كي ذكرو لحباب بين يد يا وقدامي جبدو سماهم بلواحد
واجملو واتفاخرو ذاك بذايا نسمع في لخبار عندي تتعاود
قولتلهم عندي حبيب مساميا حبو مالكني وفي قلبي خالد
كي تتلم الناس في هذي الدنيا وتتلاقى من كل جهة تتوافد
ويجو من قبلة ومن ظهرة ليا ومن شرق ومن غرب عندي تتواعد
ويولو جملة أهلي وماليا نسمح فيهم في معزتهم زاهد
في خاطر وناستي وليا بيا ياسر عني غيرها ماني رايد
بالك لمن راح يا سامع ليا بيا لميمة الحنانة قاصد
أصل الطيبة والحنانة والنيا وصانا ربي بطاعتها لابد
وامشدد عنها بقداه أن ايا واقرا قولو في كتاب الله شاهد
فرض علينا راه ماهوش مزيا ذا نبينا قالك فيها جاهد
صلي يا ربي على سيد رقيا ورانا مفتاح للجنة راشد
فرح لميمة راه من فرحي نايا ويوم الحزن نشوف قلب اما قايد
لا هلت تبري الضيم اللي بيا راه الخير يجي معاها متواعد
كي يتخوش خاطري حست بيا وتعرف قاع الكاينةحتى وجاحد
وتعرف من وجهي اللي صاير بيا واتنابيني كي الريح اللي هامد
وكي نعيا والا تجيني اذيا تتحير ويعود خاطرها شارد
وتلازمني لا مرضت مساميا تسهر طول الليل وأنايا راقد
المرة تطياب بيديها هيا وتولي كيما الشهد اللي عاقد
لميمة راها حيالي وغطايا ومدفيني في النهار اللي بارد
يوم الغبنة هيا سلاحي لعدايا وانحارب من قاشني واللي حاسد
شوفتها تسوا كنوز اللي قنيا مانخدم ماني على الدنيا واكد
راضي بالمقسوم واللي معطيا رزفي عند الله مكفول وواجد
نطلب في ربي العالي مولايا ونذللوا في الصلاة وانا ساجد
العين اللي باقيا من عينيا يحفظها ويزيد رحمة على الوالد
أبيات المسعود لأموا مهديا في خاطرها جاب ذي الكلمة وارد
الصلاة عليك خاتم لنبيا شفيع اللي راه للمولى عابد
شعر: قاسم المسعود -ديسمبر-2006
( تقرير عن مشاركة سيئة )، و الموجودة أسفل كل مشاركة .
2007-09-14, 11:50
لميـــــــــــــمة
العرض العادي
