راني محطمة نفسيا

الحالمّــة · 2017-03-05, 20:36

السلام عليكم
كثبت هدا الموضوع لاني عييت صايي
والله غي عييت نظلي نقرا و مبعد نجيب نقاط قاع مشي ملاح مشي نظلي نقرا و ماريفيزيش في النهار بالذات مي راهي غايضتني
في بزاف مواد الرياضيات 12 ماذا جرى لي لا ادري هل انا مستهترة بها ام ماذا؟
عاونوني والله غي كهرت اجاباتي تكون صح مي في التصحيح نلقى قاع اللي غلطت فيهم عليهم 1.5 ولا كثر وفي الوضعية منديش فوق 3.5/6 هذا ظلم كبير
في وقت الختبارات كنت نوض على 5 و الناس قاع راقدين ونبدا نقرا
الطريقة تاعي خطا وا كيفاش
يعني انا كي نجي للدار نقرا ساعة مات وصايي و مينذاك نحل سجيات تاع اللغات و مانتبعش بزاف في الكلاسة واش ندير في اللغات نقرا كتب و في العربية عييت نحل في السجيات و مبعد 12
اعطوني حل ارجوكم
كون ما نجيبش معدل في الفصل الجاي مليح ساصاب بانهيار عصبي و لانهبل

طيف الملاك¤اماني¤ · 2017-03-05, 20:40

اختي سلام انا كل مضلوومين بنفس الطريقة وعنا نفس المشكل نقراو ودقول علينا لا قرينا

Aminzaim · 2017-03-05, 20:44

ايه واش نقولك اختي رانا كامل كيفكيف لي قالتها اماني مي انا درتها في روحي و مدرتش اهمية كبيرة للقراية والنتيجة يعني كانت متوقعة مي مام هاك اتصدمت اليوم مي دايمن نقول الباك هو الصح
موفقة اختي

مريم المتفائلة · 2017-03-05, 21:37

ربي يكون معاااك اختي وما يكون غير الخيررر
نفس المشكل انا فرنسية حسيييت روحي خدمت ديت 8

والصح فالباك

موفقة

اخت الرجل · 2017-03-05, 23:15

لحل عندي ومن تجربتي في السنوات لي فاتت لمنواض تاع بكري ماينفعش لمهم نوضي عند الصبح صلي صلاتك وفتي كراساتك باه تشوفي شاعندك ليوم وتراجعي كاش افكار وفلكلاصة تبعي وسقسي شيخ وعادي مشي تضغطي على روحك سقسي صحاباتك لاقيبش تلميذ كيما نتي ممكن يبسطلك الفكرة وممبعد سقسي شيخ اسكو شافهمتي صح كيترجعي لدار راجعي بترتيب شاقريتي ولحاجة لي صتي روحك مافهمتيهاش مليح سقسي عليها شيخ غدوة منذاك وريحي روحك بفيدياوات فليوتيوب تاع قراية كيما استاذ نوردين تاع رياضات فليوتيوب فنننننن وعلاجالو ماهبطتش م19 في الرياضيات وعندك لمواد تاع لحفظة خصيلهم نهار وبلاصة معينة وبذي طريقة نجمت ندي علامات ملاح وانا نرقد على 11 ولا 12 نادرا ونوض صبح ماتسهري قاوي ماتضغطي على روحك وقراي لكتوبة بلغة لي تبغيها وكون تكون عربية خير مثلا فلفايسبوك راهي كاينة وحد لاباج نتاع اصبوحة 180 شوفيها تنفعك كلما جي ترقدي اقراي 6 صفحات من كتاب ورقدي واسمحيلي طولت فلهدرة بصح ان شاء الله نكون فدتك شوي واذا كين شي حاجة راني فلخدمة هههه وممكن طريقتي ماتنفعكش بصح بتنظيم تصيبي طريقة لي تخرج عليك قيل لباك

الحالمّــة · 2017-03-06, 06:29

شكرا لكم جميعا افدتوني

مُـ‘ـُنُـ‘ـُـعُـ‘ـُمُـ‘ـُ · 2017-03-06, 19:47

لا تكرهوا شيئا و هو خير لكم

~ قدس ~ · 2017-03-06, 20:25

ما تقلقيش كامل حبيبتي رانا كامل كيف كيف انااا فزدتها الفصل هذا ديت 9 في الكيميا اووو سير رايح يكون معدلي هكذا ..

عموما ما تقلقيش روحك اموونة العام جاي اهم ماش تواا ..

Rahil65 · 2017-03-07, 11:23

ماي همش شحال تدي فالفصول يالكوكان تدي تحت المعدل
المهم تكون محضرة نفسك مليح للباك
انا مانيش مهتمة بمعدل الفصول لانو الاساتذة يحطو النقاط كيما تنفحلهم
راني نخمم للباك و خلاص
إن شاء الله نجيبوه كامل و بتقدير ممتاز