ادعولي يا خاوتي

[مشكلتي]

السلام عليكم اخواتي
بصراحة والله ما عرفت منين نبدا وكيفاش نبدا...
المشكلة ديالي في الوالد ديالي واش نقوللكم تامنو بربي غير ملي بدا رمضان ضحكة ما ضحكناهاش كيما الناس كي يتلايمو على طابلة الفطور...اتخيلو انا واختي خدامات نجيبو كلشي وحدنا باش ما نقولولو على والو وملي نجي وانا واقفة في الكوزينة ونطيب كلشي وحدي ولادي سامحة فيهم وكي نقعدو على الطابلة تبدا الشنافة والغضبة واش نقوللكم...
انا متزوجة واهل زوجي حاوزونا من الدار وساكنة في دارنا...راجلي يقضي من كلشي واش نوصيه يجيب خاطر ماهيش دارنا ولازم نعوضو هاد المزية بالقضيان والمصروف...والله يا خاوتي انا دراهمي رايحين غير على الماكلة ونشريلهم الحوايج غير باش قابليني نقعد عندهم...وهاد الشي كامل الوالد ديالي منين يشوف راجلي يشنف عليه حتى وليت نضطر نحاوزو بطريقة غير مباشرة..تقدرو تقولو عايشة مذلولة في دارنا مرات نحس روحي خديمة وخلاص...ولادي قريب نخيطلهم فمهم باش ما يديروش الحس على جالو...علابالي تقولولي حوسي على سكن...حاليا ما نقدرش خاطر حطيت دراهم باش نبني سكن وما زال ما كملش...بنتي وليت نظل نضرب فيها من هاداك الزعاف نخرجو غير فيها مسكينة هادا من جهتي انا اما من جهة ماما واختي فخليوها على ربي....ماما مسكينة منين تروح ترقد وهو يسب فيها ليل كامل والله غير ليل كامل وهو يسب فيها وهي ترد لقلبها وديرها على عينيها...مرااات بزاف كي كنت صغيرة كنت نشوفها في الليل كيفاش تحكمها لاكريز منو ومرات بزاف كانت حتى تطيح من لاكريز....ما ننساش هادوك اللقطات الي شفتها فيهم وهي على هاديك الحال....
مكرازيها ومدحس عليها...مرات كان ينوض لاختي ويما يقوللهم غدوة ما نلقاكمش في الدار كي نولي..لوكان نلقاكم نحرق بيكم الدار...عندي زوج خاوتي المتزوج دار فيه الباطل حتى راح سكن في قاراج والتاني مش متزوج بصح ولا يظل هامل برا وحتى يبات برا....
ممنوع علينا نتفرجو لاتيلي ...ولا نلعبو مع بعضانا ونضحكو...ممنوع نصبحو راقدين...ممنوع نرقدو في النهار...ممنوع نفوتو العشرة ونص في اليل وكي يكمل هو تفراج يطفيلنا لا تيلي...ونتفرجو واش هو يتفرج...لا اله الا الله....لا اله الا الله
وليت نكره كلشي منو كي نخرج من الخدمة نولي نخمم واش يردني لهاديك الدار...كرهت كرهت والله راني نكتب ونبكي
دعولي ربي يفرجها عليا وعلى ميمتي واختي...
علابالي تقولولي باباك...والله على العين والراس بصح بصراحة نحالي كامل محبتو وحنانتي عليه..وليت ما نحس بوالو من جيهتو...قلبي برد عليه
بهدلنا مع الجيران ماكانش الي مارهش مداوس معاه حتى الجيران كامل معاديينا...مايهدرو معانا لا في فرح ولا في قرح...
ادعولو ربي يهديه خاطر طغى وتفرعن بزاف...حتى التراويح وولا ما يروحش يصلي في الجامع..لا اله الا الله