حابين يديروها بيناتنا

[مشكلتي]

السلام عليكم ورحمة الله
انا فتاة مخطوبة عندي 21 سنة بصراحة راني خايفة من وحد الهدرة قالتهالي قريبتي
المهم هاد قريبتي كانت لاباس بيها خطبوها وتوجد لعرسها فرحانة نهار عرسها فات عادي النهار الثاني خرجت برا وقالتلهم مانسحقوش وبعدوه عليا ومارانيش حابة نشوفو المهم مسكينة راهي في حالة غير تشوفو تولي تضبح وقالتلو غير دارك لي ماندخلهاش وزوجها مسكين مافرح ماعاش حياتو بقا يساعف فيها وجابلها الرقاة ودارلها كلشي وبدووون جدوى لوين ماوصل قالها نطلقو وراهم رايحين يطلقو هاد ليامات
مشكلتي انو تلاقيت بهادي قريبتي وحد النهار وقعدنا نحكو وخفت نجبدلها على زوجها غير تسمع اسمو تولي تضبح المهم كنا قاعدين حتان جات ليا قاتلي انتي سبااابي وبدات تضرب فيا وتقلي انتي سبابي انا خلعت وليت نرجف درت لكوراج وحكمتها وقلتلها فهميني وشنو انا سبابك
قاتلي كنت لاباس بيا وحد النهار خرجت برا كنت نجهز جاو نسى حكموني قاتلي مانعرفهمش قالولها انتي فلانة لي خطبك فلان (كانو قصدهم عليا انا) قاتلي انا كي ماعرفتهمش قلتلهم ايه انا هي واش دخلكم قاتلي ورحت وخليتهم من موراها بدات تمرض بالشوي
انا خلعت حكمتني الصدمة قاتلي كانو حابين يسحروك انتي مشي انا وانتي سبابي لكان راني لاباس بيا
راني خايفة بزاف ملي قاتلي هاد الهدرة مارانيش نرقد وهي راح تطلق مع راجلها وانا نحب خطيبي ونموت فيه وراني خايفة حابين يديروها بيناتنا وهاد اليامات راح نفتح وراني خاااايفة كيفاش نقدر نحمي روحي وخطيبي لكان نخسرو نموت عندي هو وحياتي كيف كيف فرحتي غير معاه ونحبو فوق ماتتصورو وحتى هو يبادلني بنفس الشي وحكيتلو هاد لحكاية قالي ربي راح يسترنا ماتخافيش
بصح انا بقيت خايفة ،،، كيفاش نقدر نحمي روحي من هاد الناس لا حول ولا قوة الا بالله