زوجتي غضبانة

[مشكلتي]

راني نفطر عند أمي هذو اليومين ، المرأة مهيش هنا راها غضبانة في دارهم تعفرنا وزعفت وراحت ، تداوسنا في الليل وفي النهار كي جيت من الخدمة
لقيت غ البلاصة ، راها موالف دير فيها أصلا ديما هاك ، هذه المرة منروحش نجيبها كيما العادة نخليها هي الي تجي ، علاه ديما أنا الظالم دايما انا الغالط
راها مدللة ياسر والدلال فسدها ونظل ساكت عليها وعاطيلها رايها ،
المشكلة من الاساس زوجتي مدمنة مسلسلات يا ودي شحال تفرج مسلسلات تموت عليهم وكل يوم ظل عقابهم ماتبطلش خلاص والمشكلة انها مبطلة صوالحها ومعطلة أمورها
بسبة التلفزيون ، نظل نقوللها ولكن والو لا حياة لمن تنادي ولا كيفاه يقولوا ، علبالكم كيفاه تتفرج ؟ تحكم المسلسل تخلصوا وبعد تبدل وتزيد تفرج وحد آخر وفي الليل تبات ساهرة تتفرج والمشكلة ان الحلقة الي تفوتهاولا يفوتها جزء منها تستنى الاعادة تزيد تفرجها
وعندها صحابتها تظل تهدر معاهم بالتلفون وتتناقش معاهم احداث المسلسل يوميا هاك ، علبالكم هي خوافة ماتروحش للتلفزيون الأخر تتفرج في الليل تخاف تقعد وحدها مالا وش دير تجي عند راسي وتتفرج وتظل مسهرتني متخلنيش نرقد وانا خدام بكري اغلب عفاراتنا على هذه السبة ، مرة رقدت وداني النوم وفجأة بدات تعيط كشما شافت لقطة في المسلسل انا نضت منشوع وكي عرفتها تمسخيرة كيما هاك
حكمت الديمو ودرتو تحت راسي وهي شنفت قاتلي راك تعامل فيا معاملة طفلة صغيرة *
وكي تتفرج تدخل في عالم المسلسل وتتأثر مرة شفتها تتفرج وتدمع قتلها يا الي تاكل راسك راهم غ يمثلو راكي حاسباتيه صح . قاتلي اسكت انت راه معندكش الاحساس .
والمشكلة الثانية هي الهاتف ، الي ميعرفناش يقول هذي شركة راها تهدر ، شركات الهاتف النقال كلها رابحة على ظهري ، مطمورة تلفونها هاذا كل يوم نطيش فيه الدراهم ، كل يوم يا فلان فليكسيلي مدامك خارج .
كرهت من الوضع هاذا راها دايرة عقلها بعقل المراهقات مزال ما لحقهاش الفارسيون تاع الزواج تحسب روحها مزالها في الصغر ، تهدر مع الصغارات في التلفون ويهدرو على حوايج تاع المراهقات ، قتلها بعدي شوي من صحاباتك خلاص راه عندك مسؤولية درك قاتلي كيفاه تقولها راهم صحاباتي ومنقدرش نخطيهم
وهذه مرتي تواعدنا من الاول من اول يوم اننا نكون يد في اليد قاتلي ايه نوعدك ومبعد خرجت عليا الطريق وخلاتني وحدي مهيش تخمم معايا في المشاكل بل العكس ولات هي مشكلة في ذاتها ،تصوروا مرة من المرات راحت لجارتها شافت عندها ماركة تاع مشينة الغسيل غالية وبعد كي جات للدار راحت تغسل في القش بيدها مالا كي جيت للدار
شفتها تغسل بيدها قتلها علاه فسدت الماشينة ؟ قاتلي ولا ذيك راها مشينة يهدرو عليها الناس ، الرجالة شفتها وش جابت لنساها وانت ديما تشريلي غ الحاجة الرخيصة في السوق ، حكمنا نص نهار واحنا نتعفروا على الماشينة وما الماشينة
الي تشوف عندها حاجة تجيني تقولي اشريلي وحدة كيما هي ، تظل تعاندلي في النساء وما تراعيش للفارق المادي بيني وبين رجالتهم ، نظل نفهم فيها ونقللها حنا رانا في مشكلة مادية عندنا الطفل راه مريض نداو فيه وعندنا قطعة الارض نبني فيها والماسون راه هارب ويخدم فيا المنكر ،
تصوروا ان امها تظل تداوس فيها على الطفل ، أمها هي مش امي ، تعيط عليها وتداوس فيها وتعاير فيها وانا نسمع فيها وتقللها مكيش متهليه فيه
عندنا الطفل هذا يمرد ويروح يرفد الحوايج الخطيرة ولا يروح يخلط الماء ولا يخرج برا ياكل التراب وهي لالة لا خبر كي ندخل للدار نلقاها تبحلق في التلفزيون وناسية الطفل
المهم راه عندها نهارين وهي مهيش هنا ومانروحش نجيبها نخليها هاك حتان تجي هي روحها
الليلة الي تعفرنا فيها جيت من التروايح ونلقاها مشغولة كي العادة بالمسلسلات وبعد انا طلبتها للمودة قاتلي خلاص درك يخلاص هذا المسلسل برك وبعد انا استطولتها رحت ليها نلقاها مبدلة القناة وتفرج في مسلسل اخر قتلها يخي راه خلاص الاول قاتلي درك ما مزالش لهاذا ويخلاص استنيت وبعد عيطولها في التلفون وقعدت تشيخ وتقصر وانا نستنى وبعد
هي تهدر وتخلط في الحليب للطفل ناضلها ، وبعد حتى اذن الآذان الاول نلقاها اصلا مابداتش تطيب للسحور يخي تعفرنا وكانوا مساميا سنيوة فيها الفناجن رحت من الغش ضربتهم برجلي تكسروا
وبعد رحت شربت الماء ورحت نرقد
وهي كيما قتلكم كي ناضت دات الطفل وراحت
برك هي مرتي راها امرة زينة وعاقلة ونحبها هي عويناتي بصح نحبها تكون امراة وتبطل من عقلية الذراري

[نورهاان]

روح لدارهم و احكي معها قدام باباها خوفها تسقم روحها
هذا يسموه تمسخير ماهيش مراة تع دار

[azro]

السلام عليكم اخي ربي يكون في عونك انا في بلصتك نخليها عند دارهم حتى تعرف قيمتك و تطلب منك ترجعها و اشرط عليها تسقم روحها و تكون زوة و ربة بيت و تبرك من التمسخير الله يهديها

[*أم كوثر*]

السلام عليكم
ربي يكون في العون
العيب فيك أخي الكريم
من النهار الاول رخيت لها الحبل
كل شيئ عندو حدود
اكيد مهما انسان عندو علاقات وصداقات ومكالمات واوقات فراغ وهوايت لكن في المعقول
من رايي خليها في دارهم وماتكلمهاش بتاتا
اكيد الوالد رح يتصل بيك انت تطلب حضوره وتحكي قدام اهلها وش حكيت هنا
وان شاء الله تتسقم وترجع لالات النساء
باينة صغيرة في السن
مع الوقت تنضج عقليتها

[ZORRO__DZ]

سلام .ّ صحا فطور

اخي حتى وان الحكاية من جانب واحد

انا لوكان في بلاصتك خلي عليهاماتجيبهاش. وهذه هي ورقتك.

زد على ذلك كيف لها ان تخرج من بيت زوجها بدون علمه ويدون محرم؟

صديقي قبل كل شيء المشكل فيك مع كل احترماتي لشخصك، انت نظن راك مدللها فوق الحد وهاهي النتيجة، كيف لزوجتك ان تخرج من بيتك بدون موافقتك.

اخي خليها حتى هما يعيطولك وكي تقلك راك سمحت وقلها انت سمحتي في داراك..ّ
واضغط عليهم بورقة كيفاه تخرج بدون اذني وهذه الورقة تدخل بيها لموضوع التفاوض ومن ثما لاظك ماترجعش زوجتك حتى تتفاهمو على كلش وماذا بيك يكونز فيها خاوتها والاب انتاعها هاكذا باش تعود في مركز قوة .


الله يجمع بيناتكم في الخير اخي.

[اياد حياتي]

كتبت رد طويل وراحلي بالمختصر زير شوية قلها امام العاءلة هذا انا وكنت عارفتني يا ترضاي بيا يا كاين اختك تخويف فقط وشوف كيفاه تسقم حقا انها تاثرت بالمسلسلات ربي يجمع بيناتكم

[**د لا ل**]

السلام عليكم

أعانك الله اخي ...

واضح أن زوجتك صغيرة في السن وأنكما في بداية زواجكما ....حاول أن تكون حازما لان هذا النوع من النساء ان ارخيت له الحبل ....فالعاقبة سيئة

ضع النقاط على الحروف

ومع الوقت ستتعود وستنضج باذن الله

ربي يصلح أحوالكما

[ايمان4]

عواقب الزواج بالقاصرات الصغيرات انتم تفضلونهم فتحملو العواقب
Ps عمري صغير و لست احرض و كم من صغيرة و يكوت عقلها احسن من الف كبيرة لكن اغلب الصغيرات هاك الله غالب اتحملها فترة مراهقة

[روح المي]

كم عمرها؟
واضح انها مزالت تعيش في شبابها لازمك تتحمل
انت لازمك تزير شويا
على تليفون متفلكسيش ساهلا فهمها حاجة مش لازمة تكلم صحبتها على جال مسلسل
وعلى التلفزيون أضرب لاقط هوائي لست متاكدة من تسميته مهم تحركه باه اشارة تروح
واحكي مع والد تاعها

[جمعي البشاري]

المشكل فيك اخي الكريم
خليها في دارهم وهني راسك حتى ترجع لعقلها

[nadine0159]

باين عليك تحبها بزاف و هي تاني رقي يخليكم لبعضاكم بصح حاول تزير شوية عليها في مسالة التلفون الصحابات ما فيهم حتى فايدة دارها اولى و زوجها اولى بالاهتمام و ابنها كيف كيف حاول تقنعها تنقص من لعناد تاعها و زيد ما تخليها تخرج من الدار بلا ما تشاورك راهي دارت غلطة و النوع هادا تاع النسا راح تعاني معاها حتى دير كاش زوج اولاد ولا ثلاثة و تعدل روحها و تعود تخمم معاك درك راهي مازالت متعلقة بحياة العزوبية يا حسراه فكرتني بروحي كي كنت في دارنا نبات نحكي ف التلفون في امور تافهة مع زعما صحاباتي اللي مباعد حتى كلمة مبروك عليك مكانش و الرقاد و المسلسلات و اللامبلاة بصح درك عندي ولد و زوج و مسؤولية كل شي محسوب انتهلا فيها و كل شيء يعود ليك هنا ابرز شخصيتك لازم كي تشوفك تهتم بيك المسلسل ماعندو حتى فايدة و ما تنساش اشكي لباباها و خاوتها و قولهم كل شيء متاكدة راح توصل لنتيجة انا ضد ماتروحش تجيبها روح جيبها و جامي تخرج المراة من دارها رانا حاملين كل شيء و مانخرجوج من الدار اصلت المشكل تاعكم تافه مبني على سبب عادي يصرا في كل دار المهم ما تكبروهاش و ان شاء الله تسمعنا خير العيد قرب لازم تروح و تهدر لان الحق كله لك

[*أم سجى*]

خويا اسمحلي بصح باش توصل لدرجة تجي لدار ومتلقاش زوجتك هاذي راها كارثة....ويظهرلي انت تحبها ومدللها فوق النهاية هاذي بيها الدلال ماشي الصغر حتا ولو كانت ف18مولات 18سنة راها كبيرة وواعية غير لي تلقى الدلال تدير رايها وتتخبى تحت سنها امالا نصيحتي ليك متدورش عليها ضربة وحدة ربما يصرا بناتكم مشاكل بصح ابدا تطبق في سياسة التزيار بالعقل بالخطوات والمراحل هكذا تتريڨل الزوجة وتنظبط وتولي رزينة وواعية ......

[- بصمة خير -]

تحبها بزااااااااااااااااف
و ما تحبش ترفضلها طلب
لكن دللتها بزاااااااااااااااااف
و ما عرفتش حدها
ديرلها حد
وقت الجد جد
وقت الدلال دلال
كما تكون حازم معاها مش معناها راك ما تحبهاش
دير الكود للتليفزيون باش تتفرج في وقت محدد
النسا رانا كلمة حلوة برك
ترضينا و تقنعنا
و تخضعنا
ربي يوفق

فهمت لاه زوجي كان يقولي
لازم نزيرك
و ما نديرلكش رايك
عندو الحق
كان مشيبني
هههههههههههه

راني في مشاكل
ادعولنا تفرج

[sarl02]

انا جابلي ربي انت وهي كيف كيف ...والقادوم القات يدها كيما قالو ناس بكري...لاني لا اتخيل ان رجلا بكامل عنفوانه وشخصيته القوية يقبل بهاته الوضعية المزرية التي تعيش فيها ...انفض الغبار على روحك الله يهديك .

[أميرة بيتي]

ربي يريح بالكم و يهنيكم إن شاء الله.
هادو هوما بعض النسا تقلاش راجلها يفسدها كيما لولاد
هي راهي متأكدة بلي تحبها ومتنجمش تفرط فيها وهي داتها نقطة ضعف عندك يعني خلاص
مشات في طبايعها الخاسرين. يخصك هاد المرة تكلم حدا الوالد نتاعها بحزم ونتا زير روحك
و ربي يهدي إن شاء الله.