شوربة فريك و حريرة بايادي حراير الجلفة
شوربة فريك لاسمهان 79
كاين انواع وانواع من الشربات شربة فريك شربة فارميسال لسان العصفور شربة مرمز لحريرة شربتنا اليوم بالفريك وفي منطقتي ناكلوها بزاف وكل وحدة وطريقتها في التحضير
نحتاج الى حبة بصل كبيرة سنات ثوم حبة كماطم كبيرة او زوج صغار مقطعين رقاق 2 م ك طماطم مصبرة 1 م ك هريسةملح فلفل اسود افاح شوية زيت دبشة لحم غنمي شوية من صدر الدجاج
التحضير
نحط كلش في برمة نتاع الفخار صراااااحة انا كون ما نطيبش الشربة في برمة نتاع فخار ما جينيش شربة هاذ القدرة عندها معايا شحال من عام وربي يبارك شربتها ما تتشبعش
نعمل معاهم نصف كاس ماء ونغطي عليها ونحطها على نار ذليلة ومرة على مرة نحرك نقليها ملييييييييح وعلى مهلك قد ما تتقلى مليح جيك بنينة وهاذ سر من اسرار الطبخ
من بعد نفرغ في رحاية يدوية نحي اللحم نرجعو للقدرة ونرحي كلش مليح مع اضافة شوية ماء باه ينزل كلش هكذا تتحصلي على مرق صافي
ثم فرغي في البرمة نتاعك وامرقي بالماء وخليها تطيب على نار متوسطة لما تغلي مليح وتحسي بلي اللحم والجاج دخلو الطياب لوحي الفريك
وممكن تلوحين بعد ما تغلي القدرة نتاعك من الغلبة الاولى
وحركي
هاذا الرابط نتاع صنع لفريك بالمرمز راااااائع
https://www.djelfa.info/vb/showthread.php?t=1805269
ثم لوحي ديبولات نتاع اللحم المرحي تكوني محضرتهم من قبل مع عود كرافس وشوية فلفل حار
مرة على مرة حركي وذوقي الا خاص ملح نحب نضيفلها مع الأخير شوية ثوم مرحي بودرة مخلط مع الكسبر
انا نحب نطيبها على نار ذليلة ما نحبش نزربلها في الطياب لما تخثار لوحيلها شوية نعناع اخضر واغلقي
وتمتعي بالذ شربة فريك
قدميها مع شوية نعناع وليمون اممممممم روعة هاذاك ما نحب في رمضان
************************
[U]
شربة فريك على طريقة رتاج 07]
اختي زنوبة دائما في القمة و مواضيعك مميزة حتى انا عمري ولا درت الحريرة خخخخ ندوقها غير عند خالتي في وهران هههه*
طريقتي في شوربة الفريك امممم
نبداو باسم اللهنديرو في الفخار تاع الطين امممم روعةنرابي زوج حبات طماطم و شوية ثوم انا نديروا في المهراس خير و نزيد زوج مغارف طماطم العلب و ملعقة فلفل عكري حار و نص ملعقة راس الحانوت حنا نخدموه في الدار و ربع ملعقة كسبر مرحي و ملح و ذرة سكر و شوية دبشة و لحم و نوج ملاعق زيت عادي و ملعقة زيت الزيتون و نخليها على نار هادئة تكتك في هذاك الدواء امممم و منبعد نزيدلها الماء السخون و نخليها حتى يطيب اللحم شوية نزيد فنجان صغير فريك و شوية حمص و نخليها تكمل طيابها حتى طيب يامي يامي و كي طيب نحك شوية نعناع يابس بين يديا و نديرو فيها و شوية دبشة و عصرة ليمون و راس فلفل حار عربي و شهية طيبة
نطيبها و نحط الصور
************************
[U]
شوربة فريك ل ام اياد 13[]]
شكر اختي زينوبة دائما متألقة
انا شربة فريك نتاعي ساعات باللحم غنمي وساعات غير باللحم المفروم*
نرابي البصل فوق اللحم ونقلي على نار قليلة نضيف التوابل فلفل اسود .قرفة.قصر مرحي.فلفل احمر حلو .
انبعد نقطع عليهم قصبر وشوية نعناع والحمص وطماطم حب مسكرفجة*
نغسل لفريك وكي نشوف اللحم تقلى مليح نحط لفريك مع طماطم مصبرة ملعقة ونخلط هم ونضيف شوية ماء ساخن ونقعد نعس فيهاا ابعد نمرقها ونخليه تطيب كي نشوفها طابت وعقدت نلوحلها راس حار تاخد غلية ولازوج ونطفي ونرىميلها قصبر مقطع رقيق مع ىشة نعناع يابس تجي روعة
************************
شربة فريك لom kamilia
شكرا زيوبة الكل راح يستفيد مش فقط المبتدئات حتى الشافات, هكا يمكننا التعرف على الوصفية بكيفيات مختلفة
انا شربة تاعي درتها موضوع تفضلوا فقط الصور مش واضحين كفاية
الشربة العاصمية لي ذقتها انا و للي مووالفة ننديرها , فيها بصلة شوية زيادة , لحم غنمي , قرعة , طماطم حب, كسبر حشيشة , و التوابل لي هم الفلفل الاسود , راس الحانوت , و طماطم مصبرة و بالطبع لحميصة و نعناع كاين لي يديرو يابس و لآ اخضر و طبعا في الاخير الفريك
انا طريقتي نحط ملعقة صغيرة سمن , وشوية زيت ونحط اللحم مقطع مكعبات يتقلى شوية نزيد عليه الدبشة و النعناع الا كان خضر غير وورقة و لا 2 يتجمر شوية ونضيف حبة طماطم مرحية و لآ زوج على حسب درجة النضوج تاعها وزيد يتقلى شوية نرمي حبة قرعة مقطع رقيق جدا يمكن الاستغناء عليها ونضيف التوابل ( ملح فلفل اسود راس الحانوت,, و شوية كسبر يابس و شوية حبة حلاوة تمد بنة للشربة ) ونخليها تتجمر شوية و نراقب دائما وبعد ذلك نضيف الماء الساخن على مرة يعني تتعمرالقدرة غير تغلي نرمي الحمص طبعا مرنخ و لآ بايت في الماء و طاايب نص طياب و ملعقة كبيرة طماطم مصبرة نخلي القدرة تغلي على مهلها في نار متوسطة كي نلقاو اللحم تاعنا و الحمص دخلو الطياب نضيفو الفريك لي شللناه ونرمي ربطة صغيرة تاع الكسبر نحي الاوراق نخليهم للتزيين و بالطبع هنا لي نضيف الملح
وتطيب و نعس على حساب نوعية الفريك و في الاخير قبل ما نطفولها , نزيد عليها اوراق الكسبر لي خليناها ونعناع يابس غير رشة خفيفة تغلي غلية و نطفي وفي صحن التقديم نزينو بالكسبر ( حشيش الشربة , المقطفة, الدبشة) و بصحتكم
دارت محاضرة هههه فقط حبيت نعطي لك طريقتي بالتفصيل ملاحظة بالنسبة للتوابل مين داك نلقى واجد خاص بالشربة والاهم تتجمر
هذا رد درتو للاخت ريمة بدر وان شاء الكل يستفاد , علبالي كل واحد و الوصفة ديالو بصح حبيت نشارككم طريقتي لتعم الفائدة*
نزيد نوافيكم بالصور في اقرب الاجال باذن الله*
ملاحظة فقط بالنسبة للحم ممكن ديري طرف غنمي و القطع تاع البقري و تقدري , تديريها بالجاج او بكويرات اللحم*
المرحي و والاهم عندي نحب ريحة الغنمي في الشربة والكسبر حشيشة لازم , وكل واحد و ذوقو
************************
شربة فريك ل omjoujou
مشكورة غاليتي زينوبة على هاذ الموضوع الرائع لي راح يكون قبلة لكل المبتدئات وانا منهم وحتى الشافات*
وهذي طريقتي تاع شربة فريك لي كنت حطيتها لاخت طلبتها مني
انا الشربة فريك نفضل ننصبها باللحم الخروف تجي بنيييينة وتقدري تخلطي معاها الجاج كيما تقدري ديريها غير بالجاج حسب ذوقك
بعدما تغسلي اللحم تاعك حطيه في برمة ورابي عليه حبة بصلة كبيرة 2 حبات طماطم متوسطين 3 سنات ثوم وتقدري ترحيهم في الروبو قطعي شوي دبشة شوي كرافس ودواي برمتك عادي انا ندير كسبر مرحي شوي راس الحانوت شوي فلفل اسود سوي فلفل عكري ملح وزيت مغرفة طماطم مصبرة ونخلط مليح ونحط البرمة على نار هااادية خلاص ونخليها تتقلى بعقلها والسر تاع بنة الشربة في التقلية لازم تخليها تتقلى مليح انا نقص النار على البرمة ونخليها من نص ساعة حتى لساعة وهي تتقلى بصح النار تنقصيلها خلااااااااص وامبعد نمرق بالماء السخون ونخلي هذاك اللحم يطيب
كي نشوف اللحم طاب نصفي هذيك المرقة ونضيفلها شوي طماطم مصبرة اذا شفتها شهبة وقرن فلفل حار ونخليها تهز غلية ونلوح الفريك بعدما كنت سومتو وهنا الكمية عينك ميزانك حسب الكمية تاع المرقة
ونخلي الفريك يطيب كي نشوفوا الشربة طابت نطفي عليها ونضيفلها دبشة مقطعة
ملاحظة تقدري تضيفي لي بولات تاع اللحم المرحي لشربة يعطيها بنة تقتتتتتل
انا كي نكمل نصفي المرقة ونلوح الطماطم المصبرة نلوح سع لي بولات تاع اللحم مرحي نخليهم يغليو شوي وامبعد نلوح الفريك ونخلي الشربة تطيب بعقلها
وهذو بعض الصور لشربة فريك تاع ليامات لي فاتو جمعتهم*
************************
شربة فريك ل؟؟؟؟
السلام عليكم الله يجعل رمضان يدخل علينا بالصحة و الربح*
اما بالنسبة للشربة تاعي هادي الطريقة
شوية زيت +سمن نقلي فيهم اللحم ولا الجاج*
من بعد نرمي حبة بصل كبيرة و حبة بطاطا وحبة جزر كبيرة و 2حبات طماطم وربطة قصبر +عرف نعناع وكرافس والتوابل انا ندير ملعقة صغيرة معمرةملح وملعقة صغيييرة فلفل اسود ملعقة صغيرة عكري وقرفة عود ولا مرحية ملعقة صغيرة كل خطرة واش ندير (خطرات نديرلها حبة كبابة وحبة قرنفل صغاااار هادي اضافة ماما ربي يخليهالي) ونخليها تتقلى ملييييييح من بعد نمرق*
في هادي الاثناء نغسل الفريك تاعي ملييييح ونخليه يتنفخ فالما
كي يطيب اللحم نحي ربطة الحشيش نرميها منرحيهاش وانحي الخضر مع غراف مرق نرحيهم ونرجعهم للقدر نظيف طماطم مصبرة ماشي بزاف والحميصة وكي تغلي نقيس لفريك*
كي طيب ونطفي نظيف قصبر مقطع ونعناع هادي هي شريبتي ان شاء الله تعجبكم
والا حبيت شربة فرميسال نرحي البصل و الطماطم ونقليهم مع اللحم وندير الجزر والبطاطا مقطعين مربعات صغار (تقدري ديري قرعة جلبانة ...)ونخلي الكل يتقلى مليييح و نمرق كي يطيب الللحم ندير طماطم مصبرة ونرمي الفرميسال او لسان طير ......الخ والحشيش مقطفة بعد ما نطفي*
هادي المقادير تكفي من 2ل 3 اشخاص غير انا وزوجي ووليدي صغير الي تحب كمية كبيرة تضاعف المكونات
************************
شربة فريك ل؟؟؟؟
السلام عليكم اولا شكرا زنوبة على الموضوع حبييت نشارك بالحريرة
المقادير كالتالي
اللحم حسب المتوفر اما غنمي او دجاج ومن الاحسن يكون غنمي*
حبة بصل كبيرة مرابية
2حبات كبار طماطم تكون حمرا مرابيين
حبة جزر+حبة بطاطا+حبة لفت حلو مقطعين على 4
كمشة حمص
ربطة حشيش(قصبور)+وريقات كرافز
نحط كلش في قدر ونزيد التوابل ملعقة زيت عادي+ملعقة سمن انا شخصيا نستعمل سمن مدينة نضيف راس الحانوت والفلفل الاسودوالفلفل العكري وعود قرفة ورقة رند الملح نمرق ونخليها تطيب*
لما تطيب نحي الحشيش وعود القرفة واللحم والرند وحبيبات حمص ونطحن الباقي بالبرامكسور ونضيف الماء على حسب الحاجة ونحط القدر فوق النار ونحط حوالي ملعقة صغيرة تشيشة او فريك ملعقة صغيرة كروية الكروية مانحطهاش في الاول باش مايجيش لون الحريرة كحل وربيطة صغيرة قصبر وملعقة كبيرة طماطم مصبرة ونرد الحمص لي صفيتو نرجعو للقدر ونخليها تغلي وناخد اناء نحط فيه 2 او 3 ملاعق فرينة ونحلهم بالماء ونخليها شوية ثقيلة لما تغلي القدر نفرغ الخليط ونحرك ونشوف قوام الحريرة ماخصهاش تكون ثقيلة ومالزمهاش تجي خفيفة خير الامور اوسطها نخليها تطيب ونراقبها في البداية تعمل كيما الرغوة نراقبها ونحرك باش ماتفيضش ونقص للنار نخليها حوالي 1/2ساعة على نار مهيلة نطفي وعند التقديم نزين بالقصبر مقطع وعصرة ليمون
هذه هي الحريرة لي ماتفارقنيش رمضان كامل تصوموا بالصحة
ممكن تطالعو على هاد الرابط تقريبا نفس الطريقة الاختلاف فقط في الثوم انا منحطش الثوم
https://www.dztu.be/watch?v=eiNWgnCbg5g
************************
شربة فريك ل انا هي رزيقة
موضوع اكثر من رائع جازاك االله كل خير اختي زينب . انا طريقتي في شربة الفريك فوتوكوبي تع ام جوجو الفحلة فقط انا بحكم اني خدامة نحط البصل و الثوم و حشيشة القصبر في الروبو و نرحيهم ثم نقلي كلش كيما قالت ام جوجو بصح غير حوالي 15 دقيقة وقتي ضيق الله غالب و نزيد الماء مغلي و كي نشوف اللحم قريب يطيب منصفيش المرقة تاعي لانو كلش مطحون مسبقا نرمي الفريك بعد منكون شللتو عدة مرات و احيانا نزيد معاه دي بولات صغيرون تع كفتة اللحم او الدجاج مداوييين بشوية ثوم مع قرفة و فلفل اكحل و حشيشة قصبر و زيت زيتون تجي بنتهم امممم تع الصح .
ايه و في الاخير كي نطفي عليها نزيد مع القصبر شوية نعناع يابس نرحيه ما بين صباعتيه او اخضر كي يكون متوفر*
*************************
شربة فريك ل ؟؟؟؟
اختي زينب بارك الله فيك على الموضوع لحريرة جامي درتها لكن نقلكم على الفريك كيفاش نديرو انا نطيب في القدر نتاع الفخار جي الشربة نتاعو هايلة نرابي حبة بصل +الدرسة ثوم ملح فلفل عكري حلو وشوية حار وفلفل اكحل+ كسبر نقليهم في الزيت ثم نزيد 1طماطم مرابية +وطماطم مصبرة وحبة ماجي نقليهم شوية ومن بعد نزيد الجاج نقليه مليح ونحط الماء ثم الدبشة مقطعة نغسل لفريك وكي تغلي المرقة نلوحو انا نستعمل 5 مغارف في لتر ونص ماء جي قدقد كي تطيب نكون وجدت حبات زيتون اخضر نغليه ونقطعو ونلوحو حوالي 5 دقائق قبل منطفي لانو قدرة الفخار تكمل طياب بعد منطفي عليها ونحط دبشة ملفوق وكاين وين نعمل شربة نتاع الشعير مشي المرمز المرمز مقلي والشربة هذي مشي مقلية نفس المرقة لكن منلوحهاش حتى طيب المرقة ونخليها فقط 10د جي هايلة ومتصرش خاصة الي عندهم المعدة وصح رمضانكم
************************
شربة فريك لاستاذتي ام ياسين الزهراء
بارك الله فيك والموضوع ممتاز وقيم هكى اللي عندها استفسار ولا حاجة تصيبها هنا*
طريقتي في الشربة الفريك*
اولا باش الشربة تاع الفريك تنجح لازم اللحم غنمي ولازم الماء اللي تمرقي بيه يكون سخون*
انا نطيب في كوكوط راني مع زمن السرعة ونفضلها فيها لانها طيب ضربى وحدة*
حبة بصل كبيرة + زوج سنات ثوم وحبة طماطم حمراء وكبيرة في ميكسور نرحيهم مليح مليح مع شوي ماء بهدي الطريقة مانصفي مانحي البنة ونحطه في كوطوط مع اطراف اللحم اللي عندكم وندير الملح والفاح او راس الحانوت العكري والفلفل الاكحل الزنجبيل شوي هريسة وطماطم مصبرة وزيت مانكثرش لان الغنمي مشحم ونقطع شوي حشيش او دبشة وندير حوالي كاس ماء ونحطهم على النار متوسطة تتقلى مليح مليح وكل مرة نزيد الماء السخون طبعا وكينوصل لكمية الماء لازمة نرمي الفريك عمري لانغسلو لاني كينشريه نغرلبلو ونضفو علاش نزيد نغسلو راح تروح البنة ونحرك القدرة ونقفل عليها وادا عندك لحم مرحي ديري بولات طبعا بالتوابل وكيما موالفين نديرو متبلين وارميهم في القدرة راح تزيلك البنة وتخرجلك شربة هي المهم اقفلي على قدرتك وخليها طيب بعد ماطيب تحلي عليها راح تلقايها طابت وخثرت مليح وادا شفتي بلي مازالت مايها يعني فيها الماء يطلع غطيها نص غطاء وخليها تخثار وفي الاخير كيطفي ارمي راس حار وشوي نعنان يابس وغطيها
حبيت برك ندير ملاحظة للبنات اولا علاش تصفو المرقى خسارة البنة وكلش راح يروح ارحوهم مليح مايبان والو*
ثانيا بما اني من ارض الفريك يعني بلادنا بلاد الفريك لازم يطيب مع اللحم عمركم لاترموه في الاخير كيما الدويدة*
في الاخير علاش تغسلوه راح تقولولي الغبرة ووووووو انفضوه في الغربال كلش يروح راكم تنحولو في البنة والريحة اللي تجي فيه وهي ريحة الارض*
************************
شربة فريك لام سدرة
مساء الخير راح نحط طريقتي في تحضير الشربة
المقادير:قطع لحم نفضل يكون هبرة مافيهش العظم حبة بصل 2 حبات طماطم 3 سنات ثوم دبشة كرافس*
رأس الحانوت وملح فلفل اسود وعكري 3 مغارف زيت مغرفة ونص طماطم مصبرة ونقلي مليح على الاقل 20 إلى 30 دقيقة*
ومن بعد نمرق ونخليها حتى يطيب اللحم ونصفي المرقة بصح انا مانرميش البصل والطماطم لي يقعدو في الكسكاس لي نصفي فيه نعاود نرحيهم ونرجعهم في المرقة باش جي خاثرة مليح ونرمي الفريك تاعي الكمية على حساب أفراد العائلة كل وحدة تحط الكمية لي بغات ونخليها تغلي حتى تختار*
ان شاء الله نكون وفقت في الشرح
************************
حريرة وهرانية لحياة نورالدين*
السلام عليكن*
بارك الله فيك على الموضوع روووووعة*
الحريرة الوهرانية راني دايرتها موضوع*
السلام عليكم هذه الحريرة علمتهالي عجوزتي ربي يحفظها*
المقادير
اطراف دجاج او لحم او داند
بصلة
ثوم
حبة بطاطا، حبة قرعة، من ثلاث الى اربع حبات جزر ، لفت ، كرافس، حشيش ، حبة طماطم حمراء مرابية او مقطعة صغير،ملح، فلفل اسود، راس الحانوت، زنجبيل، كركم، قرفة، كروية ، فلفل عكري ، طماطم مصبرة نقلي الكل جيدا ثم نضيف كاس ماء وكاس صغير فريك او تشيشة نقصل لنار ونتركها تغلي مع الخلط مرة على مرة باش متتحرقش الفريك ثم نمرق ونتركها تطيب
بعد ما تطيب ننزع اللحم ونرحي الخضر وهنا رايحة تكون بنة حريرتك
ادا خصها الماءزيديلها ثم اضيفي الجومبو و راس الحانوت و الزعتر مع الفليو مرحيين احنا نشروه نيبسوه وندقوه وقادرة تلقايه واجد و ثوم مرحي او سنة ثوم مرابية وكروية وفلفل حار وكمون الكل بكمية ملعقة صغيرة نتركها تغلي ثم نطفي ورايبحة تكون الدددددددد حريرة
************************
شربة فريك قسنطينية لاسيا 25
السلام عليكم ورحمة الله وبركاته*
شربة الفريك القسنطينية:
نقلي لحم غنمي من الأفضل تاع لي كوط و اللي يحب يزيد صدر دجاج مع ملعقة سمن حبة بصل كبيرة و حبة طماطم مرحية و ملعقة طماطم مصبرة, ملح فلفل أسود راس الحانوت و فلفل عكري و كرافس مقطعة و السر لازم تتقلى مليح مليح على نار هادئة أنا نقليها تقريبا 40 دقيقة و نستعمل قدر طين الشربة تاعها لا يعلى عليها ثم نمرق بماء ساخن و نرمي كريات من اللحم المرحي المتبل بملح و فلفل أسود و راس الحانوت و شوية بصل و فرينة الفريك و الدبشة و لما تغلي نلوح الفريك مع ملعقة فرينة الفريك نحرك و نخليها على نار هادئة مع التحريك المستمر باش ما يلصقش الفريك فالقاع و يشيط لازم كل دقيقتين نروح نحركها و لما تطيب نلوحلها واحد حار و دبشة مقطعة و نحرك و نغلق عليها باش تتنسم لاحظت أنو في مناطق أخرى من الوطن يديرو الثوم و الحمص و النعناع حنا في قسنطينة ما نديروهمش و أكيد في شهر رمضان المعظم راح نصورلكم شربة الفريك اللي نعملها.
سلام
************************
شربة فريك لايزابيل*
الله يبارك على حراير بلادي*
الطبخ على نار جد هادئة سر البنة في طيابي*
الشربة تاعي نقلي اللحم مع البصل وطماطم حب والثوم المعدنوس وحشيش مقطفة فلفل اكحل مانكثرش الكسبر وفلفل حلو احمر
ندير قطعة لحم وقطعة دجاج تجي بنة رهيبة الفريك نحطوا كي يقرب اللحم يطيب والطماطم المصبرة قبل ما نطفي بعشر دقائق هي والفلفل الحار
************************
شربة فريك لساجدة 82
سلام .شكرا اختي زينب على هدا الموضوع الرايع .نحط طريقتي في الشربه وكي نقدر نخط لحريره تاع لمغاربه
بسم الله .اولا من اسرار البنه تاعها التقليه يعني تتقلى على نار هاديه*
ندير طراف لحم غنمي فيهم شحم وطراف دجاج .نرحي حبه بصل وثوم ونرحيهم مليح تكوني درتي زوج او ثلاث ملاعق زيت وملعقه ص زبده وومكن تيتغناي عليها تفرغي البصل تاعك.وتخلي يتقلى مع اللخم على نارهاديه .ترحي حبتين كبار تاع طماطم مع ربطه دبشه رحي ناعم وتضيفيهم بمري كنت نلوح الدبشه نربطها بخيط حتىةشفت عجوزه ختي عامريه حره خههه ترحيها والله ماتبان لخضوره تاعها .
من بعدندير التوابل اللي هوما فلفل اسود وقصبر مرحي وفلفل احمر .ملح ..كاينه حاجه كنت حاقرتها ولقيتها تزيدها بنه .عود كرافس اممممم وتقلي على نار قليله بلامانكثرو الماء انا نلحق حتى قريب ساعه تقليه ونضيف الماء بالكاس يكون سخون بالشوي .بعدماتتقلى مليح .تكون راحت ريحه لبصل نمرق بالماء السخون ونخلي كل شي يطيب منين يطيب اللحم اكثر من نص الطياب نلوح لفريك ناعي بعد مانغسلو نقولو غرفيه .وندير معاه زوج ملاعق مرمز ونزيد ربطه دبشه هاد المره باش تبقى ريحتها نربطها بالخيط فقط نسيت طماطم مصبره انت تتحكمي فيها كاين اللي مايحبش الحمراء بزاف او يستغنى عليها .وراس فلفل حار كامل كي نمرق نرميه فيها .المهم لفريك يبقى حوالي نص ساعه يطيب طبعا على نار هاديه وطبعا منين توجد تطفي عليها وقد ما وجدت قبل الوقت وركحت تجي ابن .نتمنى نكون افدتكم .
عند التقديم نضيف دبشه مقطعه رقيقه وفلفل حار .واللي تحب تعمل بولات لحم كفته ممكن انا مش دايما نديرهم
/CENTER] 
( تقرير عن مشاركة سيئة )، و الموجودة أسفل كل مشاركة .
2016-05-28, 09:18
بمناسبة شهر رمضان.... دورة طبخ للمبتدئات
بمناسبة شهر رمضان.... دورة طبخ للمبتدئات
العرض العادي
