ارجوكم ساعدوني

[مشكلتي]

مشكلتي
انني خطبني شخص وانا عاملة في تعليم التكميلي وقالي كملي خدمتك ماعندوش مكشل ولكنه الان بعد زواج ب7 اشهر طلب مني ان البس جلباب بالعجار مع حلول سنة الجديدة ولكن العجار ممنوع في تعليم ونقاب ايضا بالاول طلب نقاب ثم تنازل للعجار وهناك معلمة قديمة تلبس العجار ولكن عند وصولها لباب المدرسة تنزع العجار وانا فهمت راجلي هكدا رفض قالي لازم تديري العجار لانه داخل المدرسة هو مايغارش من تلاميد علباله بلي صغار يغار من معلمين وموظفين ورفض قالي لازم بالعجار مكنش نقاش مع العلم انني البس حجاب شرعي ولااضع مكياج قبل زواجي منه بعد زواجي ايضا وتغيره جاء حديثا سبب انه راني عندما خرجت من مدرسة مع مقتصد يكلمني وغضب كثيرا لم اتوقع انه ياتي لانه لم ياتي ابدا للمدرسة وهو اتى لكي يخبرني بان اخته قد اتت لحتى اعطيه مال لكي يشتري دجاج للعشاء وعندما راني غضب كثيرا وقال لي كلام جارح وانا صبرت لحتى راحوا صيوف وواجهته قلتها له لااستطيع ان اتكبر على الموظفين سوف يكرهونني وقلت له انا عاملة وطبيعي انهم سوف يكلمونني مع العلم انني اكلمهم كلام سطحي في المدرسة الا انه في مدرستنا كاين نميمة وتقرعيج لو كان ماترديش عليهم غادي يدروك متكبرة داوعش ومعلباليش على هدا لازم نسايرهم وقلتله طالما متحبش علاش خلتني نعمل لانه لو رفض عملي ساخرج فورا ولكنه رفض قالي لازم تخدمي وحتى دركا ميحبش يتنازل على خدمتي قالي تخدمي يعني تخدمي وماتهدريش مع احد وتلبسي العجار داخل المدرسة وتنحيه برك داخل القسم اما بمجرد خروجي للقسم نديره لحتى مواظفين والمعلمين مايشفوليش وهدا ممنوع اصلا ممنوع انه داخل مؤسسة يتغطة الوجه حتى لو في ساحة هو محبش يفهم ارجوكم قولا لي

طلبت مني انني اتسقيل من العمل رفض هو خدام بشهرية زوج ملاين وقالي مستحيل تخدمي يعني تخدمي وترك العمل نحيه من بالك يعني مستحيل يوافق لانه المستفيد الوحيد من راتبي فانا شاك نتاعي وبطاقة تعريف نتاعي عنده ويعرف متى دخلول الشهرية وشاكات مضيتهم كلهم باش كلما يجي شهر مايشورانيش يروح ديركت ويجبدهم ملي تزوجت ماشفت دراهمي حتى صوندال حبيت نشريهم ماعنديش دراهم والوا عندنا عرس اخي غادي يتزوج هادي صيف محبش يمدلي باش نشري فستان دورو من شهريتي مانشفهاش ويقولي ياك دراهم هادو مانصرفهمش انا دركا راني حاب نشري طونبيل هو يجمعهم لطونبيل دركا
وانا من قلبي حابة نخرج من خدمة لانني نتعب بزاف على والو اعمل مجانا وقلتله كي تشري طونبيل نخرج قالي والوا كي نشريو طونبيل نكملوا البناء ومبعد نصرفوا على الاولاد قولوا لي يرحم باباكم كيفاش نتصرف.

[قدور بن عاشور]

هذا راه مزوج بالشهرية تاعك، إذا زالت الشهرية فستزولين حتما.
رجال آخر زمان، لا يتخلون عن واجب النفقة فقط بل يتعدونه إلى أخذ النفقة من الزوجة.
على كل حال يبدو أنك أنتِ لي رخفتي روحك من الأول و سمحتي في الشهرية من أجل الزواج.
و ثانيا أنت الغالطة لما تخرجي من المدرسة تقصري مع الرجل المقتصد

[هـــدوء]

أولا ماكيش مضطرة تسايري حتى واحد في محيط العمل ..
ثانيا راكي خيرتي الشريك الخطأ خاطر زوجك مش راجل للأسف
الحل بسيط جيبي حقك بيدك من خلال مواجهتو
و إذا ماعجبوش الحال جيبيلو الرجال يفهموه
ثالثا تعلمي تقيمي روحك بش الناس تقيمك مش راجلك برك
و تعلمي تفرضي احترامك و رايك
و ماذابيك تفهمي بلي ماكيش مجبرة تكملي حياتك مع شخص كيفو
أعطيلو مدة زمنية إذا أصلح من نفسو و ولا يعاملك بالحسنى كان بها
إذا كمل هك كاينة فرصة للإنسحاب قبل ما يكونوا الأولاد على الأقل
و الخطأ فيك على فكرة خاطر ماتعرفيش تقولي ' لا '

[ع.عيسى]

وانت واش ضاعلك في انو زملائك الرجال يشوفوك متكبرة ...هاذي لي حاب نفهمها ؟ ماكش مجبرة باش تهدري معاهم سواء في كلام سطحي او متعمق...اما كون ان زوجك مستحوذ على راتبك ،فالله يكون في عونك ، ولكن عندما تختار المرأة ان تكون عامل والزوج ماكث ...فهذا ما تستحق

[غوّاص]

من اﻷخير ,,, الهربة تسلك,,,
هذا السلوك يسمى الرجلة
لايستطيع تحمل النفقة ثم يصدر أوامر غير قابلة للنقاش ؟؟؟؟؟؟؟؟!!!!!!!!!!!!!!!!!

[لمسة ابداع]

قلبي خرج من الراجل هذااا
ربي يفرج عليك انشاااء الله و يهديه

[nilly]

حابة توقفي خدمة ياك هو اصلا تزوجتك بمصلحة واقيلا مفقتيش
ليحوس على العاملة من الاول معناه تزوجك على مصلحة تخرجي من خدمة ينتهي مشوراكي زوجي من هنا وليتزوج ماكثة ويحوس ان تكون ماكثة في البيت من الاول تزوجك لحتى يحس برجولة نتاعه وميحسهاش غير كي يسيطر على نساء لتحوم بيه وهو ليامن بالفرق الكبير بين راجل ومرا ولدلك اليوم لتقرر فيهم الخدمة غادي ينتهي مشوارها زوجي
اما ليحوس على زوجة صالحة تسانده ولا يطلبها عاملة او ماكثة هداك لفيه الخير وفقط....
مافيها والوا كي المرا تساعد رجالها في نفقة على البيت بصح انه يسيطر على دراهم كله هدا ظلم
وهادي نتاع شيكات الكل يدير هكدا يسنيو شيكاتهم الا فونس وراجلهم هما ليجبدوا درهمهم ههههههههههههه هادي منتشرة خصوصا انه اغلب رجال يتزوجوها عاملة ويشرطوها من الاول عاملة لانهم اغلبهم ماكثون في البيوت او يعملون باجر زهيد وهنا فقط بمنتدى الجلفة يريدون الماكثات واظنهم سلفيين ولا يتسمخروا بينا

[محمد جديدي التبسي]

لم افهم كيف الشهريه عندو ويجيك للعمل ليأخذ مال لشراء دجاج للضيوف هذا تناقض كما يبدو
شيء مقرف ما يفعله زوجك وما يطلبه منك يعني يرميك وسط الاختلاط ثم يريد ان يغطيك ويرفض توقفك من أجل المال عجب والله
لابد ان تكون لك شخصيه وتواجهي زوجك وتناقشيه هذي مش حياة وان لزم الأمر دخلي أهلك حتى توقفك عن العمل ليس حلا مع هدا الزوج لانو ممكن يردلك حياتك جحيم لأنه غير أمين ولا مسؤول ربي يفتح عليك

[solinne]

والدجاج وين تلقاي الدراهم باش يشريه؟ المهم انت الي دخلتي روحك في هاذي الخالوطة كان لازم من الاول تضعو النقاط على الحروف وتاع هادي تسنييلو لي شاك وهو يخلص من ورا تعبك مذلة كبيييييرة

[نجاة^^]

زوجك متناقض كيفاه خلاك تخدمي ويقولك مت خلطيش وهو لازم احيانا ،
ومن جهة الشهرية هو اللي يديها ومش باغيك تحبسي الخدمة استغفر الله ،حاولي توقفي شوي على روحك انا نشوف في الحل المناسب واللي نت بغيتيه حبسي الخدمة بمساعدة اهلك يعني يا تحبسي يا...هدديه
هكا تتهناي من التعب ومن الظلم واللي هو chèque في يدو وتتهناي من الاختلاط وربي يعينك ويفرج عليك وربي يهدي زوجك .

[زبدة ذايبة]

وجعني قلبي وانا نقرى.

ديري لعجار وجيبي الدراهم

وتوقيع شيكات على بياض.

هذا لايصلح

إذا عندك والديك او إخوتك من الأحسن دخليهم في الموضوع.

تخليه على هذ الحال يمسح بيك الدوار دار دار.

وتكون نهايتك ........

ماتسكتيش.

إذا كنت تخافي منو داركم يدخلو.


وإذا كنت ما تخافيش جيبي الشيك تاعك ونحيلو دراهمك.

راكي رايحة تتعرفي على شخصيتو وحقيقتها بشكل أكثر وضوح.

على كل حال هذ العبد باين ولا يحتاج لتجريبه.

الأمر بين يديك لحل مشكلتك.

ربي يقويك ياعزيزتي رانا في زمان قل فيه الرجال وكثر فيه المخنثين.

[sohaibdz]

حديثا سبب انه راني عندما خرجت من مدرسة مع مقتصد (((يكلمني وغضب كثيرا لم اتوقع انه ياتي))) لانه لم ياتي ابدا للمدرسة
يعني لا توجد عندك مشكلة في الوقوف و الكلام مع الرجال مادام زوجك لا يعلم؟!
مع احترامي تستاهلي واش دارلك باش تترباي