نهدرو شوية في مسابقة هاذ العام !! دعوة لكل مترشح

[culturel]

خاوتي....الف مبروك لكل ناجح أو ناجحة مع تمنياتي لكل أساتذة المستقبل بمشوار مهني مزدهر و مشرف...أما الراسبون مع أني أكره هذه الكلمة...نقوللهم...لا لليأس و الإحباط...واحد ما علابالو واش مكتبلو ربي منا لغدوة....خلي أملك في الله كبير....و الدنيا أرزاق و كل واحد يأخذ ما كتبه له الله عز و جل من دون زيادة و لا نقصان.

كنت قد كتبت البارحة موضوع على شكل تساؤل بخصوص عبارة : مقبول بعد الترتيب في حدود المناصب المفتوحة....هذه العبارة يا إخواني تعني أنك ناجح و هذا بعد قيام الديوان الوطني بترتيب كل من نجح في الإختبار الشفهي على حسب معدل كل مترشح في قوائم و ذلك في حدود المناصب المتوفرة.

مثال : عدد المناصب المتوفرة : 10

عدد الناجحين في المسابقة النهائية (كتابي + شفهي) : 75

أعلى معدل مسجل : 15.50

أدنى معدل مسجل : 12.30

يبدأ الترتيب من أعلى معدل يعني من 15.50 إلى أدنى معدل...لكن عدد المناصب هو 10...إذا ياخذو العشرة الأوائل لذلك يمكن يتوقف المعدل عند 14.20 مثلا بحيث صاحب هذا المعدل يكون في المرتبة العاشرة من القائمة.

و هذا ما يفسر حصول العديد من المترشحين على معدلات جيدة تصل أحيانا إلى 16 و لكنه لم ينجح لأن ترتيبه في القائمة كان خارج عدد المناصب المفتوحة و ما تنساوش بلي الفاصلة تلعب دور كبير...فيمكن واحد يفوتك ب 0.05 رغم حصولكما على نفس المعدل. لذا يا إخواني القضية قضية ترتيب معدلات...فإذا تحصلت على معدل 16 فاعلم أن هنالك من تحصل على 17 و أكثر.

--------------------------------------------------------------------------------------------------------------------------------------------------------------------------

فيما يخص المسابقة....لا ننكر حصول تجاوزات....باش تقولي المسابقة تمت في شفافية تامة...هذي مكانش منها....لكن تبقى المسابقة الأفضل و الأكثر نزاهة بنسبة متفاوتة مقارنة بمسابقات السنوات الماضية و اللتي لعبت فيها الرشوة و المحسوبية دور المعيار الوحيد للنجاح....الحمد لله....كيما قلتلكم سابقا....كانت هناك تجاوزات لكنها كانت بنسب ضئيلة و غير ذات تأثير كبير و ملحوظ بدليل نجاح فئة لا يستهان بها من أبناء الزوالية و البسطاء و اللي ما عندهم حتى سند غير ربي سبحانو.

-------------------------------------------------------------------------------------------------------------------------------------------------------------------------

الآن نتكلم على نفسي شوية بالاك ندير شوية كوراج و نعطي شوية أمل لباقي المترشحين اللذين لم يسعفهم الحظ هذا العام. و الله يا إخواني أنا إنسان بسيط عندي ماستر في اللغة الفرنسية...عمري ما استخلفت...و لا تعاقدت و لا فكرت باش نتعاقد رغم حصولي على فرصة للإستخلاف لكني رفصت بسبب مبدأ واحد و هو : ما ندمرش و ما نخدمش باطل...يا نخلص كالأستاذ المرسم يا ما نخدمش....كيفاش هو يخدم أقل مني و يخلص كل شهر و أنا أستخلف في مناطق نائية و نزيد نخلص أقل منو...هذا إذا خلصت أصلا و الخدمة الصعيبة أنا اللي نخدمها....سامحوني يا الخاوة...هذا ذل و ما بعده ذل....كنت أقول دائما لن أشارك في أي مسابقة تنظم على أساس الشهادة حتى يجي النهار اللي تولي فيه على أساس الإختبار....على خاطر على أساس الإختبار تساعدني بزاف و الحمد لله صبرت و جا النهار و أصبحت على أساس الإختبار...و قمت بالمشاركة فعلا...نجحت في الكتابي و ثم في الشفهي بمعدل 14 و الحمد لله....كان ذلك بفضل الله تعالى و بمجهودي الخاص و بلا مزية أي عربي...و كيفي بزاف اللي نجحو بعرق جبينهم و بدون تدخل أي وساطة.

و لجماعة اللي ما ساعفهمش الحظ نقوللهم...أنا تاني كيفكم...سنوات من التخرج...عانيت من البطالة من بطاقة الإعفاء اللتي تحصلت عليها بعد عناء كبير....كنت المعيل الوحيد لعائلتي و المسؤول الأول و المباشر عن معيشتهم لكني لم أستسلم...اشتغلت في كل المهن...في كل أنواع التجارة...عملت في عدة مقاولات و شركات خاصة كتقني في الشبكات و المعدات الكهربائية....عملت ك كهربائي منازل...تاجرت و اشتغلت و مازلت أشتغل في كل شيء يأتي بمدخول و الحمد لله تمكنت من شراء سيارة و أنشأت شركتي المصغرة الخاصة...و كل هذا بمالي الخاص و بدون قروض و لا تدخل من الدولة.

اليوم أتى الفرج و نجحت في المسابقة بعد صبر جميل...و الآن أنا أنوي توقيف نشاطاتي الحرة و التركيز على مهنة التعليم نهائيا...بالعربية...كرهت من السفر و العمل الشاق و تذبذب المدخول...زوج شهور تخلص و 6 شهور بلا دخل...على الأقل الراتب على قلته مستقر و مضمون.

يالخاوة...و الله حكيتلكم حكايتي خصوصا للناس اللي ما نجحوش باش ما تفشلوش...و ما تستسلموش للواقع...المهم رفع التحدي و التوكل على الله وحده و عدم اليأس...و إلا طيحت و لا خسرت...زيد نوض و حاول مرة أخرى...و نحبسو شوية شكايات و نشمرو على ذرعينا و الله الموفق.

أما بالنسبة للي تحصلو على المناصب بالمعريفة و اللي وصاو عليهم في الشفهي...نقوللهم راكم ديتو حق الغير و تعديتو على المساكين اللي ما عندهم غير ربي سبحانو...و نزيدلهم ما يلي : ما تفرحوش بزاف بمناصب سرقتوها بغير وجه حق...لأنها مناصب حرام و راتبها حرام...و ما أعظم ما ينتظركم....لذلك يا جماعة الراسبين...ما يغيظكمش الحال من ناس سراقين حسابهم مع ربي. و عذرا على الإطالة.