كيف أختار زوجي ؟

[مشكلتي]

السلام عليكم و رحمة الله و بركاته :

أنا فتاة أبلغ من العمر 21 سنة أدرس سنة ثالثة طب و خاتمة لكتاب الله و الحمد لله و لحاجة في نفسي أريد الزواج بنية إعفاف نفسي فما نراه اليوم من فتن يثبت أن ذلك هو الأفضل و كذلك تطبيقا لسنة النبي صلى الله عليه و سلم في الزواج المبكر و يأتيني العديد من الخطاب الحمد لله لكن لم أستقبل أي أحد بعد في بيت العائلة ذلك لأنني أريد صفات لا أدري كيف سأعرفها في الطرف الآخر فأنا أريده إنسانا ملتزما يخاف الله و يتقيه و له خبايا بينه و بين الله و يأخذ بيدي و يقربني من ربي و لكن لا أدري أي المعايير أتخذها, فهل الصلاة و اللحية تكفي ؟ وكيف سأعرف الباقي من أخلاقه و تعاملاته؟ أريد رأي المتزوجات كيف اخترتن أزواجكن. و رأي الرجال كذلك. شيء آخر كذلك هل سيؤثر الزواج على الدراسة؟
بالنسبة للذين سينتقدونني و يرون أنني لا أزال صغيرة و أن العمل أهم, لا تنتقدوني لأن لي حاجة عاطفية أريد توجيهها في الحلال كما أن هذا أفضل من الناحية الشرعية و هذا أهم شيء.
من كان يؤمن بالله و اليوم الآخر فليقل خيرا أو ليصمت بارك الله فيكم
و السلام عليكم و رحمة الله و بركاته.

[- بصمة خير -]

العمل اهم؟؟؟
شكون قالك الكلام هذا؟؟
راه يضيع في مستقبلك

بالنسبة لكيفية الاختيار
الحل
هو صلاة الاستخارة
اللي يجي يخطبك صلي الاستخارة
و الاستخارة ما تقوليليش ما حلمت بوالو
و الا راني مش مرتاحة او
لالا الاستخارة تصليها و الباقي على الله
هو اللي يخيرلك

خصوصا انتي راكي تحوسي على امور غيبية
امور في داخل نفس الانسان
مستحيل تقدري تعرفيها
الا بالمعاشرة

الله يوفقك

[sokalitnin]

لا فض فوك اختي فاهم شيء بالنسبة لي شخصيا في الزواج الحصول عل زوجة او زوج يقربك من الله وياخذ بيدك الى الجنات اما الهدف الدنوي هي بناء رجال او نساء يكون لهم اثر في وفع لواء الامة اما بالنسبةلمعايير الاختيار فالصلاة امر ضروري اما اللحية فهي سنة ونحن مقصرون فيها لكن ارى انها لا تعبر عن مدى التزام الشخص اما الدراسة والعمل فارى انها من التوافه لان الرجل الذي عنده بقين في الله انه هو الرازق لا يرضى لز وجته العمل مع احترامي لكل العاملات وانت تحفظين كتاب الله فالحمد لله وله المنة ففي صدرك ما يحاجج عنك يوم القيامة وفقك الله

[sohaibdz]

مزلتي صغيرة اتلهاي بقرايتك
والزوج مش انت لي تخيريه صححي تفكيرك خلي هذا الامر للولي تاعك لانه راح يشتتك و يبعدك على قرايتك

[سجل أنا جزائري]

تفكيرك جيد و هو عين تفكير الفتاة الصالحة

أما كيف تعرفين الصلاح اذا كان ملزم بالصلاة خاصة في مسجد و تعاملهم مع الناس لأأنو يوجد كثير من أناسهم يظهر ملتومين لكن تعاملهم مع ناس لا علاقة

و هذي طبعا مهمة ولي أمرك و ليست انتي من تتحري عن الرجل

[ساجده 82]

سلام اختي. مشكلتك سااااهله جدا .الاستخاره .ماخاب من استخار
اما هل يؤثر الزواج على الدراسه هدا مبني على مقدرتك انت اذا شايفه روحك قادره توفقي بين الدار وزوجك والدراسه واذاراح تعيشي مع العائله او لا واذا راح يكون عندك اولاد كل هذه الامور حطيلها علامه استفهام واذا جااوبتي عليها ثم تخرجيي بنتيجه ااذاااا. راكي قادره اولا.

[nihal159]

أختي رايحة نجاوبك على قد سؤالك؛ هذا قسم ربي يبعتهولك؛ أنتِ ماعليك غير تستخيري و أهلك يسألو عن الخاطب في الحي؛ مكان العمل؛ يسألو عن أخلاقو؛ تربيتو؛

طريقة تعاملو مع الناس؛ إذا كل هذه الصفات عجبوك ورتاحتي ليه؛ ديرو رؤية شرعية وربي يسهل إن شاء الله.

قضية التوفيق بين الدراسة و الزواج؛ أنتِ أدرى بقدراتك و طبيعة الدراسة نتاعك؛ مثلا إذا لازم تحضري الدروس كل يوم من 8 صباحا حتى 16 مساأ؛ تروحي للدار

تخمليها؛ تصلي صلاتك؛ تحضري العشاء؛ تغسلي الأواني؛ إذا عندك ملابس للغسيل أو الكوي؛ كل هذا ينتهي في حدود 10 ليلا؛ ثم لازمك تراجعي دروسك؛ وكي

تعودي في فترة إمتحانات كيفاش ديري؟

[nihal159]

لم أنتبه أنك ذكرتي أنكي إختصاص طب؛ كي تنتقلي للسنة الرابعة يبدأ الطب تاع الصح؛ ماشفتي والو من الدروس المحشوة ولازم كل مقياس تجيبي فيه معدّل 10 ؛ مايبقالك لا وقت باش تفكري في الزواج؛ ماتبقالك عاطفة توجهيها؛ والله راسك ماتقدري تهزيه من الكتب و الدروس.

[dali rami]

أهلا أختاه ، أحييك على صراحتك وأبارك لك إتمام حفظ كتاب الله العظيم وجعلك الله من أهل القرآن وخاصته يارب آمين
أما بخصوص رغبتك بالزواج لتعفي نفسك عن الوقوع في الحرام فأقول لك عليك بالدعاء أختاه والصلاة في ثلث الليل الأخير حيث أنه وقت استجابة أختي الفاضلة وكذا تحري أوقات الإجابة كيوم الجمعة وبعد الإفطار من صوم التطوع وغيرها من الأوقات المعروفة ، عسى الله يجمعك بابن الحلال الذي يتقي الله فيك ولا تنسي أن تصلي الاستخارة قبل قبول أي خطيب ينوي الزواج بك
أعلم أنه عملة نادرة في هذا الزمن ولكن لا ينقطع الخير من أمتنا إلى يوم الدين ، مازال هنالك أبناء الحلال ممن يخافون الله ويتقونه وينوون العفاف
والإخوة الذين يقولون أنه الطب ولا تستطعين التوفيق بين الدراسة والحياة الشخصية أقول لك أن ذلك الأمر ممكن وأعرف تجارب من مدينتي وفقهم الله لذلك خصوصا إذا كان الزوج ماشاء الله ومتفهم لظروفك وحتى ربما يساعدك حتى إن امكن له ذلك
أسأل الله العلي العظيم أن يسهل عليك هذا الأمر مادمت تنوين الحلال
وفقك الله لما يحبه ويرضاه

[Amouna.DZ]

أنا رايحة نقول رأيي
يا أختي إذا كنتي فعلا تقراي بجد الطب لما وجدتي الفراغ العاطفي لي محتاجتيه لأنو لايوجد لا جهد ولا وقت لذلك
ثانيا مادابيك متتخلايش على دراستك مهما كان الأمر
ثالثا إذا جاك من ترضي دينه وخلقه طبعا ليس بشكل لازم أهلك يسثسوا عليه مليييح صلي صلاة الاستهغرة وتكلي على ربي

[أثيلة]

لا حل سوى صلاة الإستخارة

[خالد عنابي2]

الجواب سهل : لا يمكنكي ان تعرفي

عليكي بالاخذ بالظاهر والله يتولى السرائر

وهذا لا ينفي ضرورة السؤال والتقصي عن الشخص ولو وجدتي من ترتضينه فلا حرج في ايجاد طريقة تعرضين بها عليه الزواج بواسطة او .....

[kingkhaled1991]

السلام عليكم

نقولك نصيحة صحيحة 100/100 ...ربي يمد حساب القلوب
اذا كنتي صالحة وطاهرة ومتدينة اكيد ربي رح يرزقك بالصالح والطاهر والمتدين

انا نحوس على انسانة مثلك اذا راكي مهتمة اني هنا.يالطبيبة

[نسيم الريح ش]

ربي يرزقك ولد الحلال

[*فرح*]

شوفي يا ختي
أقراي ملييييبيبح واش راح نقولك:
حابة الرجل الصالح....اطلبيه من عند ربي...والله.
بالاك تلقاي واحد يشكرولك فيه ولا يعجبك على أساس ملتحي ...الخ بصح ما يعلم بواش في القلوب و واش في السرائر غير ربي سبحانو...
توكلي على ربي و ديري حسن ظن في الله بلي راح يعطيلك مرادك و خوذي بالأسباب و ادعي و الله ربي ما يخليك...يعطيلك مرادك و أكثر بعد.
و ادعي خااااصة في قيام الليل(ركزيلي على هاذي)...واذا ممكن في كل سجدة ادعي من قلبك ( الله ارزقني الزوج الصالح........والله توليلك كيما سبحان ربي الأعلى).
اذا تقدري ديري عمل خير كل مدة معينة و بعدو ادعي ربي.
مثلا كل شهر و لا كل أسبوع ...الخ ديري قيام ليل و ادعي ربي يرزقك الزوج الصالح كيما راكي حابة.
ولا مثلا كل أسبوع دوري على جميع المصاحف المهجورة في البيت و أقراي من كل مصحف بضع آيات و كي تخلصي هزي يديك و ادعي ...الخ.
و منا لهذاك الوقت ادعي ربي يثبتك و يحفظلك قلبك و اذا مازال مكتوبك مطول يرزقك الصبر و القدرة على الانتظار.
و ان شاء الله كي تتخطبي صلي صلاة الاستخارة...فما خاب من استخار.وراكي تشاوري في ربي...كي شغل كيما سقسيتي الناس عليه و على أخلاقو راكي تسقسي في ربي....الشيء الرائع أنو الناس بلاك تصدق بلاك تكذب وإذا صدقت راح تقولك على واش شافت عينها من مظاهر.وانتي ربي يسهل عليك..بصح ربي سبحانو أولا هو اعلم بكل ذرة عليه و ثانيا مادام لجأت ليه راح يصدقك و ما يخيبكش.
و العايلة الكريمة ثاني راح تقوم بالواجب و تسقسي و تنبش
بالنسبة لسؤالك عن التوفيق بين القراية و الزواج.
تاخذي رايي واحد ماراح يفيدك قد واحد مجرب...حوسي على بنات يقراو طب و تزوجو ..هل قدرو يوفقو بين الدراسة و الزواج...وادي نصائحهم.
بالنسبة لرأيي....ما نقدرش نفيدك بزاف خطرا ما علاباليش وينا جامعة تقراي.نورمالمو من العام الثالث يخلاصو تيدي و تيبي تقدري تدي ليكور لدارك و تقراي ..و سقسي خطرا كل جامعة كيفاش.
و زيدي سقسي على العوام الجايين لقراية فيهم كيفاش صعيبة ساهلة فيها بزاف و لا غير شوي سقسي على السيستام موديلار لي يبدا العام 4 كيفاش. .. ...وشوفي روحك لا قادرة لهاذ التحدي و لا لالا...ا
المهم نوصيك....اذا قررتي تزوجي و انتي تقراي ادعي ربي بزاااف باش يعينك و يقدرك على تحمل المسؤولية و التوفيق....وثاني ادعي ربي باش يسخرلك زوجك و يتقبل ظروفك و يكون عون ليك و سندك باش تقدري.....و الله قادر يرزقك قدرة و تدبير تقولي من أين لي بهذا يا فصعونة !ههه
المهم فكري مليح و الأهم استشيري وديري مخططات زعما كي تزوجي و نتي تقراي كيفاش تنظمي و قتك و ماتنسايش موضوع الأولاد..وواجباتك اتجاه الزوج و البيت....الخ....و ادعي ثاني ربي يزوجك في الوقت المناسب و استخيري اذا تزوجي وانت تقراي و لا حتى تمشي شوي في القراية.
علابالي طولت و أنا نكتب ونعاود..ههههه
و جبتهالك غير ادعي ادعي ههه.....بصح الله غالب حنا ضعفاء و ربي رزاق "ادعوني أستجب لكم" مالا ادعي لابغى على أتفه الأشياء ربي كريم و الحمد لله
تصدقي عندي كثر من ساعة و أنا نكتب.
تالمو عندي بزااااف حوايج حابة نقولهملك و نوصلهملك....بصح اختاصرتلك أهم النقاط....(قوليلي هذا الجرنان كامل و تقولي اختاصرت هههههه)
أيا ربي يكون في عونك.