سكان الغرب ساعدونيييييييييييييييي

[sasou2013]

من فضلكم راني حابة نعرف المعنى تع وحد الكلمة و سمحولي ادا كانت كلمة مشي مليحة و الله صراحة منعرفش معناها
انا مرت سلفي وهرانية و تعيط لبنتي الي في عمرها شهرين يا الخانسة معرفتش وش حب يقول تعيشو جاوبوني بصراحة و سمحولي ادا كانت كلمة مشي مليحة والله منعرف معناها جاوبوني بسرعة شكرا:confu sed:

[amira belmehdi]

hadi kalma 3aib and el

[فاصلة]

هاذ الكلمة ماهيش مليحة معناتها في جوايه متسخة لكن في جوايه مأخوذة من الفساد .أختي عذرا

[Karim22000]

السلام عليكم

يا ختي كلمت خانسة مكانش(لا توجد) في الغرب، نظن راه يقولها. " يا الخانزة" ، ومعناها الأصلي اذا قلناها لشخص يعني هو موسخ(متسخ) و ريحته ماشي شابة (نثن)
و نقولوها كي (عندما) يفسد اللحم : اللحم خنز.

أما كي يقولها لشيرة(بنت) صغيرة، المعني يكون سطحي، بزاف يقولوا لولادهم الصغار : الخنوز تاعي ,الخانزة تاعي ولا خنوزتي ، من داك(لأنها) ما تنقيش (لا تنظف) روحها وحدها.

الكلمة لا علاقة لها بالفساد الأخلاقي، مرات نقولوها لشخص رجل أو امرأة كيما ذكرت الأختين فاصلة و أميرة كناية على السيرة، فلانة موسخة ولا خانزة يعني وسخت سيرتها

[فاتي تيارت]

هذالكلمة تلقب للبنت الثالثة او احيانا الاولى باش يجى ولد وراها لا غير

[sasou2013]

رديت بالي بلي مرت سلفي تقول ها الكلمة كسر كي تكون وحدعا معايا كي يكون قدامنا كش واحد تقولها يا شابة و كي سقسيته وعلاه تقولها هاكة بقات تخمم مبعد قاتلي باع نهرب عليها العين و غير شافت راجلي جاي بدلت قاع الهدرة حسبي الله و نعم الوكيل انا ضنيت حبت تقولها لي ليا على خاطر سلفتي دائما تعايرني بهاد الكلام كيما هدا تلطخلي في السمعة ديالي و هي صحبتها اكيد راي تشارشيلي بها بصاح حلفت نفضحها قدام ناس داري

[*بنت الاسلام*]

الله يهديك راكي تضخمي في الأمر . أما وهرانية و نقولك هاد الكلمة معناها *متسخة* عكس نظيفة أما للصغارفنقولوهالهم من باب المداعبة أنا شخصيا كي نلعب مع ولدي نقوله يا *الخانز نتاعي* أو *خنوزي *بكل حب.

[*بنت الاسلام*]

الله يهديك راكي تضخمي في الأمر . أنا وهرانية و نقولك هاد الكلمة معناها *متسخة* عكس نظيفة أما للصغارفنقولوهالهم من باب المداعبة أنا شخصيا كي نلعب مع ولدي نقوله يا *الخانز نتاعي* أو *خنوزي *بكل حب.

[راجيةالتوفيق]

ربما لا تقصد المعنى الحقيقي

[mariamalak]

يا اختي ما نضنش تقصد حاجة مشي مليحة احنا نقواوها للبيبي نورمال انا نقول لبنتي المخنيزة تاعي الفايحة درتي بيبي هههه
و جارتي مروكية تقولها لبنتي بيبي تقلها الخانزة و تبوس من باب الداعبة