من جبال كسال أعرق اكلة تقليدية ... التشيشة المفلقة ... مرحبا

[أمنية غفران]

السلام عليكم و رحمة الله تعالى وبركاته

كيف الحال و الأحوال و الصحة

حبيباتي يشرفني ويسعدني أني نقدم ليكم أكلة عريقة من جبال كسال ولايتي الحبيبة البيض الي هي ........ التشيشة المفلقة ..... زيدو نقطة فوق القاف ..........


..............................................
باسم الله
التشيشة المفلقة هي من الأكلات التقليدية الي تقدم في جميع المناسبات كيما الختانات و تاني تقدم في حفل حنة العروس تقدم في اخر الحفل يعني يختمو بيها حفل الحنة و تقدم مرفقة مع الدهان الحر الغنمي امممم يعني تكون مشربة الدهان مليح مليح اممممممممم و هاد التشيشة هي قمح مطحون خشين ماشي رقيق تقدري تكون حبة القمح مقسمة على ثلاث ههههه شوفو الصورة رقم واحد و لكم ان تتصورو قيمتها قمح مئة بالمئة و بأليافه المفيدة للمعدة من غير اضافات كيميائية يا سلام

بين قوسين البنات الي يعرفو التشيشة واكيد يتهربو من طيابها كيما كنت انا هههههههه لأنها تحب الدقة في الطهي
جبتها لكم بطريقة مبسطة و ما تشدش ليكم اليد في الطياب مع هاد الطريقة الناجحة ماريحاش تخافي من طياب التشيشة و لا تخافي تنحرق لك احم احم

الطريقة

نقيتها هاداك القمح و غسلتها ثلاث مرات لازم هاد الخطوة راهي مهمة حتى تنقات مليح و فورتها تفويرة الأولى و الثانية درتلها الملح
و من جهة اخرى
درت البصل و شحم هداك مطيباته و رابيت الطوماطيش و درت ورقة رند وكليلة و حرور و الملح و كلشي قليته و زدتله تشيشة و قلبتهم مع بعض و درت الما حتى تغطى شويا التشيشة شوفي الصورة و نذوقو الملح ادا خاصها نزيدلها و اغلقت الكوكوطا كي تبدا تصفر تنقص النار في حدها عشرين دقيقة و تكون التشيشة المفلقة واجدة و بصحتكم

استيس

تقدري تكونجلي التشيشة و هي فايرة و كي تسحقيها دريلها البصل و الشحم و قاع واش درنا و تجي روعة و هاكة تربحي الوقت
..........................

و تفضلو الصور حبيباتي توضح الطريقة و نتمنى تجربوها بهاد الطريقة و تعجبكم و تدعولنا بظهر الغيب ليا و لعائلتي نتاع البيض























تفضلن الوصفة في صورة للاحتفاظ بها



في أمان و حفظ الرحمان