قاطو جديد قاطو الطربوشة وصفتي الخاصة

kakinova · 2015-01-08, 20:53

السلام عليكم

عندي بزاف ما شاركتش في قسم الحلويات و حتى معظم الوصفات نحطها فالكوزينة

قلت نحطلكم هاذ الوصفات من وصفاتي الخاصة و مودالات جدد من ابتكاري ممكن يفيدو الاخوات الكريمات

ما تنساونيش فقط من دعوة خير انو ربي يعطيني واش متمنية و يشفيلي بناتي آمين يا رب

قاطو الطربوشة في مول السيليكون

100 غ سكر رطب
250 غ مرغرين لابال
2 مغارف كبار زيت
2 صفار و بيضة كاملة
رشة ملح
مغرف كبيرة فاني
فلان فاني ملعقة كبيرة
اقل من نصف كيلو غرام فرينة لازم تكون طرية حتى تبانلك تلصق دخليها للبراد تبرد تتماسك
اقل من نصف باكي خميرة الحلوى
توزني كامل الحبات قد قد و تحشى نصف حبة كابريس او نصف حبة شكولا و نغلق و تطهى كامل الكمية

لازم تخليها فالثلاجة و كل مرة تخرجي قيس ما تستعملي في صحن و الباقي تخليه فالثلاجة

تطهى من تحت و الافضل ترفعيها للرف الاول لانو لو طيبتيها فالسفلي رح تتشوط من تحت بسرعة و ما تجي تحمار حتى تتحرق و يكون منظرها ماشي باهي
لما تحطيها لفوق طيب في غرضها و تجيك ذهبة اللون و لونها باهي و من فوق شعلي تاخذ لون احمر ذهبي خفيف فقط

لما تبرد تقلبيها في بلاطو و تخليها تبرد مليح حتى تخلصي كامل الكمية

ذوبي شكولا امباسادور و ضفيلها القليل من تاع الميزان او منى رح يجيك الطعم امممممممممممم و اللون بني مسود و الشكولا تقعد تبرق

ذوبيها في حاجة نظيفة و جافة على نار هادية و حذاري يقيسهالك البخار ديري سارفيات على كامل محيط الاناء و حطي الاناء لي فيه الشكولا هكذا السارفيات ما تخليش لافابور تقيس الشكولا

من الافضل لما تبداي الطياب حطي الشكولا و ما تحركيهاش خلاص حتى تذوب كامل تلقايها ذابت لما تبداي تستعمليها

المهم خلطي الشكولا بسرعة رح تولي تبرق و ادهني المول مليح و خصوصا الفراغات و الحواشي من فوق و حطي الحبة تاعك

حطيها فالكونجيلاتور 5 دقائق و هي تماسكت نحيها من المول و حطيلها نصف حبة توت رح تلصق وحدها

و هادا المول المستعمل

ملاحظة في جميع حلويات السيليكون من الافضل الحبة تكون 20 غرام 22 على الاكثر

و في حالة ماكانش خميرة ممكن تصل 25

اذا عملتيها اكبر من هكذ رح تفيض على المول