السلام خواتاتي
اليوم حبيت نشارك معاكم مغامراتي مع مقروط لي اوّل مرة في حياتي نجربو
الحمد لله خرج شباب و بنييييييييييييييييييييييييين وربي شاهد على ما أقول
نجوزو بدون اطالة للوصفة
الطريقة :
العسيلة :
اول حاجة توجديها من الاحسن هي العسيلة باش تكون باردة
اذا راكي رايحة ديري كمية كبيرة مثلا 1 كلغ سميد راح تحتاجي الى
في كسرونة حطي 1 كلغ سكر كيليه في طاسة باش تعرفي شحال من كيلة ماء تضيفيها لي راح تكون ضعف كمية السكر
انا مثلا جاتني 3 كيلات سكر و 6 كيلات ماء
زيدي عليها عصير نص حبة ليمون + عود قرفة
و حطيه فوق النار
ملاحظة : العسيلة ما تتحركش بمغرف حطب لازم تكون مغرف لي ناكلو بيها باش ما تقراصش و باش ما تتسكرش
المهم احكمي المغرف لي ناكلو بيها و مرة على مرة حركي السكر حتى يذوب كامل في الماء
باش تعرفي بلي وجدت العسيلة لازم تشوفي انو الكمية لي حطيتيها ولات نص
او احكمي المغرف و كي تخرجيها جوزي بصباعك و شوفي اذا عاقدة شوية
لازم ما تكونش عاقدة كيما العسل تاع النونورس لي نشروها و ما تكونش كيما السيرو
تنبيه : كاين بزاف لي يديرو كاراميل من بعد يزيدو السكر انا ننصحكم ديرو هاذي الطريقة
لماذا؟
خاطش كان ديرو طريقة الكاراميل راح حلوياتكم تجي كاااااااااامل بنفس النكهة و تجي تقهم الخاطر
التمر :
انا راكم كامل عرفتو واش صرالي مع التمر و كيفاش باصيت مع العلف ديالو لكن راهي قاتلي اختي امينة غفران ربي يخليها انو كاين نوع يتباع ب 150دج بدون علف استعمال فوري
المهم انا بعد ما نقيتو من العلف درتو يفور زوج تفويرات الاولى من بعد نحيت هذاك الماء و عاودتلو ماء نقي و زيد فورتو
كي نحيتو من الكيكاس حطيتو في اناء
ضفت عليه سمن مدينة + ملعقة زيت عادي + قرفة و خلطت مليح
من بعد ضفت ماء الزهر
و هذا هو سر انو التمر يبقى طري كي تضيفي ماء الزهر ليه
عاودي خلطي مليح بحيث تزيدي تتأكدي انو مكاش علف
شكلي حرابش طوال و يكونو بعرض 2 سم و خليهم يرتاحو غطيهم بالفيلم الغذائي بعد ما يبردو تماما باش ما يعرقوش اذا كانو سخونين
العجينة :
1 كلغ سميد متوسط من النوع الرفيع او الممتاز سفينة انا جاتني 3 كيلات
1 كيلة سميد رقيق بزاف تاع المطلوع
نصف كيلة فرينة
تنبيه : ما تنساوش تغربلو خواتاتي كامل المكونات طبعا هاذي العفسة كامل تعرفوها لكن حبيت نفكركم انو قاعدة الحلويات هي التغربيل
ملح
خلطي بيدك كامل الحاجات الناشفة هاذو
من جهة اخرى وجدي
1 كيلة سمن مدينة ذايب و بارد
نصف كيلة زيت عادي
ضيفيها للسميد و خلطي حتى تدخل مليح في السميد
بعدها خليه هكذاك مبعثر و غطيه خليه يبات غدوة منذاك ان شاء الله استعمليه
في يوم الغد
احكمي السميد لي بات ضيفيلو نصف كيس خميرة حلويات و 2 اكياس سكر فانيليا
1 كيلة ماء مخلط مع ماء الزهر + بياض حبة بيض خلطيهم حتى يتجانسو
رشي السميد و ما ديريش كامل الكيلة ضربة وحدة
و قطعيه يعني ما تعجنيش ديري حركة كيما انك تقطعي في حاجة
و مرة على مرة شوفي اذا تشكلت معاك العجينة لي نحتاجوها للمقروط
بعدها اجمعي العجينة في جهة و خليها ترتاح 2 ساعة
بعدها راح تنشف شوية كيما حصل معايا و اذا ما نشفتلكش حسنا خليها
لكن انا نشفت شوية زدتلها ماء الزهر حتى عاودت ولات كيما نستحقها
طريقة تشكيل الحبات قبل القلي :
احكمي كمية من العجينة حطيها على فيلم غذائي
هذا هو سر التشكيلة السهلة و بدون معانات
و شكلي حربوش بعرض 5 سم و ارتفاع 3 سم و طول كيما تحبي انا درت 20 سم باش نزرب
الان عبزيه من الفوق باش تبسطيه شوية
من بعد بصبعك الصغير تاع يدك عبزي في وسط الحربوش باش تحطي التمر
من بعد شكلي حربوش التمر رجعيه 1 سم او 1.5 سم باش يبان مليح في المقروط ماشي يولي غير سميد
حطيه في الوسط و اغلقي العجينة بحيث ما يوليش كامل يبان التمر
من بعد اغلقي على الحربوش بالفيلم الغذائي و بداي ديري حركة الحلاّل باش تتجمع مليح
و من بعد شدي طرف الايمن تاع الفيلم و بيدك اليسرى شكلي المستطيل بصباعك الاول و الثاني تاع يدك بحيث يولي فيه عرض 2 سم فقط و ارتفاع 2 سم ايضا
و من بعد حلي الفيلم و حاولي تنحي الحربوش من فوق الفيلم بدون ما تخسري الشكل باش تقطعيه
لوكان تخليه فوق الفيلم راح يتقطع و راح تضطري تعاودي تستعملي فيل اخر
قطعي الحبات متساويين و شكليهم شكل لي حبيتي
طريقة القلي :
في مقلة عميقة حطي الزيت كي تسخن مليح نقسيلها كامل و ارمي المقروط يطيب
و اذا شفتي روحك انو مازال ما شكلتيش حبات للقلي من الاحسن طفيه
هكذا الزيت ما يتحرقش في باطل و يطلق ريحة ماشي شابة
و حتى طعم المقروط يتبدل
كي تتقلى الحبة و تولي لون شباب اجبديها و حطيها على طول في العسيلة لي تكون باردة بزااااااااف ما تكونش سخونة و ما تكونش دافية
و خلي المقروط فيحا حتى يوجدو الحبات لي راهم يتقلاو
خرجيهم و حطيهم في كسكاس يقطرو
حتى يوجدو الحبات لي راهم يتقلاو حطي الحبات لي راهم فالكسكاس في les caissettes
في الاخير نشكر كل وحدة عاونتني باش درت المقروط
اختي الغالية و خواتاتي في المنتدى أم رحاب، حياة نور الدين ،امينة غفران، و انا هي رزيقة، و سحابة باردة ،و fleur de lili.
لبنات صح فطوركم
حبيت نقوللكم انو رانا فتحنا قناة يوتيوب اسمها zokhrofa officiel
و راح نديرو مسابقة رمضانية غدا السبت 24 جوان 2017 على الساعة 11 و 30 دقيقة ليلا
شوفو الفيديو لي في القناة لتفاصيل اكثر
الهدية عبارة عن 100دج رصيد لتعبئة خط هاتفك النقال عن طريق رقم بطاقة تعبئة
كونو في الموعد
( تقرير عن مشاركة سيئة )، و الموجودة أسفل كل مشاركة .
2017-06-18, 22:38
مقروط مقلي معسل ........... بطريقة مميّزة ........... زُخْرُفَةٌ
العرض العادي
