من فضلكم نصيحة لوجه الله

[MARDUK]

السلام عليكم

انا شاب ابلغ من العمر 25 سنة و اريد الحصول على كارت جون فبماذا تنصحوني هل اتوكل على الله و نروح نجوز العام تاعي خير

او نسنى حتى يولي عمري 30 سنة باه نجيبها صراحة غلبت وكرهت من التفكير و بارك الله في الجميع

[tadjsat]

اذا قاعد ومعندك لا خدمة لا ارتباطات تاخض رايي قاروح

[MARDUK]

نخدم في البريفي و زيد اكرمكم الله نبول بزاف عندي ميكروب

[ROUBI.dz]

لو كنت بصحتك وماشي مريض كنت نقلك اتكل على ربي اخطيك اخي اخطيييك بلاك تندم

[MARDUK]

شكرا اخواني على الردود في انتظار البقية

[MrBlaugrana05]

شوف الأخ .. نصيحة من ذهب و كي البوم تتفكر هدرتي

ماكاش واحد هرب منهم كيما انا .. ملي كملت القراية و انا مرة سورسي مرة نشوف معريفة خفيفة فالناحية العسكرية ينحوني من السيستام باش غير ما يبعثوليش, أيا كان شعاري الهربة برك , تتوالى الأيام خدمت فالبريفي و من بعد عند الدولة (عقود ما قبل التشغيل) منا منهيك .. ,و التخمام في حكاية لاكارط جون لم يفارقني (وليت نامها كي نرقد) لأنك كل ما تخمم في مستقبلك تجيك فالطريق .. ,لحقت 27 سنة, استسلمت للواقع لأنو 30 سنة هاداك عفو ليس بقانون (روح اسأل جماعة 85 درك تفهم) أيا غمضت عينيا و مشيتلهم برجليا و جبت الاستدعاء, و بدات مغامرة جديدة مشيت لبجاية و زت رحت ترونزيت لباتنة و تما لبست و تهنييييييت من مشكل الخدعة الوطنية (كي لبست سي بو درت في بالي بلي كتبتلي نفوت و الحمد لله) فاتو أيام أونبيونص و سوفرونس ليأتي الفرج (كونطر فيزيت روطااار) و خرجت بعد شهر و نصف فالمدرسة و الحمد لله ..

المهم هذي كانت تجربتي و نصيحة لوجه الله .. اتكل على ربي و ازدم خير ما تقتل روحك بالتخمام والله ما تسلك كل ما تشوف واحد رايح تتعقد ..ما تخليش الوقت يفوت روح تتهنى .. سلام

[aymane91]

انا في مثل حالتك تماما و تخدت قراري ان شاء الله سادهب لدفعة ماي تعبت من التفكير و الدي لايولد الى القلق و المرض بدون جدوي واش نقلك

الى الأمام

[mino 13]

نصيحة لك غي روح
ودي ملف طبي معاك

[zakio92]

يا اخي الكريم قل لن يصيبنا الا ما كتب الله لنا انت دير الاسباب و دي الملف الطبي و اتكل على الله و ربي يسهل خووويا

[Dida199]

اخي الكريم لكان عندك دوسي ميدكال روح للمحكمة قدمو وعلى ربي و لا مكانش صلي صلاة الاستخارة وروح عقبها خويا راحو عام ويفوت ماديرش كيما حنا جماعة 85 غلطة كبيرة

[eljarih]

ila 3andek doussier midical adih m3ak , ana soufrit bah ditha w dit'ha b kafala 2013

[abdelhak12]

اخي انصحك تدهب كمتطوع فسيكون لك حق احتيار التكنة او الناحية العسكرية + 30 سنة ليست مضمونة

[الحو الشلفاوي]

انا كنت نقول جامي نفوتها ونبقى هارب طول حياتي......ولكن لامفر منها

رحت في جانفي الفارط ولبست وفات التربص المغلق الي هو أصعب فترة وضروك بقا شهر ونعلقو

صح الأيام الأولى صعبة جدا جدا ولكن مع الجماعة ولومبيونض تفوت ممتازة

ان شاء الله نكملها بالصحة والستر ولجميع الجنود وضباط الصف وضباط الاحتياط

نصحية مني للجميع الخدمة الوطنية لامفر منها روح وازدم ايلا ديت الاعفاء بصحتك وايلا ربي كتبلك تفوتها تفوتها

سلام

[yahiamiro]

قل لن يصيبنا الا ما كتب الله لنا