syros]

الحكايات في المنتديات امر و الواقع امر اخر ...............

ماكيش معقدة .....تلك كانت طريقتك فالتعامل عكس الاخرين .... لا الومك ولا الوم الاخرين

دوكا دنيا تطورت كنت تقدري تحكي معاه فالتليفون عادي جدا في كل الامور لانو اكيد عندك شروط وهو عندو شروط سابقا كان الطلاق يحدث لسبب واحد وهو ان الزوجة خائنة او يوجعها زوجها .....

اما الان تغيرت الوازين و هذا واقع يحدث الطلاق بسبب ما كان يطلق عليه سابقا كماليات (كاين ناس طلقت لانو راجلها ماشرلهاش سيرفات كولار لي تحب) كل هذه الامور يجب معرفتها لكي نتجنب الطلاق و انت تعرف الطلاق في مجتمعنا مطلقة يعني صيد سهل و يطلق عليها كل الاوصاف و تصبح حتى منبوذة و الكل يريد استغلالها

.................... لكن الان تطورت الامور تستطيع ان تجلس مع شخص و تكلمه فالهاتف عادي جدا ولي قالك حرام قولو اختك و امك كي تروح لطبيب يهدر معاها ولا لا ؟ .............. حتى هذي تعتبر ضرورية لانكم في مسالة مناقشة مستقبلكم الاثنين معا

[الرأي الاخر]

هذه هي اسباب كثرة الطلاق

[ابنة الاسلام]

اقاسمك الرأي ..وقد سبق وان فعلت نفس الشيئ ..
لا تتنازلي عن مبادئك في سبيل مميزاته .
اصلا الاسلوب لي جا بيه لا يليق به ان كان كان ملتزما فعلا ..ربما هفوة ومن منا لا يخطئ ..على كل حال ان كان خيرا فسيستدرك الامر ويعود .
حبيت نعرف علاه يبداو بهاذ الخطوة ..يعني علاه مايديروش رؤية شرعية ويتفاهمو على كل صغيرة وكبيرة وتبقى في اطار شرعي .
المهم ربي يهدينا ويبقي علينا الستر .

[نضال من الجزائر]

أختي فعلك صواب
ذاك رأي الناس وهذا قول الله: وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلً
والأمر كما قلت حرام، فالله حرم مجرد النظر بشهوة لأنه من أسباب ودواعي الزنى فما بالك بالذي تقولينه من الخلوة والمواعيد.
أنت على خير، والله سيرزقك بمن هو خير من ذاك الشاب، كيف أعلم؟ لأنك عملت بأعظم سبب للرزق وهو ترك الحرام لله، ورد في الحديث الصحيح أن النبي صلى الله عليه وسلم قال : ( إنك لن تدع شيئاً لله عز وجل إلا بدلك الله به ما هو خير لك منه )
قال الله تعالى : ( ومن يتق الله يجعل له مخرجا ويرزقه من حيث لا يحتسب )، فأنت فعلت الواجب، والآن على الله أن يوفيك بوعده. ومن أصدق من الله وعدا.


آية أخرى عظيمة في هذا الباب: وَلْيَسْتَعْفِفِ الَّذِينَ لَا يَجِدُونَ نِكَاحًا حَتَّى يُغْنِيَهُمُ اللَّهُ مِن فَضْلِهِ
قال الإمام السعدي في تفسيره: { حَتَّى يُغْنِيَهُمُ اللَّهُ مِنْ فَضْلِهِ } وعد للمستعفف أن الله سيغنيه وييسر له أمره، وأمر له بانتظار الفرج، لئلا يشق عليه ما هو فيه.