احلام المكراش

[مولود حداد]

السلام عليكم ورحمة الله


يَا حَاكِي لَلنَّاسْ هْمُومْ الزْمَانْ *** ذَاكْ الهَمْ عْلِيكْ شِي وَعْلاَشِي
خَلِّي الهَمْ لَصْحَابُو يْصِيرْ هْوَانْ *** وْكُونَكْ هَانِي فَصْبِيحَة وَعْوَاشِي
كُونْ كِيفِي دِيمَا زَهْوَانْ *** مَنْ غِيرْ كَرْشِي حَدْ مَا نَهْوَاشِي
يَا مْرَا رَقْدِيلِي ذُوكْ الصَّبْيَانْ *** وْقَرْبِيلِي المَايْدَة وْبَعْدِيلِي فْرَاشِي
اليُومْ الصَّحْ عَالطَّابْلَة يْبَانْ *** لْسَانِي يَلْهَثْ وَضْرُوسِي مَا تَحْفَاشِي

شَفْتْ النَّاسْ خِيرْهُمْ فِي نُقْصَانْ *** تْمَنِّيتْ مَرَّة لَوْ جَاوْ كْبَاشِي
نْتَكِّي وَاحَدْ مَنْ ذُوكْ الخَرْفَانْ *** وَبْلاَ غَرْنُوقْ الخَاطَرْ مَا يَهْنَاشِ
بُوزَلُوفْ خْفِيفْ مَاكَلْتُو أَمَانْ *** مَرْقَة بَالخَلْ تْنَحِي هَمَّ الغَاشِي
مْثَّوَمْ احْمَرْ بَالحُمَصْ يَزْيَانْ *** بَكْبُوكَة شَفْتْهَا قَلْتْ حْوَاشِي
دَوَّارَة فَالشْتَا دِيرْهَا عَصْبَانْ *** قُولْ بَسْمْ الله وَاضْرَبْ أَلْمَكْرَاشِي

هْرِيسَة حَارَّة تْقَطَّعْ المَصْرَانْ *** وْمَنْ غِيرْهَا شِي مَا يَحْلاَشِي
جَاجَة مْحَمْرَة طَيَّبْهَا فَنَّانْ *** تَقْطَرْ سْمَنْ بِيهَا رَانِي عَاشِي
بَرْكُوكُسْ بَفْوَارُو يَلْمَعْ مَرْجَانْ *** تَضْرَبْ قَدَرْتِينْ مَا تَعْيَاشِي
الطْعَامْ بَاللَّفْتْ غْزَالْ المَيْدَانْ *** وَالزْرُودِيَة الحَمْرَا مَا تَنْسَاشِي

وَامْسَحْ قَلْبَكْ بْكِيلُو بَنَانْ *** وْعَرْجُونْ تْمَرْ مَاهُوشِي رَاشِي
بَاكُورْ عْسَلْ مَلَفْرِيقُو بَرْدَانْ *** يَتْفَحْفَحْ فَمِّي كِي نَعْطِيلُو المَشْمَاشِي
عَصِيرْ اللَّيْمُونْ أَشْرُبْ بَالكِيسَانْ *** سِيلِيكْتُو حَمُّودْ يْطَيْحَكْ مْغَاشِي
قَهْوَة كَحْلَة اتْمَعَّنْ يَا إِنْسَانْ *** تَحْسِي جُغْمَة قُولِّلي مَا تَحْيَاشِي
وَبْحَلْوَة التُّرْكْ يَرْطَابْ اللْسَانْ *** وْبَقْطَايَفْ رَمْضَانْ قَعْدَة مَا تَخْفَاشِي

هَذِي كَلْمَة جَاتْ فَالدِّيوانْ *** خُوذْ نْصِيحَة إِذَا مَا تَعْرَفْشِي
الدَّنْيَا تَضْحِيَة اسْمَعْ يَا إِنْسَانْ *** شَمَّرْ يَدِّيكْ وَاقْفَزْ مَا تَلْعَبْشِي
بَالاَكْ يَغْرِيكْ بْلِيسْ الشَّيْطَانْ *** رَاكْ تْقُولْ حَدْ مَا يَفْنَاشِي
غِيرْ رَبْنَا لَكْرِيمْ المَنَّانْ *** مَنْ غِيرُو هُوَ مَايَبْقَاشِي
صْلاَة الصُّبْحْ زْيَادَة فَالمِيزَانْ *** وَفْخِيرْ العَتْمَاتْ مَا تْفَرَطْشِي
أَقْرَا فَاليُومْ نْصِيبْ مَالقُرْآنْ *** وْجِيبْ الأَدْعِيَة مَا تَغْفَلْشِي
أَسْعَ لَلْخِيرْ أَجَعْلُو عُنْوَانْ *** مَقْرُونْ بِيكْ مَا يَتْبَدَّلْشِي


وَحْدَتْنَا بْدَعْوَة طَهَ العَدْنَانْ *** وَاللِّي مَازَارْ الحَرَمِينَ مَا يَتْلَذَذْشِي
القِبْلَة الأُولَى القُدْسْ ذَاتْ الشَّانْ *** النْبِي سْرَا لِيهَا كِيفَاه مَا نَحْلَمْشِي
نْمَسْ تْرَابْهَا وَنْسَامِي الشُّجْعَانْ *** فِي أَرْضْ الرِّبَاطْ مَا نَتْخَلَّفْشِي
قَلْبِي رَاهْ شَاعَلْ بُرْكَانْ *** حُرْقَة عْلَى نَاسْ مَا تَتْحَرَّكْشِي
خَاوَتْنَا مَنَّا شَايْفِينْ خُذْلاَنْ *** هَلْ نَرْضَى بِيهْ أَمْ مَا نَرْضَاشِي

رَانِي حْفِيدْ الفَارُوقْ وْعَثْمَانْ *** قَادَة جُيُوشْ مَا تَنْهَزَمْشِي
شَارُونْ قَرْدْ فِينَا شَمْتَانْ *** وَالغَضَبْ مَنَّا مَا يَظْهَرْشِي
عَالأَقَلْ صَلِّي لَلرَّحْمَانْ *** أَدْعِي كُونْ قْوِي وْمَا تَتْرَاجَعْشِي
اليَأْسْ فِينَا مَا عَنْدُو مَكَانْ *** وْرَبِّي وْعَدْ بَالنَّصْرْ وْرَبِّي مَا يَخْلَفْشِي

شهية طيبة على مائدة الشهادة