رح نضيع

[مشكلتي]

السلام عليكم ورحمةالله
حاسة نفسي ضايعة رجاء اقراو مشكلتي بعدها احكمو عليا انا فتاة عمري 24 سنة اكملت دراستي والحمد لله عندي عام وانا نحكي مع شخص عبر النت تعرفت عليه وبعدها بقينا على اتصال نتفارقو ونعاود نرجعله في كل مرة طلبني للزواج فرفضت لانني بصراحة لم اكن احبه طلب مني انه ياتي للجامعه ويشوفني رفضت وانو نبعت له صوري رفضت ايضا بقينا نتحدثوا بالهتف الى ان قرا اخي ذات يوم الرسايل ومت بالخوف وتعاركنا بعدها كان اخي رح يقول لامي الا انني وعدته بلي ما نرجعش ليه عيطلو خويا ونكر اسمه غيرت الشريحة وعيطتلو بالبريفي وسبيتو قلت له بسبته خسرت ثقة اهلي على خاطر ماكنتش حابة نوصل لتمة قالي راني حاير كتر منك لو بيدي نجي نخطبك مي دار ما عنديش كي الناس مشكلة سكن افترقنا مي والله زاد حبه في قلبيي وما نسيتو ذات يوم عيطت بالبريفي شحال من مرة المرة الاخيرة ما تولهتش حتى خرجلو النمرو عاودلي تصدمت وبقى يعيطلي وحكيت معاه شحال من مرة وزدت قلتلو ارواح تخطب قالي محال لاا تفهميني ياك قلت لك مشكلتي وكي منهزش عليه يقولي تتمسخري بيا ولا ه دايرة رنفوا وساعات يعيط عليا وفي الاخير اكتشفت مهنتو انه عسكري ومخبي عليا قالي حماية مدنية لكن كنت ديما مصرة انه يكدب وعرفت بلي رقيب اول
مزالت النهاية مفتوحة مزلت نحبو بصراحة ودرك زدت بدلت الشريحة ونحكي معاه بالايميل لحد اليوم
وش ندير ما قدرتش ننساه انصحوني واعطوني الحل

[dark star]

الحل الوحيد اتقي الله فالله احق ان تخشيه وليس عائلتك ،حاب يخطبك يجيك من الباب ما كانش ربي يسهل
مهما تعلقتي بيه اغلقي باب الشيطان وما ترجعيش .....وكل هذ الذي انت فيه بتعديك حدود الله .....توبي الى الله وربي من بعد يفرج ويفتح عليك
وعمرها المعصية ما تجيب خير

[حياتي نبع امل]

الله يهديك ،توبي وارجعى الى الله ،وعمرى وقتك لانو الفراغ هو اللي يخليك توقعي ف المعاصي ،اشغلي نفسك باشياء ترجع عليك بالفائدة ،قبل ما تندمى وحينها لا ينفع الندم

[nadiatlemcenia]

اختي استغفري الله لذنبك وتوبي ماتقوليش رتهم يفتو عليا لا غاليتي وكما يقولو ناس بكري خوذ الراي ليبكيك مش الراي ليضحكك
واذا كان هو مكتوبك ربي يجمع بيناتكم ولو باعدتكم جبال وبحار واذا ماكانش هو مكتوبك تكوني مرتاحة لبال وصافيا مع نفسك
الشيطان يبينلك بلي تحبيه وماتصبريش عليه اشغلي وقتك بالذكر والاستغفار واشياء مهمة افضل ماقاعدة غير في ضيق وتخمام على الفاضي
ربي يوفقك اختي

[AMINA.Z]

باينة ما فيه خير هذا
وكلي عليه ربي .... و استغفري ربي هو اللي يفرج عليك
انا نحير فيهم ما عينكش تتزوج لاه تتعرف بالبنات و تحكي معاهم !!!!!!!

[فاطمة*]

ياأختي راها باينة علاش يكذب عليك لوكان جا يحبك من الأول يصارحك وأساس أي زواج هو الصراحة ثم الصراحة أكثري من الاستغفار والدعاء والبعد عن مثل هاته العلاقات وشغل أوقات الفراغ بما يفيد من ذكر وغيره.

[محفوظ البسكري]

انت بعثتيلو صورك ومن فوق سبيتيه ؟؟؟؟؟ الله يهدينا

[baalache]

فاق بيك خوك وما حبستيش انت فعلا ما تحشميش وجاي هنا راكي باغية الناس تقولك حلال ولا شتاهو روحي للطبيب تاع الامراض العقلية روحي

[الأمين®]

هذا ليس حبا و إنما تعلق عاطفي كلما تماديت فيه زادت الأمور تعقيدا فتوقفي اليوم قبل الغد

[~رآقية بأخلآقي~]

وجعتيلي قلبي يا ختي كيما قال اﻻخ فاق بيك خوك ومحبستيش واش راكي حابة؟؟؟؟؟؟؟؟؟؟؟؟؟


عﻻقتك به خطأxخطأ واللوم اﻻن راهو عليييك استغفري موﻻك وتوبي لربي سبحانو واملي وقت فراغك وربي يهديك

[~رآقية بأخلآقي~]

اختي شوفي في توقيعي هذيك الرسالة اتمنى انك تقرإيها وربي يهديييك

[imenemalak]

اختي الغلطة بديتيها من الاول وطريقة تعارفك بيه .......... ربي يهدينا ... استغفري ربي ورجعي للطريق المستقيم

[ابراهيم داود]

من خلال تجربتي أثناء اداء الخدمة العسكرية اقول لك ان معظم العسكريين يدخلون في علاقات من هذا الشكل بدافع تمضية الوقت فقط و العبث للتسلية... لقد كنت في احدى الثكنات الصغيرة بجبال باتنة وكان معظم العسكريين يقضون الليل في الكلام الفارغ ونسج علاقات غرامية - هاتفية افتراضية - داخل احدى الشاحنات العسكرية - في الليل خاصة - واحيانا كان يتصل احدهم بصديقته ونحن في نقطة ملاحظة بالغابة ويشغل السماعات الخراجية و ياخذ في العبث بها بكلامه المعسول.... كل هذا الهراء يفعله بعض العسكريين - واكرر البعض فقط - لتمضية الوقت - لذلك انصحك بالابتعاد عنه

[yacino dz]

الحل بسيط أختي

اتقي الله

ومن يتق الله يجعل له مخرجا و يرزقه من حيث لا يحتسب

و تذكري انه ما كان الله ليعذب قلبا بشهوة تركها صاحبها في سبيل الله

انت قادرة بعون الله على طلك

[حبيبة زوجها]

اختي بدلتي الرقم معليش مدابينا تبعدي عليه لانه باين تع تمسخير بصح بالايميل مازالك تحكي فهميهالي وش حابة نقولولك وتقراي هنا؟؟؟الحاجة لي متاكدة بيها انه علبالك بلي يتمسخر وانت خايفة اهلك وتقولي نحبه لو كان يخليك ولا يخطبك واحد اخر يومين تنسايه
انفضي الغبار عليك متعاوديش تهدري معاه كامل وتوكلي على ربي رح يجيبلك لي خير منه وهتحبيه وهتموتي عليه ثاني ...الصح في الحلال والباقي مكانش منه
ربي يقدرك