السلام عليكم ورحمة الله تعالى و بركاااته,,,~~
صحا رمضانكم كيفاه راكم لاباس أكم ملاح صافا ؟ 
المهم جيتكم اليوم بوصفة تع ميني بيييييييتزا زلةة تقتل ,, درتها البارح جات بنييينة بزااف و هبلو عليها في الدار هه
بسم نبدأ على بركة الله:
في وعاء نحط :
2 كيسان و ربع فرينة
نص كاس سميد
ملعقة صغيرة ملح
ملعقة كبيرة سكر
ملعقة صغيرة خميرة الخبز
ملعقة صغيرة خميرة القاطو
نزيدو 2 مغارف كبار و نص زيت,, و نحكوها مليح في العجينة
و نجمع بماء دافي شوية و نعجنها شوية
و نغطوها و نخلوها تخمر لمدة ربع ساعة,, صراحة أنا روحت شعلت الكوشة و خليتها تدفا شوية واحد 7 دقائق هكاك امبعدا طفيت عليها و حطيت فيها العجينة باش تخمر في بلاصة دافية ,,,
بعد ما خمرت و تضاعف حجمها
نعاود نعجنها و نعاود نخليها تخمر بصح 10 دقايق,,
في هذه الأثناء هه,, نحضر لاصوص تومات
في مقلة أو كاسرولة,, نحطو زيت أو زبدة أو سمن و نحطو بصل + نص سنينة ثوم و نقليهم مليح,, نزيدلهم طماطيش الباطة و نقليهم نزيدلهم شوية تع الملح و فلفل أخضر مقطع شوية صغير و نص حبة طماطيش كبيرة مسكرفجة أو حبة طماطيش صغيرة,, بعد ما يتقلاو مليح نزيدلهم حوالي نص كاس إلى كاس ماء و نخليهم يطيبو مليح,, نزيدلهم فلفل أكحل و توايل يلي بغيتي أنا زدت كمون و كروية نحبهم بزاف ههه,, نرحيها امبعدا نرجعها فوق الفرن تعقاد
نفتح العجينة تاعي بعد ما تخمر و نقطعها دوائر,, أنا قطعتها بالكاس تع الفلان ههه
نحطلها لاصوص
و الزيتون كيما تحبي, أنا صراحة ماكان عندي والو هههه و شحنت قلت و الله نديرها ههه كنت مرقدة زيتون خضر و فلفل حار و زرودية حطيتهم عليها
نحطوها تطيب و تتنفخ و تطلع في السما ههه ملاحظة: بالاكم و يا ويلكم و سواد ليلكم تفتحو عليها كي تكون تطلع خلوها تطلع مليح في السما باش تفتحو عليها و نديروها فرماج رابي, و نعاودو نرجعوها للكوشة, انا استعملت شيدار بصح كاين يلي ما درتش فيهم باسكو ماما و بابا ما يحبوهش هه غير أنا و خويا نحبوه
أنا هنا بقاتلي كمية واحدوخرا تع العجينة عجزت لا نقطعها دوائر ههه درتها خبزة كبيرة و كي ال عادة جيهة فيها فرماج و جيهة لالا,,
النتيجة:
و بالصحة و الهنا
( تقرير عن مشاركة سيئة )، و الموجودة أسفل كل مشاركة .
2018-06-02, 17:28
ميني بيتزا بعجينة قطنية و منفوووششة بنييييييييييييينة بدون حليب { بالصور} | تابع لموضوع شطارة طلاب 2 ثانوي
العرض العادي
