وصية في قصيدة

[nail44]

بسم الله الرحمن الرحيم
قصيدة في شكل وصية للشاعر المرحوم قويسم بن عيسى الهدار رحمه الله

ـصـــلى الله على امــــام الأنبيا***صلاة وســــــــــلام كل ليلة بالفين
وارضــى عن أليه واهل الشرعيا***لصحاب ولنصار والمهاجــــــــــرين
قلــــت نجيب ابيات في شكل وصيــــــــــا***راه الحق يقال ولو منصورين
يا بونادم ماتقــــرـش الدنيــا***وأعمل حذرك راك فاني يامسكين
هـــاميز وكـــــــون صاحب عقليــا***وانتبـيه وكون للأشياء فطين
وأذكر ناس القرون الماظيــــا***من أمراء وجبابر وسلاطين
وين ملوك الشام كانو أقويـا***وين لي ملكو الدنيا وفراعين
لاتنسى يوم تجيـــك المنيــــا***لابد ياتي نهارك كي لخرين
لايبقى لا عز لا فنطازيا***تطويك الأيام ولو بعد حين
وتولي مسبول جثة مرمية***أحباب وعديان عندك ملمومين
هاتوب لمولاك واخطي المنهيا***بيبان التوبة أمامك مفتوحين
وراك محاسب على كثير ودونيا***وجد روحك للسفر ودير عوين
قوم بدينك قبل كل قضيا***واعمل فعل الخير تربح في الدارين
وحافظ عالصلاة مادمت حيا ***في علمك ويل للمصلين
نعني لي كان عنها ساهيا***ويعقب لوقات باليوم ويومين
وزكي مالك كان كنت من الغنيا***واعمل رزقك فيه قسمة للمسكين
وشهر الصوم عليك واجب فرضيا***ويذا تستطيع حج الحرمين
أدي الكيلا دايم وزن وافيا***لا تسمع ويل للمطففين
لا تتصرف بالربا بيع وشريا***لا غشيت تكون من المفسدين
طيع الوالدين حق التربيا***سعيك رابح ذا رضاو الوالدين
عاصي والديه ناكر تربيا***محروم ومطرود من المسخوطين
لاتتكبر كي تكسب ماليا***اتواضع وكون من المحسنين
المال مال الله وكيلو انتايا***خرج منو ماوجب للمحرومين
هابلاك تعيش في رفاهية***تنظر ليك عيون هلها جيعانين
كون كريم وماتكونش قاسيا***لاتجعلش يديك ديما مغلولين
واكرم ضيفك يكرمك عالي العليا***وماتخبخلش وكون عاليتيم حنين
والسايل كافيه من فان الدنيا***واتفقد واشرح حال المحتاجين
وارفق بالضعيف والزواليا***قلبك يرحم كون للمحتاج معين
ذاسعدت اخيك ماهيش مزيا***هذا واجب يفرضو عليك الدين
ماتقنطشي كي تصيبك باليا***بعد العسر يسر للي صابرين
ياتي ربي بالفرج بعد شويا***والشدة تدوم على الكافرين
احمد ربي وارضى بلي هيا***واستقنع وكون من الشاكرين
واستغفر مولاك صبحة وعشيا***والتقوى هلها يكونو آمنين
شاور اهل العرف واهل الشرعيا***والمتفقه خير من الجاهلين
لاتظلمش الناس قوة وعتايا***لعنة الله على الظالمين
لاتسبق للشر شاو الباديا***لي يسبق للشر بيه اتفوه والين
لاتنضرش لخوك نضرة موذية***أعوذ بالله من الحاسدين
حب الخير لخوك تراه انتايا***والمصلح يكون للناس أجمعين
ذاكنت مع الناس نعطيك وصية***لاتتفاوت في كلامك كون رزين
صون لسانك لاديرو سخريا***لاتكذبش الكذب ناسو مذمومين
لاتكذبش الكذب راهو معصيا***لعنة الله على الكاذبين
الغاتب والنمام راهم اشقيا***هاذوكا يقال لهمالخاسرين
هبلاك تكون عون البدعيا***والبدعة للنار هلها محشورين
لاتصحب طماع وانتهازيا***ويعودو في راس مالك طامعين
لاتبنيش جدار وسط الجرعايا***لايديه الواد ولوطال السنين
لاتخذش الكاف خوذ الجرايا***سايس روحك فيالوطى وانظر بالعين
جنود الشيطان راهم مقذية ***اعمل حذرك لاتجي وسط كمين
واتماهل واسلك طريق العافيا***لوتعجل تكون من النادمين
لاتصحب مندار صنعة سحريا***لايصلح من كان من السحارين
يحتالو عالناس فكرة وهمية***يدو مال الغير خطفة وترهبين
شر الخلق فعالهم شيطانيا***شاهدين الزور و المنافقين
واستحذر من صاحب الانانيا***هماز ولاماز والمستهزئين
شاور اهل العرف والناس التقيا***تتخلق بخلوقهم سالم أمين
لاترميش المحصن لي باريا***هاذاك بهتان واثم مبين
لاتتحدث بالعيوب المخفيا***لاتتجوسس لاتبوح بسر لخرين
داثر نابو لاديرو سهميا***يدي سرك للعدو عندو وجهين
واتفاطن وكون مولا نيفيا***للمظلوم تكون من الناصرين
الا صالحت ثنين دير العدليا***والباطل زهوق اهلو مذلولين
لاتحتال مع اهلك دير النيا***راك تنال العطف من الاقربين
قري ولادك كان عندك ذريا***علمهم صنعة يكونو محترمين
كل راعي مسؤول عن الرعيا***واعدل بين العايلة والمختصمين
جارك عندو حق عنك ياخويا***والمسلم والمسلمة ليهم حقين
ادي الامانة لهلها محضيا***على كل حال راك نتا امين
واعمل بنشاط لذيك وذيا***لاتتراخا راك تفقدهم لثنين
حاب الذات يقول دايم ذي ليا***للي جات على يدو يدي قسمين
فات حدود الله عينو معميا***ولو دار المال يتمنى مالين
والانسان يسال من الانسانيا***لا غتبة لاغش قلبو صافي زين
ينظرهم بالعين نظرة جديا***ويصدق ويكون من الصديقين
راه قليل اليوم منهو ناجيا***لاتتعجب راك فالقرن العشرين
كيماراك تشوف ونشوف انايا***بعض الناس تقول بلاك مجانين
ماضيهم ولا مجرد حكايا***يمحو في لي شيدوه الاسبقين
يدعو للاسلام كلمة سطحيا***ماخوفهم واعض ماهم فاعلين
والانسان نظيف له شرعيا***له واجبات شتى معروفين
دستور وقرآن باسوار وآيا***شرحوه الرواة والمفسرين
والقول بلا فعل خصلة راديا***هاذاك نفاق فعل المفسدين
الدنيا وما عليها فانيا***في يوم الميعاد لله راجعين
يوم القمطريرة يو الداهيا ***يوم البعث تشيب فيه المرضعين
يوم تكون الناس حفي وعرايا***واليوم لي فيه تسواد الخدين
تهوى الشمس تكون منا دانيا***فوق الخلق تكون قل من الميلين
امن الحر لحوم لخلايق مشويا***غير يموجو في عرقهم غارقين
تسمع روس الخلق تطبخ مقليا***سكارى بغير سكرة مفتونين
يوم الفصل ماتخفى خافيا***كل واحد جاتابع لعمالو رهين
كتابك في يديك تقراه نتايا***واعضايك نطقو عليك شاهدين
لي قدمتو في ليام الخاليا***يحضر بالتمام صالح ولا شين
تتفاضح لسرار تضهر جاليا***ماذا يرجى فيك ياويحك ويحين
لاينفع لا مال ولا ذريا***ولا حد يسلفك يعطيك الدين
لاتطلع ولا تيأس ياخويا***رحمة ربي قريب من المحسنين
لاتتهاون توب وافهم معنايا***واصلح مافات سابڨ تنجى يامسكين
نختم ذي لبيات ونتم غنايا***نا وجهت نصيحتي للغافلين
أحسب التاريخ ألف و تسعميا***تميت الكلمة ثمنية والستين
التاريخ المذكور في المسيحيا***الشهر لاول جانفي فيه نهارين
عين الابل بيرو ورڨاد رعيا***وعبيد الله جد عرش الأبوين
تاريخ الميلاد حسب أماليا***الف وتسعميا وعشرة عوام خرين
وتربيت صغير وسط الباديا***ومن بعد تغربت في المروك سنين
عاشر لأهل فاس وقامو بيا***شدوني باحسانهم ناسو زينين
ودخلت مع الطايفة القادريا***أمي مانقراش متفقه فالدين
مولا دعوة خير شاعر الأوليا***نفع الله ورضات الصالحين
خضرة وعليها مجينب مسقيا***واسم الله يرد كيد الحاسدين