ܨܓܨ ๘彡 نصائح من تجاربكم من خلال القاطوا لي عملتوه في عيد الفطر 2015 彡๘ܓܨ.ܨ

[إكرام ملاك]

السلام عليكم ورحمة الله وبركاااته


تحية طيبة نزفها لكم عبر أثير منتديات الجلفة

سأفتتح هذا الموضوع ويكون مخصص فقط للنصائح
وهذا من خلال تجاربكم لمختلف أنواع الحلوى لي خدمتوها في هذا العيد

فاكيد كل وحدة راها اكتشفت طريقة تساعدها على تحضير شيء ما للحلوى لم تكن جربته من قبل


وفي انتظار تفاعلكم مع الموضوع

تقبلوا تحياتي

[إكرام ملاك]

السلام عليكم ورحمة الله

من بين النصائح لي لقيتها في هذا المرة

أولا من قبل لما نكون راح نخدم التزيين في الحلوى تاع صابلي او تاع الطلية

كنت نستعمل الكيس ونثقبوا أو الحقنة تاع الحلوى





لكن هذه المرة جربت حاجة جديدة ما نعرف الا جربتوها من قبل أو لا

وهي حقنة الطبية



المهم تكون جديدة يعني تخرجيها من الكيس تاعها من بعد تزيدي تنظفيها بالماء

وتوضعي فيها الطلاء لي راح تستعمليه




والنيجة جد جد راااااااائعة

والنتيجة من هنا

[amira43100]

السلام عليكم و رحمة الله و بركاته صح عيدك اختي و عيد جميع الاخوات الله يتقبل منا و منكم فكرة موضوعك هايلة هكدا كل الاخواتيستفادو خاصة المبتدئات و حتى انوم يا محترفات
بالنسبة ليا تحضير الحلوة يبدى قبل ايام
1- نحط قائمة للحلويات اللي حابة ندير طبعا تكون منوعة في الاشكال و الالوان نخير مثلا واحد بالقلاساج نوع بالشكلاطة نوع مربع .... و نعمل قائمة احتياطة فيها نوعين اوثلاثة
2- نشري لي مول و الطوابع هوما لولين هكدا اذا ما لقيتش كاش مول في المنطقة تاعي نستبدل الحلوة هاديك بحلوة من القائمة الاحتياطية هكدا ما نضيعش وقت في البحث من جديد خصوصا الحلويات ماشاء الله والله تغبرلك هههههههه
3- نشري المستلزمات كاملين من الفرينة و الزبدة للفنيلا و الخميرة و عادة كي تكون ميزانيتي ناقصة ( ما عنديش دراهم )نحسب كل شي مثلا علبتين زبدة 5 خميرة 5كغ فرينة و هكدا....
4- نحمص الكاوكاو و نقشرو و نرحي حسب الوصفات رطب او مرحي خشين او متوسط و نقشر اللوز اذا محتاجة و نرحيه ايضا
5- نخير الحلوة اللي نبدا بيها عادة نخير الصعيبة واللي فيها الخدمة بزاف خاطر هي اللي تاخد الوقت
6- نخرج الزبدة من الثلاجة و البيض و الماء زهر كل شي باش تكون بحرارة الغرفة
7-نقيس المكونات تاعي نقسم الزبدة نكيل السكر الرطب و الكاكاو و نفصل الصفار عن البياض المهم كل حاجة في الوصفة و نحطهم بجنبي هكدا كي نبدا نخدم ما نضطرش كل مرة نغسل يديا خاصة اللي ما عندهاش اللي يعاونها
اسناو نزيد نتفكر والله عييت من الكتابة

[mariana1]

الفكرة اللي حابة ننبه ليها في الغريبية من الاحسن نطيبو حبة ولا زوج قبل ونشوفوها تهبط وإلا لا ؟ إذا هبطت نزيدولها الفرينة

[أم عمار السطايفية]

بالنسبة ليا الشوكولة او الطلية اللي نعمل بها لخطوط نستعمل الكيس المخصص لوضع الحلويات و الكوكاو في الاعراس ثمن 100 كيس 150دينار للتوفير و ترمى كل مرة و تغير لكن ما نضغطش عليها كثيرا

[نسرين البرايجية]

نصيحة متعسلوش البقلاوة بعسلة المرجان جي رحتها ماشي مليحة

[Aya69]

فكرة هايلة جزاك الله كل خير ان شاء الله

[idron0]

ماشاء الله كل عام و انتم بخير

[*أم كوثر*]

فكرة مميزة اختي اكرام
ومناسبة للمبتدئات حتى يصلن الاحتراف
لي عودة

[أم الحبايب 26]

اخت لقالت متعاسلوش بعسيلة المرجان نتيا با ش عسلتيها انا طيابتلها عسيل ا فدار من بعد زدتلها عسيل ا نتع مر جلن

[أم هبوبة]

فكرة هايلة و ان شاء الله الكل نستفادوا
انا هذي المرة ايام اخدتها في عمل االقاطو نطيب و نحط حتى كملت قاع لي المودال الي كنت حابة نعملهم و من بعد بديت ناخد بالواحد و نعمله الديكور نتاعة و نكلمله و نحطه في ليكاسيت نتاعه و نعاود نولي للثاني حتى كملت القاطو جاني عمل القاطو منظم

[ام عرفات]

وانا هذي المرة طيبت القاطو 10 ايام من قبل
ما درت حتى ديكور كي بقاو يومين جبدتو و بديت ندير في الديكور العرايش خبيتهم هكداك بلا الطاية و تشاراك بلا تسكار والبيضة بلا قلاصاج بصح ما ديروش نيسكافي فيها تيبس القاطو
وحلوى السيار درتلهم المعجون ولصقتهم باه خبيتهم باش يجيو طريين
و معلومة اخرى الي ما عندهاش الميزان باه توزن الحبة عبري بالفنجان تع القهوة

[أولادي قرة عيني]

وأنا خبيت الحلوى ديالي في باطة محكمه باش ميدخلهاش لهوا وتيبس وحطيتها مقابلا الكليماتيزور خاطر الحلوى المخدومة بالبيض والدهن تفسد وقادر دير التسمم

[أمنيات معلقة]

فكرة هايلة وشكرا للي ما بخلوناش بتجاربهم

بالنسبة ليا :
* خدمت قاطو بمارغارين صول العجينة وانا نخدم بيها تطرح في الدسم عذبتني وتطيب تجي مشققة .
* الكاكاو لي لونو غامق بزااف مائل للسواد مش مليح ذوقو قوي ومر بزاااف و بنتو في الطلية (خدمت بيه شكولا للطلي) ما عجبتنيش.
* اللوازم شريتهم بالميزان يعني ماشي علب و...مثل المايزينة و جوز الهند وماشابه و الفانيليا بالعلبة الكبيرة والخميرة بالكارطونة فيها بزاف. يعني حسيت التكاليف اقل.

[أم ياسين الزهراء]

الفكرة ممتازة بارك الله فيك

البقلاوة نحبها طرية يعني مانحبهاش مقرمشة غطيتها بساشي