مشكلتي مع اهلي

[مشكلتي]

اهلي يحرجونني امام زوجي في ابسط الامور..مثلا عندما اريد السفر لا يوصلني احد الى محطة المسافرين بحكم عمل زوجي انه لا يستطيع ايصالي...و اخبره كل مرة بعذر ابي متعب..يعمل..كان خارجا عندما خرجت من البيت..حتى عند وصولي لا يستقبلني احد..عند استخراج وثائقي يطلب مني زوجي ان اطلب ذلك من اخي حتى لا ازاحم الرجال في البلدية لكنه لا يعلم انني حتى لوكنت مريضة لا احد يكلف نفسه عناء شراء الدواء..اذهب بنفسي.. و يحتار في امر اهلي..انا ماكثة لديهم منذ مدة بسبب عمله و ظروف..

ليس هذا فقط..عندما ياتي زوجي الى البيت اخبر اهلي بذلك ليتم التخلص من الفوضى التي في البيت..فوضى عارمة و روائح فقط لابقي الصورة الحسنة لاهلي..

لكن في اخر مرة كان عندي دراسة لنصف يوم و زوجي يصل بعد الغداء..اخبرت امي بمجيء زوجي و كانت مريضة ...عندما عدت لم اصدق منظر البيت..دخلت في نوبة بكاء.. اخبرتني انها مريضة اجبتها انه كان عليها طلب ذلك من اخواتي..و لكنها لم تربنا على شيء ..لا على نظافة ولا على اعمال البيت...تعلمت كل ذلك في بيت الزوجية بالطريقة الصعبة بعد ان تعرضت لمواقف كثيرة..

اخبرت اني ان بيتهم نظيف جدا حتى عندما ازورهم فجاة و ان زوجة اخوه كلما جاءت تقوم بدعوة زوجها الى بيتهم و انا احيانا اتجنب مجيئه لكي لا احرجهم

بعدها امي غضبت و اخذت كلامي على انني اخجل بهم ولم يكن ذلك قصدي..ثم طلبت مني ان احزم اغراضي و التحق به و ان لا ازورها مطلقا لا انا و لا زوجي بسبب المشاكل التي اسببها لها" الحرص على نظافة البيت"..

و صار مسلسل اكبر منو مع ابي بتحريض من امي ...

و هي لا تكلمني منذ شهر ولازلت عندهم فالظروف لا تسمح لي بالانتقال الى زوجي بعد

[ريان 7]

يا الأخت أهلك زوجوك مش بش تتضاعف مسؤوليتك عليهم , يديوك ويجيبوك ويخدموك , راه دورك نتي تقومي بيهم نورمالمون وإذا كان زوجك غايب هذيك مشكلتو هو ,صحيح الاهل بنتهم تبقى بنتهم و يتهلاو فيها بصح كي تفوت تتزوج الجزء الأكبر من مسؤوليتها يقع على عاتق الزوج.و كيما التمستي العذر لزوجك بحجة السفر زيدي التمسي العذر لباباك لي رباك و كبرك وزوجك .....

راكي تحكي شغل خلاص نتي موليتيش تمثلي عائلتك راكي تحكي غير باسمك و باسم زوجك على أساس القذارة لي في دار والديك ماكانتش كي كنتي عايشة فيها قبل زواجك لأنو على حد كلامك بيتكم من يوم يومو قذر , يعني بكري تجيك نورمال تعيشي في القذارة وضك كي تزوجتي على جال بش تحسني صورتك قدام راجلك فقط حابة الدار تتنظف و هي نورمالمون تحشمي بيها قدام روحك وقدام عايلتك مش غير قدام راجلك, و ديجا علاش تطلبي منهم ينظفو نظفي نتي اسيدي .

وإذا راكي عايشة عند أهلك نتي وراجلك وبعقليتك هذي احمدي ربي لي راهم حاملينكم في زوج هوما زوجوك بش تأسسي عايلة و يرتاحوا من مسؤوليتك ولو بجزء بسيط مش بش تزيدي تبركي فوقهم نتي و راجلك (حتى لو لفترة) و زيد ماشي عاجبك الحال.

و زيد ماشي يماك لي تربيكم على النظافة راكم كبار ربيو رواحكم نتوما عليها و كي تحبي حاجة شمري على ذرعيك مشي تطلبي من ناس علبالك هكا عايشين طول حياتهم ونتي معاهم و تتوقعي يتغيرو على جالك نتي وتزيدي تشكي .

وأخيرا جامي تقومي براجلك على حساب عايلتك , عايلتك أولا ومنبعد يجي راجلك ومتنسايش راكي منهم و فيهم قبل ماتكوني مرتو و القذارة لي في داركم مشي تمسحيها فيهم قدام راجلك راكم كل في الدار مسؤولين عليها منك وروح .

[الرميصاءْ]

انا تبالي راكي غالطة والمفروض اهلك يطرحو المشكل هنا باه يتخلصو من مشاكل تاعك وتاع زوجك
زوجوك باه تتهلاي في روحك وتتحملي مسؤوليتك زادو حصلو فيك وفي راجلك
وزايدة تشكي منهم وتعايري فيهم وتشكري في راجلك
روحي انعلي الشيطان وراضي والديك واذا ماعجباتكش حاجة غيريها نتي ميشي خواتاتك ولا والديك خدامين عندك واذا ميشي عاجبينك ماترحيلهمش
الوالدين مايتعوضوش ديريهم في عينيك وقليل عليهم

[أناييس الربيع]

انت تزوجت وزدت حصلتي في داركم
وكون جيتي فحلة ترتبي وتنظفي وحدك مدامك في هذيك الدار ملزمة باه تخدمي شغلك
وانا ثانية عاملة والليل ما اطوله أقوم بكل الاعمال المنزلية لوحدي
ومانتكلش على حتى واحد
وتزيدي تقولي ماما معلمتنيش ياوسمك كلش قدامك
ولا معجبكش الحال روحك لدارك

[أثيلة]

السلام عليكم و رحمة الله و بركاته
أختي ماتكبريش المشكلة لهذه الدرجة عادي الأم مريضة و اخواتك مش مسؤولين عليك و نظن انو انتي صح راجلك يسكن بعيد كون بقيتي في دارك مش منين هو بعيد تروحي لدار باباك مهما يكون ابقاي مع دار حماك ولا دارك ولو وحدك هادي هي
و بالنسبة للي ردو و قالو انو قذارة و بيتكم قر و من بكري عايشين فالقذارة نقول هداكم الله لا يجب الحديث بهذ الموصف و الكلمة هذه بالضبط ربما هي تقصد انو الااشاء ليست في مكانها المناسب و الرائحة لا يخفى على احد انو في كل صباح تكون رائحة البيت غريبة بعض الشيء بسبب النوم و الابواب المغلقة و قلة الاكسجين الذي تم استهلاكه كله و الابواب مقفلة
و تاني هي حسب كلامها تقرا ممكن بلاصة لي تقرا فيها قريبة لدارهم عادي و نورمال البنت تبقى مع دار والديها ادا كان راجلها بعيد و مايحبش يخليها وحدها و في دار حماها مش متاقلمة و تاني عجوزة ماتقبل تتخدم على عروستها و هي تقرى لها لازم دار والديها هوما يفهمو ظروفها

[sohaibdz]

حشمانة بداركم؟؟؟؟ وزيد شهر مهدرتيش مع امك ؟؟!!! الله يهديك

[قدور بن عاشور]

والله غير عيب عليك،
أنت باينة عاقة و نكارة خير الوالدين، غير روحي اطلبي السماح من أمك

[عثمان الجزائري.]

أعتذر منك أختي، كيف لم تفيقي بأن هناك فوضى و عدم إهتمام بنظافة البيت إلا بعد أن تزوجت!!!!!!!؟ الكارثة هذه لم أسمع بها في حياتي بيت فيه أكثر من ثلاثة نساء و يكون بهذه الحالة، أمك مريضة فأين أنتم، ثم زوجك لماذا يأتي لبيتك يمكنك ملاقاته خارجا إذا كان بينكما عقد شرعي و آخر مدني، القضية أنك تحسين بأن طريقة تربية زوجك غير طريقة تربيتك في بيتك و ذلك فضل الله يؤتيه من يشاء، إذا عجبتك تربية زوجك في منزله ديري كيفوا و إبدئي بنفسك، حاولي أن تقدمي يد المساعدة للأهلك و إنصحي أخواتك، و لا تكسبي بغض عائلتك فالدنيا تدور و لا تدري متى ستحتاجين إليهم، خجلك من زوجك لرؤية بيتكم في حالة فوضى علقيه دائما بمرض أمك و عدم إهتمام أخواتك، مع أني أرى أنه ليس للرجل زيارة بيت الزوجة كما يفعل خطيبك، قولوا يتقل رجلوا باه يبقى عزيز، قضية الأوراق أين أبوك من هذا كله؟ سبحان الله ليس معنى أنك تزوجت يعني خلاص ما يتهلاش فيك، أختي راجعوا الحنان و العطف في عائلتكم و إياك أن تنقلي هذه المظاهر إلى بيت الزوجية

[زبدة ذايبة]

هذا حق مارباوك وعلموك وقراوك وتعبوا عليك !!!!!!!!!!!!!!!!!!!!!!

ضرك داركم ولاو ناس مايساووش ومايصلحوش ؟؟؟؟؟؟؟؟

تزوجتي الله يبارك ودرتي الدار ، ولا عندك الراجل عادو داركم مايصلحوش ؟؟؟؟؟؟؟!!!!!!!!!!!!!!!!!!

وناس مايعرفوش الواجب !!!!!!!!!!!!!!!! وناس ماشي نظاف ؟؟؟؟؟؟

وش هذا !!!!!!!!!!!!!!!!!

هذا حق الخير اللي داروه فيك !!!!!!!!!!!!!!!!!!!

وكي تكون دار باباك في براكة وبيت قصديري ماتحشميش بيهم

حتى ولاكانوا مايعرفوش الأصول كنتي تلقايلهم العذر

تزوجتي وظهر لك ظرك دار باباك فايحين وماشي نظاف ومايعرفوش يطيبوا

ودار راجلك ناس نظاف وروايحهم هايلة !!!!!!!!!!!!!!!!!!!!!!!!!!

مهما كانت الحالة اللي فيها دار باباك مهما كانت من المفروض كنتي ماتتصرفيش بالطريقة اللي تصرفتي بيها

جرحتي يماك وباباك بتصرفاتك

وليتي تحشمي بيهم، على خاطر مازال ماوصلوش للمستوى اللي راهم فيه ناس دارك

عندها الحق يماك وش دارت معاك تستاهلي لعل يرجع عقلك ليك

كي تولي انتيا بنتهم ديريلهم هكذا غدوة راجلك وش يدير

تحقريهم يحقرك هو ويعفسلك على راسك ويعايرك بيهم ماشي على خاطر هوما ناس مايعرفوش ولا فوضويين

يحقرك ويعايرك لأنك انت اسمحتي بهذ الإهانة وأعطيتيلوا منفذ يهينك من خلاله يولي كل يوم يقولك داركم فوضى ناس مايعرفوش

عاودي ولي لعقلك وصححي تفكيرك

أنا لو كان جيتي اختي كنت نتصرف نفس التصرف اللي تصرفاتوا أمك

داروكك امرأة قابلة للزواج ، واليوم جيتي تكتبي تستعري منهم وتحشمي بيهم قدام راجلك

وفوق هذا حابة ديري باباك وخاوتك خدامين عند راجلك

هو يقعد في دارهم يتكسل وخوك وبابك يجروا بيك في البلدية وفي المارشيات !!!!!!!!!!!!!!!!!!!

دارو مليح معاك كي تصرفوا هكذا وقليل عليك

أنا قريت وش كتبتي برك تقلقت ياوين والديك وخاوتك سمعوك تسبي فيهم وتبكي !!!!!!!!!!!!!!!

حطي رجليك في الارض تزوجتي قلتي دارنا يخدموني ويخدموا راجلي

ويستقبلوني في المحطات !!!!!!!!!!!!!!!!!!!!!!!!!!!!!!!

ويدوني ويجيبوني !!!!!!!!!!!!!!!!!!!!!!!!!!!!!!!!!!!

وا ش هذا خدامين عندك ؟؟؟؟؟؟ يعطولوا المرأة ويزيدولوا الرجال !!!!!!!!!!!!!!!!!

راجلك خلاك واطمعتي في باباك الشيخ لكبير

كنتي تقولي لراجلك النهار الأول خاوتي مشغولين وبابا مايقدرش يديني ويجيبني

كاين غير انت اللي لازم دير هذا الشي

ماتحصليش داركم وفوق هذا تزيدي تسبيهم

خساااااارة الواحد يربي ومايعرفش وش يخرجلوا من الذرية

كاين بزاف بنات شفتهم بنفس عقليتك

كي تزوجوا ظهرلهم الأم ماعلمتلهم والو ، والأب مايعرفش يصرف

والخاوة مايصلحوش

والزوج هايل ، يماه تولي تسلملها على راسها كل صباح

وباباه نفس الشي

وكي تروح لدارهم تشوف والديها وخاوتها تبدى في الحساب وفي النقد باش تأكدلهم أنهم ناس متخلفين وجاهلين ومايعرفوش

زوجوكم والديكم ظهر العقوق تاعكم

لاحول ولاقوة إلا بالله

الله يهديك

[صُبح الأندلس]

أنت الآن مسؤولة من زوجك و كثر خير أهلك أنهم معيشينك عندهم و ربما يصرفون عليك و حسب قصتك أنت تدرسين يعني لا تفعلين شيئا و هو ينظفون و يطبخون ووو و أنت متزوجة ؟؟
و كيف تكلمين أمك بتلك الطريقة ؟
والله لا أجد ما أقوله أكثر

[salamsi]

!!! الله يهديك

[غزلانْ]

البيت الذي لم يعجبك يبقى له الفضل فقد أواك
عِوض أن تشكري أهلك تطالبيهم بخدمة زوجك اذ أنت الأولى بخدمته
و ان كنتِ تدرسين فهذا ليس عذراا اطلاقاا فلتحسني النية و لتساهمي
في تنظيف البيت و اجعليه و كأنه بيتك لو كنتِ في بيت زوجك مع أهله
لعرفت قيمة النعمة التي أنت فيها و لم تقدريها حتى اذ يُفرض عليك و تُؤمرين و تنفدين .كلامك كله
عن لوم عائلتك ويجب عليهم كذا و كذا.. نسيتي أنك متزوجة فتزوجتِ لتتحملي مسؤولية بدورك مع زوج هو مسؤول عنك و عن مطالبك
لا لتُلقي بها على عائلتك جعلتِ من زوجك ضمير مستتر فلتجعليه يشاركك حياتك
بكل ما تحمل لا لتحمليها على عائلتك الزواج تحمّل مسؤولية لا لتحميلها
الأفضل لك ان تجازي عائلتك عن وقفتهم معك و لتلتحقي للعيش مع زوجك مهما كانت
ظروفه لأنك متزوجة

[محمد جديدي التبسي]

أفهم مشكلتك تماما أختي فأنا أعيش في بيت ربما أسوأ من بيتكم
لا أفهم كيف لم يفهمك أكثر من شارك هنا وكأنهم لا يعرفون الفقر وكلهم عايشين في بيوت واسعة ومنظمة؟؟
لا يعرفون السكن الفوضاوي وبيت فيه غرفتين لعشرة أفراد مثلا
أنت هاذم أهلك وهذه ظروفك ما تحشميش بروحك لأن كل واحد منا لم يختر اهله بل عليه أن يحمد الله أن له والدين وإخوة وبيت يأوي إليه ولو كان كوخ
بما أنك متزوجة اذهبي مع زوجك او اسكني مع أهله وأسرعي بمصالحة أمك واطلبي رضاها.
ربي يفتح عليك

[سَامِيَة]

أختي أول حاجة يلزمك ديريها...روحي راضي أمك.....أمك عرفتيها قبل راجلك ...كيفاش قادرة تاكلي وترقدي...وعندك شهر متكلميهاش....دعوة الشر راها واعرة بزاف تقلبلك حياتك فوق تحت....طيري ولا تنزلي ويا لوكان تتزوجي ملياردير...ولا تقطعي البحور. ..عمرك ولا تخسري مع داركم...هوما الأصل في كل شي....قادر تتزوجي ولا قدر الله تواجهي مشاكل ويكتبلك ربي وتعاودي ترجعي لداركم بحلوها ومرها مالا من الأحسن تخلي بلاصتك نقية.

[jirardo]

باينة عليك ثقلت بزاف على أهلك
أهل زوجك وينهم