اختلط الحابل بالنابل

[مشكلتي]

مشكلتي معقدة بزاف و حابة اصحاب الاراء السديدة فقط يردوا.
انا فتاة عندي 21 سنة على قدر من الجمال والاخلاق والحمد لله ناجحة في قرايتي ,
المهم مؤخرا ولد خالي خطبني يعني اعرب على الرغبة تاعو امام اهلي
وانا كنت مبدئيا موافقة بصح مزال مرديتش خاطر امور اخرى دخلت في الخط
هذا لي خطبني عندو خوه لكبير حاليا متزوج وكان خطبني من ماما قبل سنوات كي كنت نعقب الاهلية
وماما رفضت رفض قاطع وقفلت على الحكاية و واحد ما خبرني بيها حتى الان بش عرفت
و الطريقة لي عرفت بيها هي اني تلاقيت ولد خالي هذا لكبير في الجامعة
و قالي بلي مزال يحبني بصح ملازمش نقبل بخوه لانو على حد قولو دخلت انا بين الخاوة
قالي مزلت نبغيك و مستحيل نتقبل فكرة تكوني مراة خويا وقالي بلي خطبني من ماما بكري .
المهم خليتو مقدرت نرد بوالو روحت للدار وسقسيت ماما اذا صح خطبني قاتلي صح
ضكا راني بين نارين خايفة نقبل و تصرا مشكلةبين الاخوة واصلا منقدرش نكون في محيط زوج رجال حابيني فيه
وخايفة نرفض لانو لي خطبني الصغير ناس ملاح واي بنت تتمناه لوكان نرفضو يحسب لاخر بلي رفضتو على جالو
زودوني بحل و ششكرا.

[مراد سابقا]

علاه الإخوة هذو شافوك غير انت لي في العالم

امراة وصالحة للزواج

من قصتك استنتجت شيئ مهم هذو الخاوة حابسين على رواحهم

الأحسن تخليهم في زوج

[karimtito]

ربي يفرج عليك والله امر يحير
في رايي اخبري امك وهي ستتكفل بالحل
والله المستعان

[>>أثر الفراشة~~]

أولا اكثر من صلاة الاستخارة

ثانيا اذا انت عاجبك الي تقدملك وارتاحيتلو اقبلي بيه نورمال

لانه اخوه الاول لي خطبك قديما لو فعلا كما راه يقول كان جدد خطبتك هو فقط حاب يسمط عليك

ياك انت مابغيتهيش؟؟ ماوعادتيهش بالزواج؟؟ اصلا هو غبي علاش جاي يخبرك ~~الله يهدي

لازم ماعادش تحكي معاه وتدخلي في حوارات سلام سلام وبطلي داصريه


وشكون قال راكي تدخلي بين الخاوة؟؟


في رايي الشخص لعاجبك اقبلي وتوكلي على الله وماتكثريش الوساوس والهدرة على روحك

اذا مش عاجبك ارفض بلا مايكون السبب اخوه لي خطبك قديما

الحل سهل بين يديك فقط كوني حازمة وقويه وذكية في التعامل

[- بصمة خير -]

رأيي ما نعرف اذا سديد او لالا لكن ...
نقولك رأيي الزواج هذا يخوف بزااااف
و يخليك تخافي على روحك
تزوجي بواحد تعرفي خوه يحبك
من بعد واش ضامنة خوه واش يدير؟
واش يقدر يديرلك؟
واش من مشاكل يديرلك؟
و زوجك حطيه مليح في بالك ما يسمحش في العائلة تاعو على جالك
او يعادي عائلته على جالك
و زيد راني نشوف
ان الاخ الصغير هذا علابالو ان خوه الكبير خطبك و ما قبلتيش و ممكن حب يخطبك انتي باش يقول لخوه راهي قبلت بيا انا و ماشي انت
ما تعرفيش واش كاين بين الخاوة
اللي تتزوج تحوس على الهنا
ماشي تروح للمشاكل برجلها
قتلك الزواج هذا يخوف بزااااف
و كما قال العضو الي قبلي
هذا الخاوة ما شافوش غير انتي امراة في الدنيا
و انتي قولتي الاخ الصغير فيه صفات اي بنت تتمناها
لكن اللي مش في الوضع تاعك
ماشي اللي خطبها خوه من قبل
و خوه حاط عينو عليها و مازال يحبها
و ماشي غير هو راجل في الدنيا هذه

و في الزواج دايما نقولو الحل هو الاستخارة
حنا نقولو و نطلعو و نهبطو
و اللي شافها ربي حنا ماشوفناهاش
ديري قرار
و صلي الاستخارة
و امشي في قرارك
و خليها على ربي

[أم سلوى]

اتركهم الله يعوض عليك...راح تنساي كلش...اما الأخ الاكبر هو خائن...كان من الممكن لا يقول لك اي شي هو متزوج....
الصغير..هو الضحية الله يعوض عليه ايضا زوحة صالحة

[الأصيــل]

مادام البداية غير مريحة ..ارفضي بأي حجة ... حتى لا تكوني سبب في مشاكل مستقبلا

[softech]

هناك مشكل اكبر ما درتيش حسابها: زوجة الاخ الاكبر .. كون تعرف القصة رايحة تكون اكبر عدو ليك!
الافضل يا بنت الناس تبعدي على هذا العايلة رايح يكون فيها النزاع و البغض و الزواج راه حب و مودة و قرابة.
ربي يجيبلك لي فيه الخير.

[زبدة ذايبة]

المشاكل من البداية غير اخطيك

الحمد لله كاين الرجال

والديك رفضوا لكبير رفض قطعي في السابق

وبعد سنوات جا الصغير

وش تبدل في لكبير مايصلحش والصغير يصلح؟؟؟؟؟؟؟

وزيد الضربة الثانية اللي باينة وضوح الشمس

قلة عقل لكبير والسذاجة أو اللؤم اللي فيه

بعد ماتزوج بسنوات ، وبعدماتقدم خوه ليك جا يفسد على خوه زعمة هذا لكبير !!!!!!!!!!!!!!!

وزيد مادارش حتى حرمة لزوجتو ، هذ إذا صح راه يحبك مثل ماراه يقول !!!!!!!!!!!!!!!!!!!

الرجال خداعين وغيورين أكثر من النساء -إلا مارحم ربي-

كان قادر يضرب النح ويسكت. حاجة فاتت ماكالاه يفتح دفاترها

لكنه أصر أنك ماتدخليش لدارهم. لبارح قلتوا عليه لالا واليوم إيه !!!!!!!!!!!!!!

ماراحش يخليك تتهناي ورايح يديرلك المشاكل ورايح يخلفلك الطار تاع اللي ماقبلتوش بيه

ورايح يسعى لطلاقك. وهو كي جا لعندك ماشي باش يعبرلك على الحب تاعو جا باش ينبهك ويحذرك

بأنك رايحة تدخلي لدائرة الصراع انت الخاسر الأكبر فيها.

ومثل ماتفضل الأخ اللي قبلي وأشار إلى زوجة أخيه(الأخ الأكبر)

ماراهيش رايحة تسكتلك وماراهيش رايحة ترتاح وانت في داخل هذ العائلة

ورايحة تسعى هي كذلك لطلاقك ولخراب عشك


نحي من بالك نهائيا أن لكبير يحبك ومازال يحبك

هذي طريقة لبقة ومحترمة باش مايقومش بتهديدك بشكل مباشر وصريح

مجيئه إليك في الجامعة ليس للتعبير عن الحب ولكنه للتنبيه والتحذير. حتى ماتغلطيش روحك بأن الأخوين يحبوك في زوج

لكبير رايحة تكونلوا إهانة كبيرة ليه لوكان تقبلي بخوه. وهذي ماراحش يتقبلها نهائيا وماراحش يسكت

بما أنكم رفضتوا لكبير حتى الصغير ارفضيه ويجيب ربي اللي أحسن منو

المشاكل من البداية وزيد التهديد والوعيد حتى قبل ما تعطي رأيك شيء لاينبئ بخير

أنا رأيي خيرها في غيرها

إذا كنت استخرتي فهذا هو جواب الاستخارة.

[فافا مينوشة]

حاسة القصة شويا داخلها سيناريو وتاثير بمسلسل الله اعلم ربي يسهلك

[~أمة الله~]

عليك السلام ورحمة الله وبركاته
نصيحتي لكِ أختي، بعد استخارة الله عزّ وجلّ والالحاح في الدعاء هو الرّفض ولا تقبلي الاثنين، لأنّك راح تولي في مشاكل كبار خصوصا إن بقي الآخر معلّقا بك... وربي يعوّضك خيرا يالرّجل الصالح
والله أعلم

[أم أماني أريج]

رأيي يا أختي أنك ترفضي هذا الزواج من أصلو و بما أنك صغيرة و جميلة و متعلمة فبإذن الله رايحة تكون عندك فرص أخرى مليحة للزواج .
قصتك ذكرتني يقصة صديقة لي كانت بكل صراحة آية في الجمال ...كان خطبها شاب و هي صغيرة و طبعا والديها رفضوا و بعدها بمدة أعجب بها الأخ الأصغر و أعرب لها عن إعجابه و طلب منها تستناه حتى يتخرج من الجامعة و رفضت الفكرة و لما طلعت هي للجامعة خطبها الأخ الثالث و هو الإبن الأكبرلهذه العائلة مهندس و إمكانياتو المادية جدا مريحة فقبلت بيه و كان يخدم في ليبيا فاضطرت أنها تسكن مع عائلة زوجها في البداية و تعرضت لتحرشات كبيرة جدا من طرف إخوة زوجها العزاب و لولا لطف الله بها لكادت تحدث كوارث .

[طيور الجنان]

اختي من الافضل ترفضي هاذ الزواج لانو ممكن يجيبلك ابمشاكل و مادام راكي صفيرة اكييييد عندك فرص بزاف وان شاء الله يجيك الزوج الصالح.

[rimhann]

من المستحسن ان تكون امك على علم بما يجري
وان تخبريها ان اخوه الاكبر قابلك و قال انه مازال يحبك
ومن وجهة نظري ان ترفضي و ربي يعوضك اذا
عرفتي انه ستقع مشاكل
فمن الاحسن ان يبتعد الانسان عن الفتنة
و الله اعلم

[KING STAR]

في الحقيقة خوه هذا إنسان مريض وواضح جدا انه هو من مرر لك الرسالة بالرفض عن طريق ولد خالك
المهم راه بدات بالمشاكل وما نظنش انها تكمل على خير
أظن ربما تبتعدي علىيهم افضل لكن حاولي تتحاوري مع والدتك أفضل
ما زال كاين ناس تفكر بهاذ الطريقة الله يجيب الخير