ابنتي تسير في طريق الانحراف ساعدوني

[مشكلتي]

السلام عليكم اخواني
ابنتي 13 سنة...هي في علاقة مع شخص منذ السنة الماضية..هو الان يدرس في الثانوي وهي في الثانية متوسط
المشكل لاحظت انها متعلقى به كثيرا و اغلب حديثها عنه ...تبكي كثيرا لانها لم تلتقيه منذ فترة
***فعلا حبها له محير جدا وبدرجه غير طبيعية***
بنفس الوقت خائفة عليها كثيرا لانها ذات اخلاق عالية وعقل كبير والكل يحبها معدلها لا ينزل عن 18...اساتذتها يشكرونها ...لها شخصية قوية ووعي كبير
لا اعلم فعلا ماذا سأفعل معها لاني اعتبرها صديقتي قبل كونها ابنتي♥احبها اكثر من نفسي
ههه اما عنه فهو يبادرها نفس المشاعر لكنه يزعجها كثيرا هه كيما يقولوا يلبلها عالمورال ..لكنه يفعل كل شيء من اجلها انا اقول هذا من كل عقلي
ارجوكم ساعدوني اخواني انا محتارة جدا وتائهة

[نورسين.داية]

السلام عليكم

عزيزتي الذي أخلاقهعالية لا يدخل في علاقة عاطفية محرمة و أنتي أدرى بدلك و الأمر من هذا أنتي على علم بهذه العلاقة .....؟؟؟؟؟؟؟؟؟؟

18 سنة هذا راه كبير يا لة لة ...............تتعاملين مع الموضوع بإستخفاف ................+يلعلبلها على المورال .......و الله سبحان الله ....أسعفي إبنتك و هو بعد الباك ....شوفي إذا زاد سمع بيها ......................

بالتوفيق عزيزتي

[rafika1988]

عذرا سيدتي و استسمحك لاني اتكلم معكي بهذه الطريقة
أرى أن الخلل ليس في ابنتك بل فيكي انتي عوض ان تنهريها وتنبيهها على سلوكها تشجعينها عليه ...
جميل ان. تصادقي ابنتك وتصاحبنها
والأجمل أن لا تلغي دور الأم في هذه الحالة وخصوصا في هذه المرحلة الصعبة
ابنتك بحاجة اليك اكثر من قبل كوني لها اما قبل ان تكوني لها صديقة
ربي يعاونك

[مُحمد رازي]

و عليكم السلام و رحمة الله
صراحة أختي الكريمة هذا الأمر ليس لعب يحبّها و تحبّه و الخرطي تاع الأطفال
و قولك أنّه يبادلها نفس الشعور لكنّه يزعجها و يفعل كل شيء من أجلها و كأنكِ راضية بالأمر
فلا ينبغي لكِ تشجيعها أو مساندتها و إظهار الأمر لها و كأنه شيء عادي
أو الإكتفاء بالقول بأنّها مجرد مراهقة و ستكبر و تنصلح
المفروض أن تستغلّي قرابتك منها و بما أنّك تقولين أنك تعتبيرنها صديقتك
لتوجّهيها حتى لا تقع في الأخطاء و يتمّ إستغلالها لسذاجنها
و مشكل كبير في وقتنا هذا و في زمن الفايس و وسائل الإتصال لمراقبة الأبناء
ثم أخشى بأن ابنتك قد قطعت شوطا طويلا في التعلّق بهذا الشخص
و لا يمكن بين ليلة و ضحاها أن يُقال لها اتركيه و انسيه
و بالنسبة له هو يمكنه تركها بكل سهولة فهل تتوقعين مثلا أنه سيأتي يوم و يأتي ليطلب يدها منك
ملخص الكلام ابنتك مراهقة صغيرة قد يستغلها ذلك الشخص نظرا لكونه كبير عنها
فينبغي لكِ أختي أخذ الأمر على محمل الجديّة
و إذا كنتِ تحبينها فعلا فلا ينبغي لكِ أن تسمحي لأي كان بأن يلعبلها على المورال على حد قولك
ربي يصلح الأحوال

[&ام ايوب&]

مالقيت مانقول دوختيني راكي تحكي وكان الامر عادي وللحظة ما حسيت انك خايفة على بنتك في حال ما تركها ....؟؟؟
بنتك راهي صغيييرة ماتعرف والو في هاد الدنيا ويا نهار تفيق وتعرف بلي هاد سن المراهقة
اذا كنتي صخح تعتبريها كصديقة ليك وعيها ووريلها الصواب وليس العكس

[ياسمين قدسي]

اسمحيلي يا الاخت بصح رااكي حيرتيني طريقة هدرتك وزيد راكي عارفة وشا كاين ونورمال جاتك
رووحي اجري علئ بنتك قبل ما تضيع هادي ثانية متوسط وهكا بعد غير تشوف الجامعة واش تدير !!
ونتي نصيحة كاخت صغرئ صححي من مفاهيم الامومة عندك لان الام تكون حريصة علئ بنتها وفي نفس الوقت تكون
مزيرة و البنت تقدرها وتخاف منها ...اما نتي بنتك دايرتها كصديقتك معليهش بصح صديقتك مش معناتها تحكيلك علئ صاحبها
في الحرام ونتي تجيك نورمال ياوراكي ضيعي فيها بيدك هي مراهقة ما راهي فاهمة والو في الدنيا
استعقلي اختي في الله وزيري امورك مع بنتك ...واسفة لو كلامي كان شديد شوي

[خالد عنابي2]

الحل اما انكم تديرولهم طريق للحلال واما لازم يبعدو عن بعضهم البعض
نقطة جيدة ان ابنتك تصارحك بكل شيئ ولا تخفي الامر عليك ولكن هذا ليس ضمانا كافيا

[Marc Edouard]

السلام عليكم سيدتي
والله انا نقولك الصح راكي خلعتيني
الله يرحم باباك وين كنتي من بدات بنتك العلاقة
ودرتيها صديقتك من باب انها تحكيلك على علاقاتها
وزيد على ذلك وقتاش راها تتلاقاه
مكنتيش تراقبي استعمال الزمن كيفاش كيفاش
علابالك لوكان جيتي قدامي

[senoussi31]

انتم على حق لايجب على البنت الحديث مع الاولاد انا مثل ابنتك في العمر

[senoussi31]

لكنني لااتحدث معهم مهما صار معي وك>لك لو كنت في مكانك لضربها

[زبدة ذايبة]

بنتك عمرها 13 سنة

وتعرف واحد من العام اللي فات يعني 12 سنة

وحتى تعرفت عليه ولات تهدر معاه وتحبوا يعني كانت في 11 سنة

ولو كان نقصوا الشهور من هذا الأعوام

تكون بنتك بدات تحب في 10 سنين ونص

يا للكارثة !!!!!!!!!!!!!!!!!!!!!

إذا ماراكيش تحسي يا الأم !!!!!!!!!!!!!!!

نشرولك قلب ديريه في بلاصت هذا اللي راه يضخ في الدم برك باش ماتموتيش وتبقاي على قيد الحياة


بنتك مولات 10 سنوات مرحلة الطفولة الوسطى

بنتك مولات 12 سنة مرحلة الطفولة المتأخرة

بنتك مازالت صغيرة على الحب

انتي اللي فسدتيها !!!!!!!!!!!!!!!!!!!!

تظلي تتفرجي معاها في المسلسلات التركية

وكي راح عليك الحال تاع انت تولي تحبي شجعتي بنتك على هذا اللي يسموه الحب

وقاعدة تشوفي في بنتك تمرض لأسباب واهية

من خلال كتابتك يظهر واضح جدا أنك تستمتعي بالقصة التي تمر بها ابنتك

خافي ربي فيها

بنتك كيما راكي تقولي شاطرة وعاقلة فسدتيها انتيا

بالأهواء الفاسدة اللي عندك، وبعقد النقص ومحاولة العيش في زمن غير زمنك

انت راح الحال عليك باش تكون عندك قصص عاطفية

دفعتي بنتك تقع في الحب وقاعدة انت تستمتعي !!!!!!!!!!!!!!!!

وجيتي تكتبيلنا بملئ فيك أنا بنتي تحكيلي كلش

وش من نتيجة تحصلتي عليها ؟؟؟؟؟

بنتك راهي في حالة !!!!!!!!!

ماتعرفش تميز !!!!!!!!!! هذا وين قالت بسم الله في مرحلة البلوغ حتى في تصنيف مرحلة المراهقة ماراهيش داخلة في هذا التصنيف ؟؟؟؟؟؟

أسألك بالله : أنت كأم وش تتوقعي نهاية العلاقة هذي ؟؟؟؟؟؟

تتزوج بيه ؟؟؟؟؟ يروح ويخليها ؟؟؟؟؟ تبقى برك تحبوا ويمرض فيها ؟؟؟؟؟ تخرج معاه ؟؟؟؟؟ تهدر معاه برك في التيليفون ؟؟؟؟؟

وش النتيجة العملية لهذا الحب يا أيتها الأم ؟؟؟؟؟؟

حبستيلي راسي. لدرجة أني نشك تكون هذا المشكلة ماشي صحيحة ونتمنى تكون ماشي صحيحة

والله أهون يكون أي واحد حب يجوز الوقت بالأعضاء دار هذا الموضوع ومايكونش صح وش كتبتي

كارثة كبيرة درتيها أيتها الأم

ماعندك مادافعي على نفسك الأمر واضح وضوح الشمس

طفلة تاع 12 و13 سنة مازالت تشوف الرسوم المتحركة

ومازال ماتعرفش العلاقة مع الذكر

هذو عامين وانتي عارفة بيها

عوض تنبهيها وتفهميها وتشرحيلها وتعاونيها

وتسترجعي بنتك

وليتي دافعي على المراهق اللي راه يلعب بمشاعرها وعواطفها

وعاجبك الحال كي بنتك تحكيلك حكايتها مع الشاب

وتحكيلك كيفاش راه يتمسخر بيها

وانتي تستمتعي بآلامها كي شغل راكي تشوفي في مسلسل عاطفي

بطلته وحدة عمرها 13 سنة والبطل الثاني 18 سنة

وانتيا عندك دور المتفرج اللي يستنى كل يوم حلقة من المسلسل يشوفها

آآآآآآه يا أيتها الأم

لو كان جا في عمرها 16 أو 17 أو 18 أو 19 لو كان شوية تفهمنا الحالة وقلنا سن المراهقة وأحكام الاختلاط نتيجة حتمية

لكن البنت طفلة وليست حتى مرااااااااهقة

ضيعتي الأمانة اللي رزقك ربي بيها

وخنتي في تربية ابنتك

حرااااام عليك قدام ربي تكوني غافلة بهذا الطريقة البشعة

بنيتي علاقتك بابنتك على أساس الصداقة

ماكنتي ليها لا صديقة ناصحة

وماكنتي ليها أما مربية

قاعدة تشوفي في الطفلة الصغيرة تغرق وانت عاجبك الحال

بنتك كبرت ولات تحب ،،،،، أفرحي يا أم .......

للأسف

طريق الانحراف انتي اللي ديتيها ليه

الطفلة لوكان تدخل في حالة اكتئاب أو تقع في الرذيلة انت السبب

ويحاسبك ربي عليها

عوض ما توضحيلها خطئها

وليتي عارفة بالشاب وش من مستوى راه فيه والسن تاعو وش من ثانوية

وكيفاش يلعب بأعصاب بنتك وانت عاجبك الحال

كل المعلومات عندك

ماعدا

المعلومات اللي تخص بنتك وتربيتها

حولتيها لأداة تستمتعي بيها وبقصتها

عاودي راجعي روحك

عمر الأم ماتكون بهذا الأسلوب

عرفنا أمهاتنا يضربوا ويعيطوا ويهددوا على أدنى شك يشكوه في بنتهم


وفي بعض المرات تحرمها من حريتها وتحد من الخروج تاعها وتسجنها في الدار ماعدا للمدرسة


الدخول والخروج من البيت بالوقت مع معرفة صديقة البنت ( ولينا نهدروا على الصديق العاشق) لاحول ولا قوة إلا بالله

وانت في الأخير ديري لبنتك صديق في الثانوية ؟؟؟؟؟؟؟

هذا اللي جا منك ليها !!!!!!!!!!!!

عوض تحميها من الوقوع في هذا الشر

شر العاطفة الناجمة عن الميول الطبيعية التي خلقها الله في الإنسان

عوض توريلها الصح من الخطأ قعدتي تتفرجي فيها ؟؟؟؟؟؟

شابات ودفعوا ثمن الخطيئة غاليا بدعوى الحب


نشفتيلي ريقي ماعرفت كيفاه نفهمك

مارانيش عارفة لاراكي حاسة بحجم الكارثة اللي راكي دايرتها في بنتك.

ربي يحاسبك عليها هذا مانقولك

شهادة كبيرة نعطوهالك ونديرولك الأوسمة كي بنتك تحكيلك أسرارها

للأسف إذا كملتي هكذا تحكيلك بنتك ولا ماتحكيلكش كيفكيف

هذا اللي راكي تعتبريه إنجاز كبير درتيه

بالنسبة ليك ماعندو حتى معنى

الدليل طفلة 13 سنة تحب والأم عنده علم بهذا الحب !!!!!!!!!!!!!!!؟؟؟؟؟؟؟؟؟؟؟؟

[بشـرى]

أختي الكريمة باين من كلامك أنك طيبة جدا والدليل أنكِ ترين ابنتك تمشي في طريق الإنحراف ومع هذا مقدرتيش تتصرفي ، أختي في موضوع حساس كهذا لازم تحطي العاطفة جانباا ، تحكمي بعقلك مش بقلبك .. ممكن حتى بنتك لما شافتك هكذا متساهلة حست بالطمأنينة وكملت علاقتها وحتى أنها تحكيلك عليه بأريحية ...
الحل أنك تبدايلها بالحسنى ، تجبديها ليك وتفهميها بلعقل بلي هذا الشي حرام ومش جايز وبلي قرايتها أهم ، بنتك راهي في فترة مراهقة تكون حساسة جدا وممكن متتقبلش الأمر في البداية لكن انتي ابقاي مصرة ، واذا محبتش تفهم راكي مضطرة انتِ تبدلي العقلية معاها ممكن تخاف ، استعملي اسلوب التهديد معها وإذا منفعش استعملي الضرب ، واقطعي عليها النت والهاتف .. ومن جهة أخرى اذا قدرتي تتواصلي مع الشاب قوليلو يبعد على بنتك على خاطر اذا بقى معها ممكن هدرتك معاها متجيب حتى نتيجة .....
وربي يصلح الأحوال ان شاء الله ..

[بشـرى]

أختي زبدة ذايبة أعلم أنكِ أكبر مني سنا بكثير وأكثر خبرة في الحياة لكن يا أختي النصيحة عمرها ما كانت بالطريقة هذي ، عندك حاجة تفيدي بيها صاحبة المشكلة اللهم بارك لكن أنك تدخلي عليها بأوصاف وترجعيها هي السبب في انحراف الإبنة راكي غالطة ، ممكن التساهل تعها هو لي خلا بنتها تتمادى نعم ، لكن حتى شخصيات الناس تختلف ، ممكن أنت لو كنت مكانها ودارتها بنتك مباشرة تجبدي العصا وتضربيها لكن هذه المرأة لا مدارتش هذا الشي وأسبابها عندها ، ممكن قلة حيلة ممكن طيبة زايدة ممكن بنتها مدللة بزاف ..... اعطي الحل لصاحب المشكلة وفقط ، وإذا حسيتي أنها غالطة اهدريها بطريقة معدولة ، صدقيني ممكن كلماتك هذه اللي انتي تكتبي فيها من وراء الشاشة قادرة تضر أكثر من تنفع ، ممكن هذه المرأة حساسة فوق اللزوم وتقرا تعليقك تولي تقول أنا الغالطة أنا لي معرفتش نربي بنتي أنا أنا وتتشكل عندها عقدة ، الأم غالطة صح وكلنا علابالنا بصح وصلي كلامك بطريقة لطيفة ....

[نعمة الله15]

اين هو الأب من كل هدا ؟ هل اخبرتيه بحال ابنته انها تعشق تلميذ في التانوية وبعلمك او لا وجُود له في الاسرة

[لمسة ابداع]

و الله كانو صحبتها اللي قاعدة تحكي ماشي امها
سيدتي الكريمة اظن ان المشكل فيكي قبل ما يكون في بنتك
من المفروض ما تحليلهاش العين في موضوع كيما هدااااا
لانوووو العواقب رااااايحة تكون وخيمة