راني رجعت بعد غياب بكيكة الكراميل و القهوة روعةة

[نهر التسنيم]

السلام عليكم اخواتي الاعزاء والله ليكم وحشة علابالي توحشتوني بزاااااف المهم ان شاء الله تكونو كامل بخير . اليوم جبتلكم وصفة تاع كيكة الكراميل و القهوة نبداو على بركة الله .
مقادير الطبقة الاولى:
قبل مانحط المقادير لازم تشعلو الفرن يسخن على درجة 180 . و نحكم المول اللي يكون مفتوح من الجانب الخاص بالطورطات ندهنو بالزبدة و نرشو بالفرينة و نخليه بجيه
بسم الله
نشد 2 بيض نضربهم مع نص كاس سكر عادي حتى يدوب السكر من بعد نزيد نص كاس زيت و نص كاس حليب و ملعقة صغيرة فاني و نخلص من بعد نضيف كاس فرينة و كيس خميرة حلويات و ملعقة كبيرة كاكاو و نخلط مليح و نفرغو فالمول و ندخلو يطيب . بعد مايطيب نخليه يبرد مليح فالمول ديالو مانحيهش منو .
دوكا الطبقة الثانية :
نصف لتر حليب ندير فيه كيس فلان ذوق كاراميل 100غ و ملعقة صغيرة نيسكافي و نحطو على النار .من جهة اخرى نشد 10 حبات قاطو بيمو العادي و نفرغ فوقو علبة كرام فراش .كي يغلي الفلان نفرغو فوق خليط القاطو والكرام فراش و نخلط شوية من بعد هدا الخليط نحطو فالمكسور و نرحيه مليح مليح حتى يولي كريمي بعدها نفرغ هذا الخليط فوق الجينواز اللي خليناها تبرد وندخلو للثلاجة حتى تجمد الطبقة الثانية .
دوكا نوجدو الطبقة الثالثة :
علبة شوكولا بريما نذوبوها و نضيفولها علبة كرام ديسير ذوق شوكولا و نفرغوه فوق الطبقة الثانية و نحطوه فالثلاجة مدة 4 سوايع .
و بعد 4 سوايع نحرجو من الثلاجة و نحي المول بكل سهولة و نتحصل على كيكة ولا اروع و بصحتكم
نخليكم مع الصور و ياريت تكرموني بتعليقاتكم سواء ايجابية او سلبية لانه رايكم يهمني .وسلام عليكم
https://up.arabseyes.com/uploads2013/...6854356571.jpg
https://up.arabseyes.com/uploads2013/...6871079431.jpg
https://up.arabseyes.com/uploads2013/...6878401071.jpg