الراتب .و البركة

[مشكلتي]

السلام عليكم ورحمة الله تعالى وبركاته
قبل 4 سنوات وبعد جهد جهيد ، من الله عليا بوظيفة الاحلام ، براتب يفوق 10 ملاين شهريا ، ولكن صدقوني كي نقلكم اني نشكي بعدم كفاية الراتب لي ، مع اني شاب عازب مانيش متزوج ، خاطيني الحوايج لي تفلس لا دخان لا شمة ولا غيرها وتاني مانيش كراي ..كي نقلكم ان خزانتي من الملابس فيها زوج سراول دجين وقميص واحد نروح بيه للمسجد وزوج حذاء واحد وقليل من الاقمصة والشوميزات وفقط. ممكن تقولو ان عايلة كبيرة ومصاريف الاكل وغيرها ، صحيح اني انا لي نصرف في البيت ولكن عائلتنا تتكون من 4 افراد فقط انا وامي وزوج خواتاتي ومصروفنا عادي جدا جدا .حتى اللحم في المناسبات فقط ..صراحة راني حاير في معيشة اسرتنا مقارنة بالاسر الاخرى ، مع ان مداخيل اسرتنا بالاجمال هو 15 مليون شهريا ومع ذلك حياة بسيطة وعادية جدا ...والله راني حاير في العايلات مداخيلها لا تتجاوز 4 ملاين و5 ملاين كيفاش عايشين ..ونعرف شباب مدخوله لا يجاوز 3 ملاين متزوجين عايشين افضل مني و.يلبسو خير مني و امنيتهم كي نسألهم يقولولي لو كان الراتب 6 او 7 نعيشو ملوك ، ولي يدوخوني اكثر ان فيهم حتى لي كرايين .كيفاش عايشين بهذاك المدخول مع الكراء والفواتير والالتزامات الزوجية والاطفال ؟ قبل عشر سنوات كنا اسرة من 6 افراد ومدخولنا لا يتجاوز مليون ونص فقط اي كنا نعيش من معاش الوالد الله يرحمه .ومع ذلك كنا مستورين وعايشين، صحيح كان ناقصنا يزاف حاجات ولكن كنا مستورين وما حسيناش باننا فقراء مثلا ، والان بعد 10 سنوات تضاعف مدخولنا 10 اضعاف من مليون ونص الى 15 مليون ، المعيشة تحسنت ولكن بشكل عادي ..بمعنى لا تتناسب مع الزيادة في المدخول .وبحسبة بسيطة من نهار لي شديت فيه الخدمة الى اليوم خلصت 480 مليون درت منهم سيارة ماروتي وقطعة ارض ب100 مليون وعمرة لي وللوالدة وخلاص...هل هاذا يعني ان مداخيلنا ناقصتها البركة ، او ان هذه هي المعيشة ؟