قصة نجااح

[pérah tova]

معدل 15.50 بعد عناء بكالوريتين بالنسبة ليا فشلت فيهم
( في اليسي كنت من الناس لي تجيب 11 و 12 و باك 2015 جبت 12.50 و 2016 جبت 13.93 )مع اني متأكدة بلي معدلي كان اكثر من 15.50بصح الحمدلله المهم نبداو :
اول حاجة لازم تآمن بروحك و بقدراتك و تقرى بذكاء و بأقل مجهود ماشي تقرى 10 سوايع و انت ماتهز في والو قدر قيمة الوقت ما تضيعش وقتك في حوايج تافهة ..و نهار تحس روحك فشلت مش قادر تقرى روح اقرى تجارب ناس نجحت و وصلت وين حابة ثما تفز وحدك وحدك و تقرى
اهم المراجع لي اعتمدت عليها هذا العام و اول خطرة نجربهم و حمدلله خرجو عليا
الرياضيات : اعتمد على سلاسل استاذك في الدعم + التمارين المقترحة لاستاذ نور الدين صدقوني قمة و يتعاودو في الباك هذا العام تعاودت متتالية حلها استاذ نور الدين و تمرين الاعداد المركبة ثاني+ سلاسل استاذ مصطفاي عبد العزيز قمة و راهم مع الحل تاعهم قدرت بهذه المراجع و الطريقة ما نهبطش من 18/20 في الرياضيات الحمدلله
الفيزياء : فيديوات استاذ عمار مولاي اكتب معاه و افهم + سلاسل استاذ شريفي قمة تلقي السلاسل في لاباج فيسبوك فتحوها تلاميذ يقراو عندو و الحل راهو في اليوتوب + سلاسل استاذك في الدعم التمرين لي تحلوه ارجع للدار عاود افتحو باش تهز الفكرة مليح و اذا تحب زيد حل بكالوريات عن تجربة صدقوني والله في الليسي ما كنت نجيب فوق العشرة في الفيزياء و في الباك من 13 ما نزيدش هذا العام كي تبعت هاذي الطريقة تحصلت على 17.5 الحمدلله
العلوم : اعتمدت على الكتاب المدرسي و الكراس النشاطات تاع الكتاب تعاود تفتحو و تشوف في الكراس الاستاذ كيفاش جاوب على اسئلة النشاط + تمارين استاذ احمد بوراليش قمة صدقوني و زيد يتعاودو في الباك + تمارسن احمد امين خليفة خاصة وحدة المشابك و المناعة تركيب ضوئي و تنفس + بكالوريات باش تهز المنهجية مليح .. طول عمري نتبع هذي الطرق ما نهبطش تحت 15 في العلوم هذا العام حقروني 14 في العلوم مع اني متأكدة مش نقطتي بالصح الحمدلله المهم تبعو هذي الطريقة و هاذو المراجع هاو وجهي اذا ما جبتوش فوق 15 في العلوم بإذن الله
اللغة العربية : شوفي اللغة العربية نحسب روحي مانيش عربية في الليسي ما كنتش نجيب فيها فوق العشرة و في الباك في 2015 قالولي خيري الشعر تجيبي فيه مليح يمدو عليه درت الشعر مدولي 10 عام 2016 قالولي لالا النثر يمدو عليه ديري نثر ايا درت النثر و زدت جبت 10 الوغ العام هذا قريت الادب من الاول و ركزت عليها خاطر الحلوفة معامل 3 تلعب بالمعدل لعب مالا شديت البكالوريات كامل حليتهم و طبعا ركزت كثر على النثر بصح مام الشعر ما حقرتوش حفظت مفهوم الالتزام و تقنية التليخص و اسلوب كل شاعر مي ما حليتش بكالوريات تاع الشعر مي النث حليتهم كامل و عاودتهم شحال من خطرا المهم جا نها الباك تحط السوجي قدامي قريت النثر و زدت قريت الشعر قلت نريسكي و ندير شعر عحبني و كان ساهل و الحمدلله جبت 16.5 في الادب مالا نقلكن واحد ما يكذب عليك و يقلك النثر سهل و لا الشعر سهل تعتمد على فهمك للموضوع و تبعو الطريقة و افتحو البكالوريات كامل و قبل ما تحلهم اقرى كاش ملخص و خاص بالشعبة العلمية باش ما يكونش زايد فيه حوايج ممكن تعقدك و بالتوفيق بإذن الله ما تديش تحت 15 في الادب
الفرنسية : خلينا منها خاطيني لغات هلكتها مي صح ما قريتهاش ما حليت حتى بكالوريا قريت شويا ملخصات و حفظت compte rendu هذا مكان و رحت لبزتها و خرجت قلت ما نجيبش فوق 5 لقيتها 09 المهم الفرنسية ننصحكم افتحو بكالوريات و لي ناقصين ياااس في اللغات نقلكم اقراو قصاصات روايات حكايات جرنال بالفخونسي و الكلمة لي متفهماش شد ترادكسيون تع قوقل و ترجم تهز شويا كلمات مام في البكالوريات الكلمة لي ما تفهماش ترجمها رح تلقى روحك مع الوقت وليت تفهم النص و تقدر تسلكها ان شاء الله بهذه الطريقة تقدر تظمن فوق 12 في الفرنسية
الانجليزية : كنت فيها لا علاقة كي نقلكم لا علاقة يعني والووو تقلي هاو آر يو نقلك جيعانة باك 2015 جبت فيها 5.5 باك 2016 جبت فيها 10 المهم هذا العام عولت عليها و قلت لازم نجيب فيها حتى 12 تعاوني حكمت البكالوريات كامل حطيتهم قدامي و اليوتوب لقيت قنوات من ناس مصريين دايرين دروس تعليم انجليزية من الاول بديت نتبع و نشوف المهم بشوية لقيت روحي نحسنت و مبعد رحت للازمنة ما كنت نعرف والو تعلمتهم هوما اهم حاجة باش تقدر تقرى القواعد و مبعد رحت للقواعد لمقررة علينا فهمتهم مليح و كاين اساتذة و تلاميذ حاطين كل وحدة كلماتها لي تتعاود في النص المهم حفظتهم و بديت في البكالوريات حليتهم كاااامل من 2008 الى 2016 نهار البام لقيت روحي فاهمة النص كي شغل لغة عربية والله العظيم و الحمدلله خدمت الفقرة و جبت فيها هذا العام 13.5 ما كنتش قاع نحلم نجيب هكا في الانجليزية هذي للناس لي تعبانة ياسر في اللغات كيما حالتي
الشريعة : احفظو و افهمو مي كثرتها حفاظة عادي يعني المهم انا عندي ملخص مدهولنا استاذ في الليسي صدقوني عام 2015 ما حفظتش منو جبت 14 في الشريعة مي 2016 حفظت منو غير السمانة الاخيرة جبت في الشريعة 17 في 2017 جبت 19 في الشريعة الحمدلله المهم ملخصات الاساتذة كامل ملاح ما نقلل من حتى استاذ اشريعة ساهلة و كادو لينا
الاجتماعيات : هاذي مرضتني قد ما نحفظها والو كي نطلع و نطير نجيب فيها 13 مالا هاذا العام قلت الناس كامل تشكر في محمودي عادل مالا نشريه و نجربو و الله صدقوني قمة قبل ما تحفظ تلقى روحك فاهم ما يخلعوكش يقولولك طويل احفظ من كل عنوان 4 و لا 5 نقاط برك خاطر كاين عناوين فيها 10 نقاط و كاين ملخصات ثاني ضربت طلة عليهم يعني بالمختصر اعتمدو على لحفاظة و لفهامة لاني انا وحدة من الناس جرت حفاظة برك ما خرجتش عليا و الحمدلله هذا العام جبت فيها 16.5
الفلسفة : والله نعرف روحي نجيب فيها ديما فوق المعدل جامي جبت تحت 10 مي هذا العام داروها بينا التوقعات و المقترحات ايا درت تحليل نص و عمري ما درتو حتى المنهحية ما نعرفهاش المهم جبت فيها 9.5 بح نقلك الفلسفة مش حفاظة افهمو المقالة هز المقالو اقراها قراية نورمال و القراءة الثانية ركز فيها كتر و هز اهم النقاط هذوك النقاط لي تحفظهم باش مبعد في الباك تتوسع فيهم و احفظ على الاكثر 3 مقولات تاع فلاسفة و نصيحة لكم عمركم ما تتكلو على المقترحات غير خرطي