يا الظالم ماني سامح ليك... *بقلمي*

medcherif03 · 2016-02-29, 20:16

السلام عليكم
يا جماعة و اياكم و الظلم فانه ظلمات يوم القيامة
ربي وكيلو اللي ظلمني

نطلب ربي فالعقوبة تكحال عليك ---- و يسود سعدك في ليام التوالة
يكشف لك لعيوب كاملة و يعريك ---- و يقبح لونك و تشيان الحالة
بجاه الأنبيا وقطب الصلاح انجيك ---- رافع أيديا لله رب البسمالة
تعيا هامل و لكلاب اتهشم فيك ---- و تخرج لك في لعزيز راه اقبالة
وانحشم قاع لخلايق تلهى بيك ---- العاصي و المطيع و اصحاب الدالة
مايعيا مخطوف عقلك بين أيديك ---- ضايع فالزقى و ريوقك سيالة
دونك سيدي الحاج عيسى ليك ---- والي معروف شهدت لك رجالة
يا قطب الصلاح راني ننده فيك ---- أحرق لو قلبو نوض شعالة
يبدى لك وسواس سمي يلهيك ---- يخوخ قلبك دخلاني منو يتقالى
زين القبة الجاية فالحدرة ذيك ---- نيف عليا نوض أعطيني دالة
يا سيد المبروك راني هارب ليك ---- هذا الظالم راه جور و تعالى
يقصب لك ذوك الجنحة و يوريك ---- و يقلع لك ذوك الجدور بفالة
يا صرية العالية راني صاعد ليك ---- مصركب في الكاف راه اقبالة
تاريخك معروف و شالله و بيك ---- يا راعي الحمرة ارهيفة بودربالة
خديمك محقور طايح بين ايديك ---- ما يحقر محقور في حرمتك لالا
يسود وجهك و يعمي لك عينيك ---- بجاه الصبيان و النسا والبودالا
يتمسى قمرك و الظلمة تقشيك ---- و تقعد نفسك بين الشوارع ذلالة
يهرب دلالك عنك و يخليك ---- تتمرمد ممحوق وسط البوخالة
ياسيدي حكوم والو مايخفيك ---- يا مول الجرعاية لرواينك وكالة
ياك انت عوني هاني جبتو ليك ---- وحيتو لك نعت الصايدة للخيالة
كسر لو ذوك القوايم لاباه يجيك ---- ما يلبس سباط ما تجيه انعالة
ننده قاع لقباب و الصلاح عليك ---- ماتسطيب طيبة من شهد العسالة
انحوط لك فالمراسم و انلهيك ---- شارد عقلك في الحلايس و اسفالة

يا ظالمني نحصد زرعك و انبكيك---- نشرم بالمنجل وننده لك شوالة
يحط عليك امراض والو مايشفيك ---- وتتربى لك علة تحت الحنزالة
تنفر منك قاع العايلة و مواليك ---- و تبقى وحدك كي بيدون الزبالة
مايعيا معروفي انشالله خارج فيك ---- وياك خبر الطعام يجيبوه الفضالة

تمت بقلمي يوم 02-02-2009 medcherif03