مشكلتين: امي وزوجي رجاء دخول السلفيين والغير سلفيين مرحب بيهم

[مشكلتي]

السلام عليكم جماعة انا فتاة معقود علي عقد مدني وشرعي وراني نجهز الراجل مدلي 15 مليون شريت بيها خاتم ومنقوش وبراصلي صغير ، وامي شراتلي عام لي فات لجهازي سلسلة غليضة وبراصليها وماقض غلاظ وباعتهم بقات غير سلسلة والسنة قالتلي نخلفهم لك لكن انا نجيبلك بذوقي مش انتي العام لي فات ثاني خلعتني جابت الذهب دون منروح معاها وانا نحب نخير وحدي قالت لي الدراهم مكانش بزاف انا نخيرلك وخلاص وزعفت قالتلي علاش منعرفش نخير قلت لها امي انا ذوقي مش كيما ذوقك واش ندير دبروا عليا قالت لي خيري كي يجيبلك راجلك مش كي نجيبلك انا كي شغل عايرتني والمشكلة الثانية راجلي سلفي ومدين لكن اكتشفت انه قبل عامين في مذكرة تخرج تاعو معتمد على كتب سيد قطب في ظلال القران والتصوير الفني وكلهم تعرفوا انه سيد قطب سب الصحابة وقال منافقين مثل معاوية وسيدنا موسى ، حتى داوستوا امس وزعف مني هل هو على المنهج؟ مع العلم قالي كل الناس تغلط وانت اسلوبك مش مليح رجاءا

[بناتي نور العين]

السلام عليكم

نقدر نجاوبك على السؤال الاول اما الثاني أفضل ان اتركه لمن له فقه اكثر

شوفي يا اختي

بالنسبة للذهب تاع نتي تخيري ولا يماك هاذي مشكلة ؟

ساعفي مك المهم شرات لك يلا حبت وداتك تبارك الله ما حبتش ساعفي و قبلي يديها و قولي لها قولا كريما

و عندها الحق يلا ماعجبكش حتى بعد الزواج و غيري

و الذهب و الجهاز هادو ماهم الا امور زايدة

خممي في الصح وهو كيف تكونين زوجة صالحة و مسؤولة و كيف تربي ابنائك وتقومي بواجباتك

ان شاء الله ربي يوفقك و يهنيك

[مراد سابقا10]

لوكان كنت قدامي نفهمك مليح واش يسوى سيد قطب واشي هو وزنوا

سيد قطب راجل في وقت نقص فيه الرجال

[فاصلة]

يا اختي السيد قطب كتب كتبا في بداية حياته في الأدب منها النقد الأدبي والتصوير الفني وتفسير القرآن في ظلال القرآن وهي كتب معتمدة وأساسية في البحوث العلمية الأكاديمية نحن في الجامعة في كل حصة نتحدث عن السيد قطب ولا نتحدث عن سلفيته ثم هل قرأت أنت له سبا للصحابة والله أنا قرأت له كتابا اسمه معالم في الطريق يجعل الصحابة قدوة للادراك الرقي والحضارة ويتكلم عنهم بكل خير. نصيحة اقرئي للسيد قطب ولا تقرئي عنه.

[زبدة ذايبة]

بالنسبة لسيد قطب أسمعي لراي العلماء فيه

بن باز رحمه الله

العثيمين رحمه الله

الفوزان حفظه الله

الألباني رحمه الله

وبعد هذا أعرضي على زوجك أقوال العلماء

وإذا شفتي أنك مارايحاش تتفقي معاه

يا إما تضربي النح وماتهدريش معاه عليه

يا إما أنت في طريق وهو في طريق

خير من تتزوجي وتظلي تداوسي معاه وتتحول حياتك إلى جحيم

وبالنسبة للذهب خلي أمك تشريلك

ماتكسريش خاطرها لأسباب تافهة

يمشي الوقت وتبقالك الذكرى فقط

تقولي خيرتهملي أمي

لذا ماتحرميهاش من هذ النعمة

أنها تشوفك عروس

وتشريلك زينة من اختيارها

وتأكدي أن مرضاة أمك من رضى الله.

[عثمان الجزائري.]

أنت تقولين أنه إعتمد على كتاب سيد قطب في الأدب و هذا شيئ عادي خصوصا و أن سيد قطب أديب معروف يمكن الإستفادة من كتبه في هذا الباب، فخطيبك لم يأخذ عنه الدين حتى تلومينه...ثم من حقك أن تسأليه عن منهجه لكن بحكمة و علم فقد يكون يعلم أكثر مما تعلمين...

[toulay]

وعليكم السلام ورحمة الله وبركاته
صراحة ومع كل احتراماتي هاذي مهيش مشكلة وانت درتي مسلسل درامي وحدك ورجعتيها اشكالية
من المفروض تفرح الوالدة الكريمة تجهز فيك عجب كون ماشراتلك والو راح تجي هنا ماتخلي ماتبقي
وفيما يخص هذا خطيبك ومذكرة التخرج يخي واش فيها لو استعملوا كمرجع وين هو المشكل
بالتوفيق

[قدور بن عاشور]

سيد قطب رجل في زمن عز فيه الرجال.
رجل لم يبع دينه من أجل دنيا غيره كما يفعل علماء البلاط، عبيد كل طاغوت.

[هـــدوء]

بالنسبة لأمك مش مجبرة أصلا تشريلك الذهب .
راهي بمزيتها و كثر خيرها لي حبت تفرحك .
و كي تشريلك حاجة على ذوقها يعني تخيرلك أفضل حاجة بالنسبة ليها.
يجي نهار تشوفي هديتها تتفكري بلي حبتها و خيرتها على جالك.
أما بالنسبة لخطيبك. لو كان هز المعلومة من كاش عالم كافر و لا ملحد .هل راح تكون عندك نفس ردة الفعل؟؟

[sohaibdz]

"مع العلم قالي كل الناس تغلط وانت اسلوبك مش مليح"
اعترف بالخطا تاعو واش تحبي اكثر؟

[ع.عيسى]

بالنسبة للسؤال الثاني ، رد زوجه وفكره صواب وفي محله ، اعذريني على ما اقوله لك ، فزوجك فكره سلفي عن حق ، وانت فكرك مدخلي جامي ، فانت متاثرة بالمداخلة والجامية ، من الافضل ان تستفيدي من زوجك لتصحيح افكارك الشاذة عن المنهج الاسلامي الصحيح .

[محمد جديدي التبسي]

من خلال الاشكال الاول الذي تطرحينه ماكان عليك طرح الاشكال الثاني
فالسلفية لا تهتم بالذهب والشكليات هاذي ودير مشكل من والو هدية من أمك وزيد تشرطي اشكريها وخلاص وبعد الزواج بيعيه ولا تصدقي بيه
بالنسبة لزوجك هو اعتمد على كتب سيد في مذكرته أمر عادي جدا مادام بحث أكاديمي لا يطلع عليه الا المختصون وليس رسالة دعوية لعامة الناس فهوني عليك وما تفسديش علاقتك مع زوجك بهذه النقاشات بأسلوب غير لائق خاصة وأنك مازالت في بيت أهلك لازم شوية خجل فهو يدري ما يفعل.
ووقت يكون اهتمامك بالعلم الشرعي والكتب أكبر من اهتمامك بالذهب حينها يمكنك توجيه نصائح لزوجك حول المنهج السلفي.

[ايمان4]

الذهب مزيو من عند امك عندها الحق تخيري واش يشريلك راجلك هو ملزم بيك اما درك فاملك صايي منين زوجاتك صايي هذي هدية فقط اما الشطر الثاني فاخذه كمرجع هولتيها باطل

[رندة.]

أمك لما تخيّرلك الذهب راح تشريلك غير الحاجة المليحة والمتينة إلي تطوّل عندك. لازم تشكريها وتثيقي في خياراتها هاذي أسعد لحظاتها لما تكون تجهزلك ماتقلقيهاش وماتزعفيهاش.
ربي يوفقك ويهنّيك في زواجك

[sokalitnin]

السلام عليكم
اي اخية اعلمي انه من غير اللائق علي وعليك وعلى كل المسلمين سواءا اخوان او سلفيين الحديث عن اشخاص قضو منذ عقود وربما وضعوا ارجلهم في الجنة منذ زمن فانا ارى انه لا فائدة من ذكر اخطائهم فهم بلا شك كانت نيتهم هي نشر لا اله الا الله ربما لم يوفقوا لكن نياتهم لا غبار عليها فمن اصاب له اجران ومن اخطا له اج الاجتهاد وقد سمعت الشيخ ناصر الدين الالباني رحمه الله يستفيض في الرد عن من يكثر من تتبع عثرات السيد قطب رحمه الله وخلاصة قوله ان السيد قطب اكثر قربا الى الكتابات الادبية نعم فيها عثرات لكن الشيخ اثنى على بعض كتاباته مع تحفظه على بعض اخطائه رحمه الله لكنه لم يذكره بسوء او كفره اوبدعه فكان في كل مرة يترحم عليه.
لذلك نصيحة ملم بالموضوع اصاحب السلفيين وعائلتي سلفية واصاحب الاخوان واحب الطرفين واحب كل من يساعدني في التقرب الى لكنننننننننننم اكره كل من كل همه سب العلماء والدعاة والصالحين وتتبع زلاتهم واخطائهم وهو في نفس الوقت لا يحفظ من كتاب الله حزب واحد وهو لم يخطو في طريق التدين متر واحد سواء كان سلفي او اخوان... النصيحة لا تخوضي في امور اخطاء العلماء والدعاة والصالحين او حتى عوام القوم لان من يعرف كنه الشخص وما يدور في قلبه هو الله علام الغيوب لان امور التجريح تفرق اكثر مما تقرب تزرع العداوات وتجعلك مغترا بنفسك وتنزل نفسك منزلة الداعية وانت في الحضيض.. وفقك الله اختي
اما الجزء الاول فلا استطيع مساعدتك ارجوا من الله ان اكون وفقت في طرحي.