ساعدوني في اقرب وقت

[وردة حياتي]

لو سمحتم بنات ساعدوني في احسن طرق لتفوير الشخشوخة و الثريدة و التليتلي خاصة التليتلي راهو مرضني كرهني حياتي منكم في انتظار نصائحكم رمضان كريم

[om obaida]

اختي انا التليتلي والثريدة نسمغهم بالزيت مليح ومن بعد نحطهم يفورو كي يفورونبقي نسمغ فيهم بالمرقة اللي طيبتها علي جالهم نعاود نفورهم نبقى بنفس الطريقة نيفور حوالي 4 مرات ومن بعد نلوحهم يجمرو في المرقة وينشفو يجيو هايلين نتمنى نكون افدتك اما الشخشوخة عادي كي نكون رايحة نسربيها نسمغها بشوية زبدة ونفورها

[أم عبد الرحيم يوسف]

حبيبتي أنا التليتلي والارز شوفي نديرلهم الزيت ونحطهم يفور المرة الاولى كي يفور نحط الكسكاس كامل فوق باسينة ونفرغ من هذاك الما لي كان يفور عله كي يقطر نحركو باش مايتعجنش ونحطو في الجفنة نحلو مليح بيديا ونديرلو الملح شوية برك لانوا المرقة مالحة ونزيد نفورو ونزيد نفس الطريقة نفرغ الما عليه لازم لي يكون يفور فوقوا هاكا تزيدي مرتين أخرين ومن بعد راكي تجمريه عادي
أما التريدة والشخشوخةالظفر يجيوني ساهلين للتفوار نديرلهم الزيت وونبخهم بشوية ما من بعد نفورهم المرة الاولى ومن بعد نحطهم في الجفنة ونبخهم بالمرقة تاعهم ونخليهم يفورو اذا جاتك مليحة جمريها واذا حسيتيها مازال يابسة شوية زيديلها مرة ثالثة
ان شاء الله نكون افتدتك

[فايزة1207]

انا اختي نطيب غير تليتلي
نحمصه في شوية زيت ونحط الماء يغلي ونفرغة على تليتلي قيس ما يتغطى ونحرك في كل مرة
كي ينشف نفوره مرتين وخلاص

[*بيتي مملكتي*]

أختي نعطيك طريقة سهلة جدا لطهي التليتلي أعتني إياها جارتي و هناتني من أخذ وقت كبير في تفوارو

حطي الماء على النار مع شوية ملح و 2 مغارف زيت و خليه حتان يغلي من بعد طفي عليه و لوحي فيه التليتلي نتاعك و حركي ثم غطيه و خليه يتشمخ مدة 10 دقائق فقط
من بعد صفيه و خليه يقطر في الكسكاس . من بعد ديريلو شوية زيت و ملح إذا جاك مسوس و حطيه يفور مرة فقط أو مرتين على الأكثر ... مايحتاجش بزاف تفوار
راح يجيك كل حبة وحدها و طايب سوا
من بعد جمريه في المرق اللي تكوني حضرتيه من قبل و شهية طيبة

[*بيتي مملكتي*]

أما التريدة و الرشتة و شخشوخة الظفر

ديريلهم اشوية زيت و فوريهم أول تفويرة ثم شمخيهم بالماء بلا ما تغرقيهم خليهم ينشفو و عاوديلهم تفويرة ثم زيدي شمخيهم بالماء مرة أخرى بلا ما تبالغي طبعا و خليهم ينشفو مرة أخرى و عاوديلهم تفويرة ثالثة
بالنسبة للشخشوخة التشميخة الثانية نديرها بالمرق في مكان الماء

[dima 08]

رمضان مبارك

[ام اياد 2013]

بارك الله فليكن اخواتي