هل يغفر لي ربي

[مشكلتي]

السلام عليكم تعرفون ما مشكلتي ربما تضحك البعض او يسبني البعض والله انا حايرة في نفسي ساعدوني في هذا الاحساس والشعور بالذنب المهم انا متزوجة وخدامة والحمد لله لكن في اطار الادماج انا بعيدة شوية على الدار ومانجمش نشري حوايج بحكم المنطقة الا اذا روحت للدار يعني في وسط المدينة ولازم نمشي مع يما الله يحفظها ونشري حوايجي طبعا بمصروفي مش لازم ملابس انا كل مانحب نشري يما لازم نشريلها منقدرش نشري لروحي لازم نتفكرها بصح كل مرة لازم انا نقول نشريلها هذه المرة والمرة جاية نشري لروحي باه يكفوني الدراهم لانو كل مرة نرجع لدار ونقول لراجلي بلي مشريتش يقولي دراهمك وين راهم ومع مصروف اار والله ما يبقالي والو بصح المشكل في يما لازم كل مرة نشريلها انا والله ما نحافيها كون عندي حتى نحس من جهتها بالانزعاج بصح مانبينش ونشريلها هذيك الحاجة المهم مثلا ليوم حبيت نشري لبسة تاع خرجة وكنا ندورو عجبتها وحد روبة قاتلي شوفي كي شابة كون عندي كون شريتها وانا حسيت بلي حبتني نشريهالها ايه شريتهالها وانا مقدرتش نشري اللبسة الي حبيتها انزعشت بصح شفتها فرحت من قلبها وبدات تدعيلي هنا حكمني تانيب الضمير وقلت واش درت نشري ليما وانزعشت هذه يما قلت بحار على اللبسة صح في يما كي فرحت كون نفقدها نندم عليها انا والله مرات كي نشريلها انا نحب نشريلها وهي عارفة اني على قدي والله احيانا ما نفرح بيهم واليوم وحتى انها تقولي اعطيني وراكم عارفين الراجل يبدا يقول راكي تمدي لداركم وشتا روحتي ديري كي ما شريتيش...... حسيت باحساس غريب هل ربي راح يؤجرني او ما تنعد والو مدام انو انزعشت لكني والله اندمت اريحوني او انيبوني

[nasser26]

أمك امنحيها الدنيا ولا تخافي ... حاولي توازني بين مصروفك ومصروف يماك

وهنيئا لكي بر والدتك و زوجك من الاحسن تصارحيه انك تصرفي لأمك أكيد مراحش يعترض كما انتي تصرفي على امك هو ايضا بفطرته يحب يصرف على امو

هنيئا لكي بر واالدتك

[ميما اللئيمة]

امك ثم امك ثم امك
فرحيها مسكينة و ش تسوا قندورة و لا صباط قدام فرحة ماماك
الدراهم يروحو و يرجعو ، و رجلك يتغشش و يرضا
بصح الام كي تروح مترجعش ، فرحيها راكي الكبدة تاعها ، نتي على الاقل تقدري تشريلها كاين ناس يشوف مو بقندورة وحدة و يتمنا من ربي يرزقو بش يفرحها بصح ما باليد حيلة ، يقولك ياوكان نخدم و نخلص ، اول راتب نحطهواها فيدها و تكون اكبر فرحة ليه قبل فرحة امو ،، بارك الله فبك انت بارة

[hadil ch]

مدام دراهم تاعك نورمالمون راجلك ما يدخلش فيك و تاني انتيا صرفتيهم على امك و هاذي مشي حاجة مشي مليحة و ماكالاه تندمي باسكو امك مهما وش درتيلها مشك راح ترجعيلها حق تعبها لي تعباتو عليك و بالنسبة لدراهم حاولي ديري ميزانية و تنظميهم على حساب مشترياتك

[امل ضائع]

يا ليت امي موجودة لاعطيتها مالي و حياتي...
حاولي التوفيق اختي بين زوجك و امك..

[زبدة ذايبة]

من الأحسن لو تعطي لأمك مصروف شهري

وهي دبر راسها فيهم تحب تشري بيهم تتصدق منهم هي حرة

من جيهة تكوني بارة بيها

ومن جيهة ثانية ماتكونيش فرطتي في حقوقك وواجباتك

وماتدخليش في صراعات مع نفسك

يجيك الشيطان ويلعبهالك من عدة أبواب

رب يوفقك ويسرلك أمرك

[ام فيفي]

يا اختي راكي ان شاء الله في الطريق الصحيح...بر الوالدين هو الاساس...كيما تبري في امك و تفرحي فيها...غدوة ان شاء الله يبروك وليداتك و يفرحوك...وربي يخلف عليك ان شاء الله...ما كانش في الدنيا حاجة اغلى من الوالدين...بالتوفيق

[غزلانْ]

السلام عليكم

كل ما تمنحينه لوالدتك و برّك لها

سيأتي يوما و تتلقين نفس ما قدمته من أولادك و كل هذا " لكلمة رضا الوالدة و اسعادها " و ستؤجرين كل الأجر فيكفي منزلتها عظيمة

و الشيء الذي يجعلك تشعرين بأنك مخطئة يعود الى ردت فعل زوجك و معرفته

أين ذهبت أجرتك بيْد أنه عوض ذلك ما ينبغي عليه كزوج حتى و لو كنتِ

تتلقين أجرة كعاملة فمن " حقّه " أن يكرمكِ بتغطيتهِ لاحتياجاتكِ كزوجة

فليتغاضى عن راتبك و لا بأس ان طلبت منه لشخصك ان كان في خاطرك تغيير مظهرك

بالتوفيق لك

الله يحفظهالك

[وَحْـــ القلَمْ ـــيُ]

امك ايلاكان مديتيلها مديلها بطيب خاطر ..... وايلاكان شفتي روحك مرغمة كيما حكيتي
ان شاء الله يتحسب الاجر ......وايلاكان ما تحسبش هاذي المرة يكون درس
ولكن التائب عن الذنب كأنه لم يفعله
×××××××
وانت ماشي مكتوب على جبينك تشريلها كل مرة
هي تاني لازمها تتفهمك
وما تنسايش بلي غضب الزوج صعيب مثل غضب الوالدة
ما تزعفيهش .........ايلاكان حبيتي تشري لامك
قوليلو اولا
ومرات شري حاجة لامه(حماتك) هاكذا يحسك
تهتمي بوالديه....ماتنسايش هو تاني عندو والدين
ولوكان يدير كيفك ويمدلهم كل مرة مارايحش يوصل ليك وانت ممكن تزعفي.....نظري من كل الجوانب
تقريبا كل لي شاركو هنا يقولولك :كملي وماتخافيش
ولكن هاكدا ممكن تخسري دارك
امك ماتنسايهاش دايما تفكريها بصح بحاجة تناسب المدخول ديالك وتناسب ظروف زوجك
وهي لازم تتفهمك ..........
اما فكرة تمديلها الراتب ديالك impossible لانك رايحة تخلقي مشكلة ما اكبرها في بيتك
زوريها تفكريها بحوايج بسيطة طيبة
طلبي رضاها........

[(( هبة الرحمن ))]

السلام عليكم

عقود ما قبل التشغيل يعني راتبك 15000 دينار ، ومتزوجة ، وزوجك سمح لك بالعمل على أساس أنك تساعدي في مصروف البيت ، وأمّك لها حقّ عليك ،
لماذا لا تخرجين مع زوجك لشراء ما تحتاجين إليه ، وأمّك امنحيها 2000 دينار كلّ شهر ...
نتحدّث بصراحة أختي المرأة العاملة زوجها يضحّي معها ويتنازل عن بعض حقوقه فمن واجبها مكافأة الإحسان بالإحسان وتخصيص الجزء الأكبر من راتبها لمساعدته والتخفيف من عبء المصاريف ...
والله هذا رأيي الخاص وكنت معك صريحة .

[AMINA.Z]

باه تتجنبي الاحراج منا و الفوق
ماش شرط كل ما تحبي تخرجي تشري ..تخرجي معاها و ماش شرط تعرف كل مرة تحبي تخرجي.
بالتوفيق

[إسلام الفاروق]

بسيطة
روحي لسوق انتي وزوجك و قوليلو نشريو حاجة ليما و ليماك

سلام