مشكلتي ابي

[مشكلتي]

اريد ان اقص عليكم قصتي ربما ترشدوني الى حل او تخففو عني
انا شاب حوالي 25 عام اعمل عند ابي مثل اخوتي دون اجر المشكل يبدأ من هنا ميمدليش المصروف و خاوتي كانو يخدمو في خدمة يسلكو فيها من عند اناس يسلكو مليح بابا ميديش من عندهم رغما انو هوا الي يصرف على الخدمة هذيك
انا نخدم بصح منتعاملش مع اناس ماشي كيفهم
او كي يمدلي دراهم انا نصرف على روحي واحينا نصف المبلغ نصرفو على الخدمة ومن بعد نقلو زيدلي يقلي مديتلك
‏ المهم اعاني من ابي وان راجل نفكر في المستقبل متى ابدء حياتي متى يصبح يعاملني كرجل ويعطيني حقي
انا لااقبل ان اتزوج مثل اخي و ابي هوا الذي يتكفل بمصاريفها رغما زوجها لايعمل معنا كان يخدم عند اناس
اذا ستمر على هاذ الحال فانا ربما لن اتزوج حتى بعد 30
في ذاك الوقت انزع فكرت ازواج من راسي لاني لااريد ان اتعب على اولادي وانا كهل بل اريد ان اغتنم شبابي
‏ بابا يحبني على خاوتي مكانش يوم مذكرش اسمي باش يحكيلي حاجة ولا يسقسيني ماشي كيما خاوتي
على ختراكش ميقيموهش و ميسمعولوش ويديرو واش يحبو وانا نشاورو وتقريب اخوتي في 3 عاقين لابي
كل مرا اقول يجب ان اطالب باجري اليومي لاكني لااتجرء لانه ابي و ربما ليس لدي حق ؟
في كثير من الاحيان اقول في نفسي يجب ان ابحث عن عمل لان ابي لايحترمني لاكني اتراجع لاني اعلم انه لن يتركني او سيحدث مشكل بيننا
‎ ‎‏ وليس لدي مستوى تعليمي لاتحصل على وضيفة ‏
ونحن لباس بينا عندنا عادي
هل من نصائح
لاتقولو انك تغار من اخوتك لاني الحمد لله لااحسد احد
ولاتقولو انك مازلت سغير عن ازواج وشكرا لكم مسبقن

[amine009]

الـسلام عليكم . . . أولا ماراكش صغير على زواج مع أنك لم تذكر عمرك و لكن أنا مقتنع انك فوق 21عام و لذلك راك في سن الزواج ..... أما في ما يخص الراتب أنا نقول صارح الأب نتاعك و قولهاله أنا اريد مصروف أو قلها الأم نتاعك تهدر معاه و حقيقة كون تهدر مع الام أفضل ..... و هـكا ممكن يتحل المشكل .. أنا نظن الأب نتاعك راه يخمم بلي راك لاباس عليك يعني كيما يقولو -- واكل و شارب -- و رانا كامل ناكلو من الخدمه هديك مع بعض و لكن للأسف ما خممش انك باغي تعتمد على نفسك و ليس مثل الاخوة نتاعك ... المهم حل مشكلة نتاعك راها فتحاور و احذر من أخذ المال عند الحاجة بدون اذن لانه ترجع نتا الغالط

[ZINA 98]

انا رايي انك تحكي مع باباك و تقلو حاب ناسس نفسي بنفسي مانيش حاب نبقى متكل عليك طول حياتي لخاطر اذا بقيت مع باباك ماكش رايح تبني دارك لانو عندي ولد خالي يخدم تاني عند باباه و الان تزوج و عندو و ولد و مازال باباه يصرف عليه حتى لي كوش تاع البيبي يشرهملو باباه و الله هذه انانية
كي تحكي تقدر تلقى خدمة راهي غير تتلاوح و مبعد المرا ساهلة
المهم نصيحتي انك ماتتزوجش مادامك تخدم عند باباك
ربي يسهلك و يوفقك

[azertata]

ماشي عيب كي تهدر على حقك لكن بطريقة مهدبة

[ريان 7]

السلام عليكم و رحمة الله و بركاته


كاين مثل يقول : لي تحبو ما تحاسبو ما تناسبو

يعني العلاقات العائلية من الأفضل عدم ربطها بالعلاقات المالية , لأنو باباك و ممكن يغضب عليك و ممكن تفسد علاقتكم بسبب المال , لهذا أفضل حل أنك تشوف عمل مستقل عن عائلتك .
و نصيحتي ما تحبسش الخدمة عند الوالد حتى تلقى عمل مستقل .



بالتوفيق

[Rimsamwaz]

رايي لا يختلف عن البقية قول لباباك بصراحة انك كبرت ولازم تشوف حياتك او اطلب حقك ولكن بادب لانو مهما كان يبقى ابوك

[~رآقية بأخلآقي~]

بما أنو أباك مستقربك و يعاملك أفضل من إخوتك استغل هاته النقطة لصالحكَ
وأخبره بطريقة مناسبة بأنك تريد التفكير في حياتك الخاصة قولو مثلا واش رايك يالحاج راني نخمم أني نبدا نلم شوي دراهم و...و............((اكمل السيناريو من عندك ))

المهم فقط اخبره بطريقة تحسسه من خلالها أنك تشاور فيه وتدي في رايو وشوف ردة فعله ان شاء الله راح يفهمك واذا مفهمكش والا مسمعلكش ننصحك لا تعُق والدك واسمعلو كلامو وابحث عن وظيفة اضافية في المساء مثلا ولا تعمل اكثر من الواجب في عملك مع والدك وكثر من الاستغفار والدعاء أخي الكريم وربي يسهل لك أمورك يارب..

[شاملة لينة]

ربي يفرج عليك...

[الصديق قروف]

ربي يفرج عل كل المسلمين