حريرتي من كوزينتي

~~منبع العلم~~ · 2016-06-04, 13:36

السلام عليكم اخواتي ، اليوم حبيت نعطيلكم وصفتي للحريرة و ذلك بمناسبة الشهر الكريم ، على الرغم من أنه كل واحدة عندها وصفتها المفضلة لكن حبيت نعطيكم الوصفة نتاعي في الحقيقة هي وصفة مرة خالي طيب في الاعراس و الله صدقوني حريرتها رووووعة
المقادير : رطل حمص منقوع يومين قبل و تكوني تبدليله الماء كل مرة
ا/2 غرفية فول يابس منقوع يوم كامل و تكوني بدلتيله الماء عدة مرات
2 كغ طماطم حب
1.5 الى 2 كلغ بصل
2 كلغ جزر
ربطة مليحة من القصبر
ربطة كرافس غليظ
2 م كبار فلفلة حمراء حلوة مرقدة نتاع الدار ( دوك نعطيكم الوصفة ساهلة)
1 م كبيرة ملح
1 مك سكنجبير مطحون
1 عود قرفة
1 ورقة رند
3 الى 4 حبات كبابة
فلفل اسود على حسب الذوق ( انا ندير 1 مغرف صغيرة )
زعفران
زيت حوالي فنجان
اللحم ( كل واحدة على حسب مقدورها ، انا ندير 1 كلغ لحم غنمي ) لاني راه نقسم البيون المشكل و نقسمه على 7 حصص نتاع السيمانة
نحط كل المقادير في كوكوط و نخليه يطيب لمدة 1 ساعة من بعد نحيد الحمص كنت حطيته في فينة نقية و عود القرفة و ورقة الرند و حبات الكبابة (تكوني عارفة العدد باش تقدري تحوسي عليهم في وسط المرقة)
و تطحني كل الخضر و الاعشاب المتبقة ،من بعد تحطيه في كسكاس و تصفيه مليح مع اضافة الماء ساخن ( لازم يكون الماء ساخن)

~~منبع العلم~~ · 2016-06-04, 13:43

الفلفلة الحلوة المرقدة : ناخد 2 كلغ من الفلفل الاحمر الجيد و نغسله و نقطعه مثل ما نعمل في التشخشوخة ثم نقوم بتفويره على الكسكاس لغاية ما نحسه طاب )الكمية تولي في النصف بعدما يدبال )
من بعد نطحنه بالميكسور ( mixeur ) و نحطه في مقلة كبيرة و نزيد عليه زيت حوالي 1/2 فنجان و نقليه مليح على نار هادية لمدة 10 دقائق من بعد نحطه في بوقال نتاع الزجاج معقم من قبل .
نتمنى نكون افدتكم

~~منبع العلم~~ · 2016-06-04, 13:48

كل يوم نجبد حصة من الحريرة نزيد عليها الماء و طماطم مصبرة و سكنجبير و فلفل اسود و انا نزيد شوية زعفران لما تطبخ نعقدها بالفرينة و الماء و نخليها تطيب مليح مع المراقبة و التحريك لمدة تفوق 15 د من بعد نجبد شوية حريرة نحط فيها قصبر مطحون و شوية كبابة مطحونة و مغرف كبيرة كروية مطحونة و نحلهم مليح في وسط الحريرة مع مكعبات مرق الدجاج ( انا ندير 1 الى 2) و نزيدهم مع الحريرة و كرافس و قصبر مقطعين ناعم و نخليهم يغلو غلية واحدة من بعد نطفي النار