بوراك الدجاج الخيالي

[الاميرة سميرة]

سلام خواتاتي صح رمضانكم
ليوم جبتلكم طريقتي نتاع بوراك الدجاج فعلا يجي بنين بنين يهبل و الذوق خيالي
1 اولا في مقلاة نحط زيت و مزيج من البصل الاخضر نتاع العرش و نتاع لحبة نقليهم غاية
2 نزيد عليهم صدر دجاج مرحي و نخلطهم مليح مع اضافة ملعقتين ماء باه ينحل و ما يبقاش كتل
3 نتبلهم بالملح و حرور و سكنجبير و شوية كمون و القليل من فلفل احمر حلو و تابل الخاص بالدجاج راه يتباع عند العطارين و كركب
4 و نقطع شوية حار و نقليهم مليح حتى اللي يطيب الدجاج نزيد عليهم 5 قطع جبن مثلث و نحرك باه يذوب شوية و نطفي للنار
5 نزيد عليهم زيتون نتاع طاجين مقطع رقيق و معدنوس و هريسة اختيارية و من جهة اخرى سر بنة هاذ البوراك هي
6 نقلي حبتين بيض بالملح و حرور بعدما نضربهم مليح و نفتتهم و نضيهم للحشو اللي طيبته نتاع الدجاج يمد ذوق رهيب
7 نخلي الحشو يبرد و نبدا نعمر فالديول الشكل اللي نحب و نزيد قبل ما نغلق طرف فرماج شاف او مثلث و نقليهم قبل الاذان باه يبقاو
سخونين و مقرمشين فعلا يستحقو التجربة و ما يبانش بلي هاد البوراك مخدوم بالكفتة نتاع الدجاج جربوه و ادعولي بالخير الى عجبكم
صح فطوركم