عاونوني

[مشكلتي]

عاونوني
تزوجت العام لفات قبل زواج دارت في بالي نتهنا ونفرح بصح العكس لصار تزوجت من راجل ميقري دركا راني ففرنسا بصح راني نسوفري مكنش لشكون نحكي مانحبش نحكي لياما واختي باش مانقلقهمش همهم يكفيهم عندنا مشاكل في دار مع مرت خويا دركا راني خانقة مكنش بشكون نحكي .درك ندخل في مشكلتي راجلي يضربني كي نحاسبه يضربني هو مايدخلش لدار فليل حتى ثلاثة نتاع صباح واحيانا كثر وكي يجي يجيلي سكران عييت ملي تزوجته وهو هكدا وكي نتحاسب معاه ونقوله علاش تدير هكدا يضربني ومرات يضربني بزاف بالحزام وجامي يطلب سماح بالعكس انا لنطلب سماح لانه يرجعني انا الغالطة يقولي انتي لتجيبها لروحك تستاهلي نضربك يقول هادي حياتي وانا هكدا ونبقى دايما هكدا اد معجبكش الحال روحي لزاير وانا غير نسكت وقلبي فيه غمة غير نبكي مكنش لشكون نحكي حرمني من الخرجة ممنوع نخرج عندي جارة عربية منعها عليا راجلي يغار بزاف منع علي حتى الطلة من الطاقة والبلكون لكان يلقاني قيهم هداك نهاري غير وحدي غادي نختنق وهو ديما زعفان ديما منرفي نهدر معاه حتى لو هدرة نورمال يسبني ويسب اهلي ديما يسبني ويسب نهار لتزوجني قالها لي ديراكت بلي نادم علاه تزوجني هدا نهار بكيت حتى شبعت خصني برك الدم والمشكل انه كايشربني دواء منع الحمل في شهور الاولى من زواجي ودركا عنده اربع شهور ما تقرب عليا معلباليش علاه من جهة يغار بزاف من جهة نادم علاه تزوجني مافهمتش؟ اد تقدروا فهموني فهموني
راني عيانة بزاف راني عايشة فجحيم ندمت بزاف ادعولي...

[المُهَاجر]

سؤالك وجهيه لأهل العلم يفتونك في أمرك والله المستعان.

[ام البنوتة]

حدث لقريبتي نفس القصة لكنها استدركت نفسها قبل الزواج..طيشتلو حوايجو و قالتلو بالسلامة

كي شغل راني نسمع في القصة تتعاود مرة اخرى

الاولاد مايسحقهمش باش مايتربطش معاك و حتى اذا حدث الطلاق فالقانون الفرنسي يلزمه بدفع جزء من مرتبه لاطفاله

لا يريدك ان تحتكي بالجارة حتى لا تفتح عينيك و تعرفي حقوقك هناك

لا يمكن ان يتركك تعملين حتى لو لديك امكانيات باش مايكونش في جيبك حتى اورو كي يطلقك و يرميك للجزائر لانك اذا عملت و انجبت رايحة تقدري تعيشي نورمال

حكاية انو يسكر حاجة عادية لواحد عايش في بيئة منحلة و مانيش رايحة نلومك علاش ماسقسيتوش عليه لانو ماكانش لي يخيبلك خبرو

و نكتة انه يغار عليك انسااايها هو راه غارق في الملذات تاعو و السهرة تاع 3 تاع الصباح و السكرة و هجرك خير دليل انه لديه بديل بعيدا عنك لا غيرة لا والوا خايف تخونيه

و لي في بطنو التبن يخاف من النار..يعيشك في حبس باش ماتديريش الحل لعمرك

القاورية ماتقبلوش المعيشة هادي و يطلقها تديلوا كلش علاجال التفكير هذا يجي لبنت بلادو مهما يمرمدها تصبر و هو علابالو ماتغلطش و تبقى تحت رجليه اذا كانت مش فايقة

لعمرها.

هاذو هوما لزيميقري لي يتهافتوا عليهم البنات ما يسوواوش الا من رحم ربي و هم قللللة قلييييلة

[kacimo.samy]

السلام عليكم
اخت ام البنوتة وفت وكفت

بارك الله فيك

[ابن الجزائر11]

السلام عليكم

لا حول ولا قوة إلا بالله العظيم

مشكل دائما يتكرر بطله ( الزميقري ) المغترب والضحية بنت البلاد المسكينة التي تزوجته عن حسن نية أو غرر بها أهلها للزج بها في بلاد الغربة من أجل الحياة الكريمة

قبل عدة سنوات قريبة لي ماتزال في ريعان شبابها في المرحلة الثانوية تقدم لها بطلنا ( الزيميقري ) طالبا يدها فزوجها أهلها له بالرغم من البين الشاسع في السن وكانت نية الأهل كنية كل عائلة جزائرية تريد ستر إبنتهم وضمان العيش الكريم ولا سيما في فرنسا ....
فتزوجت تلك الفتاة وسوت وثائق السفر وسافرت بعد أيام وشهور بدأ الفجر الصادق يتبين من الكاذب وبانت الحقيقة الواضحة

أن هذا الزوج مدمن مخدرات وعربيد ( مايصحاش ) والأدهى والأمر أنه يدخل الغرباء إلى بيته ليتحول الحلم إلى كابوس .....
ولحسن حظ هذه الفتاة أن اتصلت بجدها وجدتها وأخوالها الذين يقطنون قريبا منها ويطلقوها منه قبل أن يحصل المحظور

وكتب الله لهذه الفتاه أن تعود إلى بلدها كريمة معززة وتؤسس أسرة سعيدة وتنجب أولادا ........وتطلق فرنسا ثلاثا

لذلك نصيحتي للأسر الجزائرية اتقوا الله في بناتكم ولا تلقو بهم إلى بيوت العنكبوت ما وراء البحار

يتقدم لكم الطيب الخلوق المسلم فترفضوه ويتقدم العربيد والسكير ( الزيمقري ) فتقبلوه ، ولم تكلفوا أنفسكم عناء السؤال عن حاله ومآله

مالكم كيف تحكمون ؟

نصيحتي للأخت الكريمة إذا رأيتي بأن زوجك مصر على ما يفعل فأخبري أهلك واطلبي الطلاق منه واستريحي مادام أنك لم تنجبي منه
وإن استلزم الأمر قدمي شكوى به وسيجرجر إلى أقبية السجون ودفع الغرامات جزاء على تطاوله عليك ولن يضيع حقك كوني متأكدة

هذا هو الحل مع من كانت هذه حاله .

[sohaibdz]

انت في بلاد القانون المرة القادمة لما يضربك اتصلي بالشرطة

[ندوشةة]

عليك برقية زوجك

[عثمان الجزائري.]

إباك و إنجاب الأطفال، رانا غلبنا من أطفال الزيجات الفاشلة، ماكش مرتاحة معاه، لا تفكري في الأطفال، و لن يكون هذا السكير فخرا لهم يوما...
يجب ان تعرفي حقوقك لتطالبي بها، يروح متأخر و لا ما يروحش ما تحوسيش تفهمي عليه، إبحثي عن حل يضمن لك حقوقك...و الحل تجديه عند أهل الخبرة من القاطنين هناك

[زبدة ذايبة]

أم البنوتة وباقي الأعضاء كفو و وفو

نصائح:

ماتبقايش ساكتة على وضعك. هذا النوع من الرجال يستمد رجولته من ضعف المرأة

مثلما قالك أحد الأعضاء بمجرد مايضربك اتصلي بالشرطة وهدديه.

خير من يطيرلك عين ولايفجخلك راس ينتهي بيك الحال الطبيب يحصل كيفاش يرقعك.

ماتفكري في إنجاب ولا في اولاد.

ماتفمري في ان هذا الرجل ممكن يتوب.

زواجه منك مجرد تسوية وضعية قدام الناس.

الطلاق حل لك.

هذا رجل فاسد دين وأخلاق.

شوفي مع إخوتك الطريقة الأنسب لطلاقك وخروجك من بيت هذا المسخ.

ربي يفرج عليك.

[محارب الحمق]

يجي ولد الفاميبيا الزوالي المتدين يطلب يد بنتهم يخرجولوا ألف عذر: بنتي مازالت صغيرة, بنتي تقرى, بنتي تخدم الخ. يجي عربيد شايف وعايف وشابع ومجرب لا دين ولا خلق من وراء البحر الكل يلهث إليه من البنت إلى أهلها الطماعين وهاهي النتيجة. كثير من المخالفات: "العيش في بلاد الكفر", "عدم السؤال عن دين الخاطب والتحري عنه" كل همهم المال المال المال والفوخ والزوخ والتقلاش في بلاد الناس ولا حول ولا قوة الا بالله العلي العظيم. من سبقتي من الأعضاء وفو وكفو

[soz soz]

اتصلي باهلك يوقفو معاك بما انك في سجن ان صح التعبير قبل ما يفوت الاوان مادام السيد ليس في عقله تخافي منو لوكان راه فعقلو تحلوها بيناتكم لكن هنا لازم تدخل احد الاطراف الاهل او القانون والله اعلم