عاونوني بالنصيحة

[مشكلتي]

سلام الله عليكم
أنا فتاة كأي فتاة في الجزائر قرات وتخرجت وكي ما لقاتش عمل زادت قرات وراهي تعمل ذرك وتقرا دراسات عليا
كانو يجيوني خطاب ولكن ما كانوش يعجبوني وفات العمر حتى وصلت 34 سنة وفي هاذ الفترة كانت فرص الزواج تقل جاني واحد من الفاميلة ولكن بعيد شوية هو سلف اخت مرت خويا
شكرتهولي ما خلات ما تقول
قلتلها يصلي قالت ايه يصلي قلتلها عندو الدار قالتلي عندو الدراهم يقدر يشري الدار قلتلها خدام قالتلي قافز على روحو اللي لقاها يخدمها ومستواه 9 أساسي وقلت في نفسي هذا مستواه التعليمي محدود تخوفت شاورت والديا قالولي ديري وش تحبي شاورت صحاباتي قالولي ما تتكبريش عليه راهو يبان ناس ملاح
درت النية وقبلت واش لقيت مشكلة كبيرة
مشكلتي ماشي في دراستي ولا في خدمتي
مشكلتي في زوجي
كرهلي حياتي راهو ما يصليش وكل نهار مشكلة يشم ويتكيف حتى عفيتو وأنا منين كنت وانا نعف الراجل اللي يتكيف ويشم
ذرك عندي عام ونص زواج عندي طفلة، صلاتي خليتها، كرهلي حياتي بمشاكلو، رانا كاريين ماعندناش الدار وراني نساعدو في مصروف الدار لقيتو ماعندو الدراهم ماولو كلشي كذب في كذب
مشكلتي أنو يحب المشاكل يعيش بيها يفتعل الشجارات من لاشيء
وانا كرهت حبيت نطلقو وش راح ندير وبنتي مسكينة
والله كرهلي حياتي يهدر غير الهدرة الخامجة حاشاكم
علابالكم وليت ماعنديش احساس، ما نحسش بالعباد من مشاكلو حبسلي راسي كرهت كرهت
وش ندير يرحم والديكم ولكن بدون تجريح من فضلكم