ام زوجي

[مشكلتي]

السلام عليكم ورحمة الله وبركاته مشكلتي انا ملتزمه جدا واحافظ على صلاواتي و أقيم جميع العبادات متزوجه من رجل ملترم ايضاً مشكلتي هي أم زوجي تتدخل في كل أمور حياتي انا اسكن في بيتي القريب من بيت أهل زوجي أمه ادا كنت سعيده تسأل عن سبب سعادتي وادا كنت حزينه لا تسأل اخبرت زوجي بتطفلها علينا أخبرني انه سيجد حلاً لكن لم يجد حلاً بعد أمه تزورني في أسبوع مرتين لا أحب رؤيتها تدعي أنها تحبني وأنا لا أشعر بدلك لا أحب أن يقوم زوجي بتدليلها أشعر أنها تتعمد دلك كي تقهرني مادا افعل واش ندير تعبت جدا من هته الحاله

[ايمان4]

يعني دركا رجعتوا تغيروا من الامهات تزورك مرتين عادي ماشي بزااف قومي بيها يا خي راها امه و لا هو مليح و امه مشي مليحة ؟ هو مدابيك عليه و هي ترمي روحها ف البحر ؟؟
علاه هاكا علاه ؟ اذا كانت تدير فالمنكر صحا ما ننكروش كاين لي تدير المنكر في نسا اولادها بالصح عادي على ما يظهرلي على حساب ما حكيتي انت ما اذاتكش ولدها يدللها و ان لي راجلك مراهش مدللك اكيد نعم و انت بلاك موسوسة .....
مين راكي متدينة كما راكي تحكي ابغي الخير للناس كما تبغيه لروحك و احسني الظن بالناس
ما يسقسيوش تقولو ما تبغيش ولدها يسقسو عاود علاش تجي اتزوجتي بيه يا اختي ما املكتيهش منيش عارفة عقليتكم و الله
الله يهدينا و يهديني اذا كنت غالطة لطريق الحق السماح بيناتنا ايلا غلطت ف حقك يا اختي انا ما نعرفك ما نحوس نتهمك

[ع.عيسى]

ملتزمة جدا ومحافظة على صلاتك وتقيمين العبادات ، ولا تحترمين ام زوجك ؟؟؟؟؟؟؟ هناك نساء غير ملتزمات وغير محافظات على صلواتهم ولا يقمن العبادات ولكن صابرين على اذى كبير من طرف ام الزوج واهل الزوج ، وانت ابيتها الملتزمة مجرد ام زوجك من النوع الفضولي و فوقها تقولك بلي راهي تحبك اسودت الدنيا عليك ولا تريدينها زبارة بيت ابنها ، والادهى من ذلك لا تربدين من زوجك ان يدلل امه ؟؟؟ واش تحوسي ايتها المسلمة الملتزمة ، تحوسي زوجك بقطع صلة الرحم مع امه او ان يطردها من البيت او ان يكون عاق ، او ماذا ؟؟؟ راكي غالطة ، اذا كنت دارية في بالك بلي زوجك راه يتخلى على امه على جالك راكي غالطة ، واذا كنت حابة ولي راجلك عاق لامه روحي عاودي اقراي على الدين الاسلامي وعلى اخلاق التي يجب ان يتحلى بها المسلم ،

[hanan7]

لا يجب عليك ان تنزعجتي من أم زوجك .. وبكره مصيرك تكوني ام وكنتك راح تتضايق منك زي ما انتي مضايقه من حماتك .. اتقي الله فيها.. ليش بتغاري منها هاي امو ولازم يعاملها أحسن من معاملتك انتي .. اوعك تقارني حالك بأمو لأنك راح تطلعي خسرانه .. نصيحه لوجه الله ..اتقبلي أسئلة امو عنك وحاولي تحتويها لوجه الله تعالى .. الله يهدينا ويهديكي يارب

[ام رضوان]

يالطييييييف اليوم طلعلي الضغط
هذا وين كنت نقرى في مشكلة وجعتلي قلبي
وتاعك ذرك طلعتلي الضغط
تصلي وتقومي بجميع العبادات وتكرهي ام زوجك اللي كون مش هي ماراكي تتنعمي مع زوجك
والملتزم هذا اللي راكي عايشة معاه شكون الي رباتو ؟

ولا كيما يقول المثل
الدابة جيفة ومصورها حلال؟
هو مليح وعاجباتك لمعيشة معاه وامو تزورك مرتين تقلقي منها!!!!!وتكرهيها وتقلقي كي يدللها بنها
كون جات امك اللي تزورك تقلقي منها ولا لا لا
وزيد راهم تقريبا الامهات كامل يتعاملو مع زوجات ابناءهم هكذا
هاذي حاجة عادية ومرينا على اكثر من هاذ الحوايج بصح لازمك تتصرفي بحكمة وحلاوة ويقولو اللسان الحلو يرضع اللبؤة
بالحق راكي تسلميلها على راسها وتقوليلها تبارك الله فيك يااللي ربيتى وعرفتي تربي
راكي غااااااالطة يابنت الناس
والدنيا دوارة كما تدين تدان
غدوة يزيدو عندك لولاد ويكبرو ويديرو فيك كناينك كيما راكي الديري في عجوزتك
ربي يهدينا
ياااااارب ارزق ابناءنا زوجات صالحات وبناتنا ازواج صالحين اميييييييييين

[عثمان الجزائري.]

نتمنى أنو زوجك يقولك على أمك نفس الكلام و سنرى ماذا تفعلين، إذا كانت أم الإبن تتدخل مباشرة فأم الزوجة تضرب من لتحت لتحت و هذه بتلك و الكمال لله، و هي كي تجي تزور راهي تجي تزور ولدها أنتي ماهيش مشتاقة في جهك.

[ridha34]

كما تكونوا يولى عليكم.

[الداهية كيداهن]

أعجب من بعد الردود التي تتحدث عن أم الزوجة، أقول لك سيدي الشاذ يحفظ و لا يقاس عليه، ان كانت نسيبتك كذلك فأكيد لأنها لا تلاقي المعاملة التي تعاملها لأمك.

[توحيد الجزائرية]

لاحول ولاقوة إلا بالله. .
بعض الردود غير ملائمة ..
تكلمن بالحسنى ..وسلن الله العافية
على اساس انكم ملائكة ..
يا اختي ..:
كوني ذكية واكسبيها ،معليش تبين بلي تحبك انت كذلك اهتمي بها
ومادام تستفزك بمعاملة ابنها لها..استغلي ذلك وبينيلها انك سعيدة ببر زوجك لها..
للاسف حماتي ماتزورنيش لكن نزوروها نحن ..رغم انها تكره زيارتي ..
اي حماة تقول دات وليدي ..والناس طبائع وعقليات وليس لزاما ان تحبك يكفي الا تظلمك
يا ليت تحبني عجوزتي ..درتلها كل شيء وماتحبنيش ..اديتها لبيت الله وكنت انا اقود عربتها مع انها تمشي عادي غير مقعدة لكن باش نريحها ووليدها في الفندق ..لله الحمد
بعدها كان جزائي ان استثقلت زيارتي لها
الحمد لله على كل حال. .

[النجمة القطبية]

يا اختى صدقيني انا نحيييير في هدا النوع من المشاكل
يعني ماشاء الله متزوجة وانعم الله عليك بالزوج والبيت المنفرد والالتزام واللي منغص حياتك ان عجوزتك تزورك مرتين اسبوعيا او ان ابنها يدللها !!!!!!!!!!
يا اختى وين المشكل والمفروض انتى ايضا تدلليها وتتوددي اليها وتحبيها كيما تحبي ابنها
مفهمتش وراه المشكل بالضبط
فاش شكلتلك ام زوجك عائق وهي ماشي عايشة معاك وهي باب من ابواب الجنة
يعني المطلوب منك تبريها فقط وتحسني ضيافتها مرتين اسبوعيا فقط اين مشكلتك بالضبط
نتمنى منك تراجعي نفسك

[لحن الحياة.]

سقفيلاه يا ربي نسكت خير

[ياسمين تلمسان]

أم زوجك يجب عليكي احترامها اختي يجب احترامها من أجل زوجك

[أم كنزة]

اختي العزيزة هي راهي أم ومن حقها تزور بيت ابنها وانت ادا كنت أم لازم تكوني تحسي بالتعب الي حست بيه اي ام راهي تكبر وتتعب وداوي وتغسل باش تجي كنة وتقول للهاذه الام متزيديش تجي لدار ابنك
لازم يجي نهار وتزوج ابنك زوجي مرت ابنك وتحسبلك قعاد ك في بيت ابنك أتقي الله علابالي الشيطان يحضر

[حاملة المصحف]

بيت منفرد و تزورك مرتين في السمانة ... استقبليها مليح و قومي بيها كاي صيف يدخل دارك هكذا ادا هي غالطة في حقك تراجع نفسها
في نهاية الامر رح تروح لدارها نتي تريحي في دارك و ادعي ربي يهديها

[زبدة ذايبة]

غيورات في زوج

انت أولا

وعجوزتك ثانيا هي تستمتع لما تشوفك تغيري منها

انت لحقتيلها بلي تغيري منها كي يدللها وليدها

بالاكي يجي في بالك تقولي عجوزة ماتعرفش

سبقاتك بالزواج ولعبت دور البطولة لما كانت عروس

وتدربت عند عجوزتها

بالتالي عندها المعلومات الكاملة عن الشعورين

واللي هما

شعور الزوجة

وشعور الأم

وكي لقاتك سهلة راهي تلعب بيك

عرفاتك حابة تستحوذي على وليدها

وحلفت فيك وقالت والله ماتديه

على هذا ولات كل سمانة تجي لعندك للدار على خاطر راهي حاسة بيك تغيري منها

وليتي انتي بالنسبة ليها (اسمحيلي) كي الفار اللي يصيدو القط

مايخليه يروح مايلكلوا

مدام راكي بهذ النفسية يبقى حالك مطول

درتيها ضرة ماشي عجوزة

أججتي في نفسها مشاعر ماكانتش رايحة تفكر يظهروا مرة ثانية في حياتها بعدما وصلت لهذ السن.

حست بيك تغيري كي يهدر معاها وليدها ويدللها

المشكلة انت منبعها

لو كان تخلي الاحترام بينك وبينها

وتعتبريها أم زوجك بدون أي شيء ثاني

وتفكري (مانقولكش )اعتبريها مثل أمك

كان مايصراش هكذا

تولي العلاقة بينك وبينها مافيهاش هذ الشحنات

اطلقي لحبل وخليها مع وليدها

كي تجي لعندك للدار ماتوقفيش على راسها كي تكون مع وليدها

اهدري معاها وحافظيلها على مشاعرها

ماتتقلقي ماوالو

ماتحسبيهاش غبية ماتفيقلكش

هي عارفة ماتحبيهاش تجي لعندكم للدار

على هذا راه تفكر فيك بطريقة غير مباشرة باش ماتنسايش

ردي بالك تغلطي روحك

رانا نساء ونعرفوا بعضنا مليح

عاودي رتبي روحك وراجعي تصرفاتك

عجوزتك مادرتش هكذا إلا بناءا على رد فعل منها على تصرفاتك

وهذا التصرفات تنبئ بالكثير

وراهي تنبه فيك وماراكيش حابة تتنتبهي

راهي تقولك أنا أم

وانتي تقوليلها : لا لالالالا ماتتمسخريش بيا انت ضرة

هي ماعندها حتى مشكلة تجاهك . المشكلة راهي عندك

من عندك بدأت وعندك حلها