مالحل الأردع لها

[مشكلتي]

السلام عليكم
انا اختكم متزوجة ومن شرق الوطن اقطن
اعيش مع زوجي وعائلته.
أب زوجي ليس لديه عمل مستقرعمل .يخدم عند الناس يدخل مصروف قليل
.لديا مطبخ منفصل لكن يشهد الله أن زوجي يشتري لأهله كل مايشتريه لي بل وأكثر احيانا
أي مرض يصيب احد افراد العائلة يتكفل به زوجي سواء يدير كريدي او غير ذلك
أي تلف في اجهزة المنزل يصلحه زوجي بأمواله
كلما يتقاضى زوجي راتبه يمد منو لأفراد عائلته
وأي بناء أو ترميم داخل البيت يتكفل به زوجي
وأي أثاث غالي الثمن ينقص البيت يتكفل به زوجي كالارائك مثلا أو ثلاجة
وأي بنت تنخطب من العائلة يصرف عليها زوجي .البنت السابقة صرف عليها اكثر من خمسطاش مليون تقريبا منذ خطوبتها الى زواجها.
والكثير من المصاريف التي لا تحضرني الان
والله على ما أقول شهيد

مشكلتي ياجماعة هي اخت زوجي العزباء الشريرة والتي تبلغ 23سنة من العمر .هذه البنت تحرض امها بزاف وتقوللها بلي ربيتيه باطل وكبرتيه باطل ومادارلك والو وتعبك راح باطل ووووووووو
مرة شرا لامه فستان ب400تلف الام فرحت وبنتها قالتلها علاه انتي خسرتي عليه غير ربعمية تلف.ديما تسمطلها الحالة وتطيرلها النية
كي تلعب حماتي مع ابني تقوللها واش راح يديرلك مانفعك ابنك ينفعك وليد ابنك
هذه البنت دخلت الفكرة لامها حتى ولات تتكلم نفس هدرتها ودايما مهيش راضية مهما شرالها زوجي ديما تحس بالتفريط من جيهتو
زوجي ياجماعة مهوش ملياردير والله العظيم ليتقاضى شهرية تبلغ 3ملاين فقط مع مصروف الطفل مع تكاليف الاخرى الزائدة بحكم معندناش سيارة غير عايشة انا شبه مغبونة وفوق كل هذا ملامة ومتهمة بالاستيلاء على زوجي وزوجي متهم بالتفريط
اريد حلا لهذه البنت ولا تنصحوني بالصبر والتجاهل فهذان لم يزيدا المشكلة الا تصاعدا.
ارجوكم

[مراد سابقا10]

يا اختي هذه الأمور والمشاكل تحدث دائما حاولي استمالتها لصفك وعدم اظهار كرهك لها فكلما اظهري كرهك لها زاد حقدها عليك

والأحسن شراء بيت مستقل هكذا ترتاحين انت واسرتك .

[ايمان4]

هنا الحل مش ف يدك الحل يجي من عند زوجك يقعد مع والديه و يحكيلهم شحال يخلص للشهر يحكيلهم مصروف ابنه شحال يستقامله للشهر و مصروفك انت شحال يستقام يعني النقل و غيرو ... و مصروفه الشخصي و يحكي شحال يصرف و يكون واضح يعني ها دراهمي وين راهم يمشيو و بلي راني ابن جد بار دراهمي ليكم حتى انني من شدة بري بكم منيش نخمم ع روحي و ع ابنائي باش نديرلهم منزل او غيرو راني ليك يا امي و يا ابي ارحموني ما عنديش نحوس نفرحكم بالشي لي نقدر عليه بالعقلية و يفهم والديه و يطلب منهم يدعيوله ربي يرزقه باش يتهلى فيهم اكثر ... اعتقد مكاش حل اخر لانو هذا الحل تاع الوضوح ممكن يحل المشكلة تبقى البنت منين تهدر مع امها تقلها منين يجيب يسرق ؟ اشريلي انت شمري ع ذراعك علاش تعايري اخوك؟ باش تفهم لانو ربما طيش صغر راها في مرحلة مزال ما دركتش واش معناتها انسان ما عندهش خلي امها او اخوها يفهمها انت جبدي روحك حثيه باش يفهمهم كما فهمك انت فقط و ربي يخليكم لبعضاكم و ما تشديش الحقد درك تتزوج و تروح او درك تكبر و تستعقل المهم ما تشديش الحقد من فضلك علابالي صعيبة و يحسن عاونك لكن عواقب عدم الصبر صعاب و مرين

[nadir_telecom]

للأسف هذا هو حال الأسر متوسطة الدخل تولي هداياهم باكامل تعبر بالمال و المال فقط كيما حكيتي بصح و الله العظيم غير زوجك مالقري مانعرفوش بثح نتحيلو نستعرف بيه هذا هو الواجب لي ليزملو يديو إتجاه عايلتو و راني حاس بيه بيه ناشي في بيئة فقيرة و كل و ش راهو يدير راهو ماردلهم و الو و حاب نقولك حاجة سيدتي ماعندكش الحق تحاسبيه ياك حر مالو واحد مايسالو واش ينفق على والديه كيما هوما مايقدوش يحاسبوه على واش ينفق عليك و السلام و تهلاي في الطفلة الشريرة كيما قلتي تعلمي نحبيها بالاك كاش نهار تحبك السلام

[قنون المربي والأستاذ]

السّلام عليكم
خطرت ببالي خاطرة ربما تُرضي الطّرفين
أنت تسكنين مع أهل زوجك ، ولديك مطبخ لوحدك
إذن بدل شراء مصروف لأهله يُعطيهم مبلغ محدد شهريا على أنّه كراء للمنزل، وبالتّالي تظهر مساهمته وترضين أنتِ

[فطيمة 03]

هاذي صراحة من شياطين الانس ، اذا كانت هي شيطان تسوس في صدر امها ، كوني انت العكس ، من الملايكة توحي بالخير ، دايما اذكري محاسن زوجك عند حماتك ،

[قدور بن عاشور]

الحل راه بيدك،
أطرديها من البيت.
طيب كيف؟
دبريلها راجل يديها عليكم، اسعي في تزويجها
و تتهناي من مشاكلها.

[بشرئ عاشقة العلم]

هذي حلها عند ربي يعطيها زوج مزير مليح يهنيك قاع منها ان شاء الله علاهاك لازم تدعي ربي بيقين و ان شاء الله ميخيبكش
بصح تاني زوجك باين عندو شحصية ضعيفة عادي يصارحهم بلي معندهش سبحان الله مالاول يزعفو و مبعد يوالفو لا يكلف الله نفسا الا وسعها

[منى6019]

السلام
لا تبدلي مجهودا لارضاءها ستمرضين و هي لن ترضى ....لم نضيع حياتنا في إرضاء الآخرين ...في رأيك اذا لم تتزوج هي حتي سن 36 مثلا ..ستبقين انت تعملين على ارضاءها كل هذا الوقت ?? ستخسرين حياتك و راحتك لأجلها
أنصحك أن تخرجي من بينهم ...يعني اذا اشترى زوجك لامه هدية لا تكوني حاضرة حين يعطيها لها و لا تسأليه عن ردة فعلها ...و اذا تحدثو في الأمر امامك اخرجي من الغرفة أو المطبخ ثم عودي نفسك على عدم التأثر و من لديه تعليق فليقلة لزوجك ...هم أهله فليتحملهم هو ...أما عن المصاريف فمن حقكم الادخار للمستقبل خصو صا مع طفل واحد ...على زوجك ايجاد حل ...الصراحة كثير من أهل الزوج لا يرحمون ابنهم و لا يفهمون أنه تزوج و له أسرة ....على زوجك ايجاد حل ...و انت لا تتناولي عن حقوقك .. لا تقضي صغرك في الهموم و الفقر لأجلهم فهم لن يعترفو بالفضل...لست احرضك عليهم لكن السكوت يجعل الظالم يتمادى
بالتوفيق

[abdellah36]

البنت محقة من بعض الوجوه صراحة فلو انفق الولد كل ماله على والديه ما وافاهم عشر معشار حقهم.........ولكن هذا لا يعني ان الولد يضيع نفسه او يضيع زوجته و ولده ,,,,,كما ان هذه البنت يجب ان لا تقول هذا الكلام من باب التحريض و تفريق ذات البين .....كما يجب على هذه الزوجة ان لا تستكثر ما يعطيه زوجها لوالديه فتفقته عليهم واجبة ......