اريد تعلم الطبخ

[wissem setifienne]

سلام لبنات حابة نتعلم الطبخ لاني طباخة فاشلة محب نطيب و ندير بصح كي ندير الحاجة و ماتجيش مليحة نفشل مثلا اكلات لي بالمرقة تجيني خفيفة و ما تخثارليش مالقري نتبع النصائح
الام ما تنعتليش كيفاه ندير جامي علمتنا كيفاه نطيبو الحاجة حاجة بسيطة كيما عدس شربة لوبيا حتى ندخل المنتدى ولا نشوف في النت الطريقة باه ندير
ياا ريت تدبرو عليا كيفاه ندير و تولي ماكلتي بنينة
بنات سطيف اذا تعرفو مدرسة تعلم طبخ قولولي

[toulay]

وعليكم السلام ورحمة الله وبركاته
جيتي ليا راني مبتدئة خلاااااااااااااااااااااااااااااص
انا نتبع ام وليد كثر خيرها تعلمت منها بزاف حوايج تاني هنا فالجلفة كاين وصفات
ام وليد تشرح بالتفصيل الممل وتمد مقادير مضبوطة وهاذي حاجة ساعدتني
ياحسرااااااااه باش درت الخطرة لفاتت لعدس حتى شفت ام وليد وتاني وحدة خلاف اسمها ام سامي بصح درتوا مالح بزاف وتاني مرة باش درت سباغيتي شفت فاليوتيب تاني وهنا فالمنتدى
بصح بالارادة نتعلموا ان شاء الله
ودرك ça va راني تحسنت الحمد الله كنت لا علاقة بكل
بالتوفيق

[wissem setifienne]

59 مشاهدة و مكان حتى مساعدة

[الحاجة حجوجة]

عليك وعلى سميرة تي في

[sousou 16]

جربي وما تفشليش كي ما تخرجلكش الحاجة لانو من اخطاء نتعلم

[سلوى سلوى]

ان شاء رح تتعلمي مني

[معلمة03]

ام وليد ربي يحفظها تبعي وصفاتها تتعلمي

[السعادة قرار]

السلام عليكم اختي
راهو جاي رمضان و تتعلمي الطبخ انشاء الله على اصوله انا ننصحك تحطي بالك مع الوالدة الكريمة في المطبخ كي تكون تعمل و تقشريلها الخضار تجبديلها الاشيء و تنظفيلها المطبخ و هي تعمل و تحطي بالبال عليها رايحة تتعلمي الكثير من الاشياء ليس فقط الطبخ بل النظافة و الترتيب كل هاذا اثناء الطبخة
و ابداي بالامور السهلة مثلا كسرة خميرة كسرة رخسيس خبز الدار بيتزا سلطات اوردوفر و كل ما تتعلمي حاجة ابقاي تعاوديها مش ديريها مرة و خلاص لا كل يوم عاودي اعجني حاجة و السلطة كل يوم مثلا ديري العجائن ماكانش اسهل منها و اعيديها عدة مرات تولي ممتازة ثم مثلا الكسكس كل جمعة نديروه اوقفي علة امك و شوفي و جربي عاوديه المرة القادمة من المستحيل انك ما تتعلميهش لانو كل جمعة كسكس و هكدا لكن مش كلشي مع بعض